1 Chronicles 18

nyankole

← Chapter 17 Jump to: Chapter 19 →

1Ebyo ku byahwaire, Daudi yaasingura Abafilisiti, yaabacwa eishaija yaakwata orurembo Gaati n'ebirorero byarwo, yaabinyaga Abafilisiti.

2Reero yaasingura Abamoabu, baaba abairu be; baaguma nibamuha omushoro.

3Kandi Daudi akasingurira Hadadezeri omugabe wa Zooba haihi na Hamati. Obu Hadadezeri yaabaire naaza kwebyarira ekiijutsyo aha mugyera Eufuraati.

4Daudi yaamunyaga ebigaari rukumi, n'ab'ahambaraasi enkumi mushanju, n'abarwani obukumi bubiri abarikugyendesa ebigyere. Daudi embaraasi zoona, ezirikukurura ebigaari, yaazitema ebiteega; kureka yaatsigaho ezirikubaasa kukurura ebigaari igana.

5Abasiriya ba Damasiko ku baizire kuha emikono Hadadezeri omugabe wa Zooba, Daudi yaabaitamu abantu obukumi bubiri n'enkumi ibiri.

6Bwanyima Daudi yaata ebigo by'abarinzi omuri Aramu eya Damasiko; Abasiriya baaba abairu be, baaguma nibamuha omushoro. Nyakubaho yaaha Daudi obusinguzi ahi yaabaire aza hoona.

7Daudi akanyaga engabo z'ezaabu, ezi abairu ba Hadadezeri baabaire bakwaitse, yaazireeta Yerusalemu.

8Kandi Daudi yaanyaga emiringa mingi munonga, yaagiiha Tibuhaati na Kuuni, endembo za Hadadezeri. Egyo miringa niyo Solomooni yaaheesiremu ekiyanja ky'omuringa, n'enyomyo, n'ebintu by'omuringa eby'okukoresa omuri Nyaruju.

9Tou omugabe wa Hamati ku yaahuriire Daudi asingwire eihe rya Hadadezeri omugabe wa Zooba,

10yaamutumaho omutabani Hadoraamu kumuramutsya n'okumutabaarutsya okurwanisa Hadadezeri, akamusingura, ahabw'okuba Hadadezeri ogwo akaba atoosha kurwana na Tou orugamba. Haza yaamutwekyera ebintu by'emiringo mingi; eby'ezaabu, eby'efeeza, n'eby'emiringa.

11Ebyo bintu omugabe Daudi nabyo yaabihongyera Nyakubaho, hamwe n'efeeza n'ezaabu ebi yaanyagire omu mahanga goona; ery'Abaedomu, ery'Abamoabu, ery'Abaamoni, ery'Abafilisiti, n'ery'Abaamaleki.

12Reero Abishaayi mwene Zeruuya yaitira omu ruhanga rw'Omwonyo Abanyaedomu akakumi kamwe n'enkumi munaana.

13Yaata ebigo by'abarinzi omu Edomu, Abanyaedomu boona baaba abairu ba Daudi, Nyakubaho yaaha Daudi obusinguzi ahi yaabaire aza hoona.

14Daudi nikwo yaategyekire atyo Isiraeli, akacwera abantu be emanja z'oburyo omu bwinganisa.

15Obwo Yoabu mwene Zeruuya niwe yaabaire ari omukuru w'eihe, Yehoshafaati mwene Ahiludi ari omuhandiiki w'ebirikubaho;

16Zadoki mwene Ahitubu na Ahimeleki mwene Abiyataari bari abahongyerezi; kandi Shavusha ari omuhandiiki mukuru;

17na Benaaya mwene Yehoyaada ari omukuru w'Abakereti n'Abapeleti; Reero batabani ba Daudi bari abakungu bakuru b'omugabe.

← Chapter 17 Jump to: Chapter 19 →