2 Chronicles 31

nyankole

← Chapter 30 Jump to: Chapter 32 →

1Ebyo ku byahwaire, Abaisiraeli boona abaabaire bari aho baimuka, baaza omu ndembo za Buyuda, baasheenyagura enyomyo, baatemagura ebishushani by'emandwa Ashera, baasheenya obutungutungu n'amatambiro g'omu nsi ya Yuda yoona, n'eya Benyamiini, n'ag'omu ya Efuraimu n'eya Manaase; okuhitsya obu baabicwekyereize byona. Bwanyima Abaisiraeli bakagaruka omu ndembo zaabo, buri omwe aha butaka bwe.

2Reero Hezekiya akagaruka yaata abahongyerezi n'Abaleevi omu mbu zaabo omu buri kicweka, buri omwe nk'oku omurimo gwe guri: abahongyerezi n'Abaleevi ab'okutamba ebitambo bicwekize, n'ebitambo by'okurya kumwe: okuheereza, n'okusiima, n'okuhimbisiza aha marembo g'omu bikaari bya Nyaruju ya Nyakubaho.

3Ebi omugabe yaatoizire naabiiha omu bi atungire, bikaba eby'okutambwa ebitambo bicwekize, eby'akasheeshe n'eby'omwabazyo, n'eby'ahari zaasabato, n'eby'aha kuboneka kw'ameezi, n'eby'aha magyenyi agaatairweho, nk'oku kihandiikirwe omu biragiro bya Nyakubaho.

4Kandi akaragiira ab'omuri Yerusalemu kuha abahongyerezi n'Abaleevi emigabo ei barikuragiirwa kutunga; ngu babone kweheerayo kimwe, nk'oku barikuragiirwa omu biragiro bya Nyakubaho.

5Ekiragiro ku kyaherize kubuga hoona, Abaisiraeli baaha emiganuro mingi munonga y'ebyokurya by'omujuma, eya viino, ey'amajuta g'emioliva, ey'obwoki, n'ey'ebi baihire omu misiri. Batyo baareeta bingi munonga ebya kimwe kya ikumi ekya buri kintu.

6Kandi Abaisiraeli n'Abaayuda abatwire omu ndembo za Buyuda nabo baareeta kimwe kya ikumi ky'ente n'entaama, na kimwe kya ikumi ky'ebintu ebirikwera ebihongyeirwe Mukama Ruhanga waabo. Haza baabirunda emituumo.

7Bakatandika kubirunda emituumo omu kwezi kwa kashatu, baabiheza omu kwa mushanju.

8Hezekiya n'abategyeki ku baizire, baareeba egyo mituumo, baahimbisa Nyakubaho, kandi baasingiza abantu be Abaisiraeli.

9Hezekiya yaabuuza abahongyerezi n'Abaleevi eby'egyo mituumo.

10Azariya omuhongyerezi omukuru, ow'ab'omu muryango gwa Zadoki, yaamugarukamu ati: Okwiha obu baatandika kureeta emitoijo omuri Nyaruju ya Nyakubaho, turiire twahaaga, byashaaga bingi. Manya Mukama ahaire abantu be omugisha, nikyo twiniire ebintu bingi ebishaagire.

11Bwanyima Hezekiya akabaragiira kutebeekanisa ebishengye by'omuri Nyaruju ya Nyakubaho. Nabo baabitebeekanisa.

12Babitamu n'obwesigwa, ebintu eby'emitoijo, n'ebya kimwe kya ikumi, n'ebihongirwe. Omukuru orikubireeberera akaba ari Konaniya Omuleevi, n'omurumuna Shimei naakurataho.

13Kandi Yehieli, Azaziya, Nahati, Asaheeli, Yerimooti, Yozabadi, Elieli, Isimakiya, Mahati na Benaaya bari abareeberezi, abarikuhwera Konaniya na Shimei omurumuna, batairweho Hezekiya omugabe, na Azariya omukungu mukuru wa Nyaruju ya Ruhanga.

14Kandi Koore mwene Imuna Omuleevi, omurinzi w'eirembo ry'ahari burugwa-izooba, niwe yaabaire naareeberera emitoijo ei abantu batoijera Ruhanga beekundiire, kutaanisa emitoijo eshorororeirwe Nyakubaho, n'ebitoizirwe ebirikukirira kimwe kuba ebirikwera.

15Edeni, Miniyamiini, Yeshua, Shemaaya, Amariya na Shekaniiya nibo baabaire nibamuhwera n'obwesigwa, omu ndembo z'abahongyerezi, kubaganisiza beene waabo abakuru n'abato ebyokurya omu bwinganisa, nk'oku embu zaabo zirikukuratana

16otabariiremu abaahandiikirwe, nk'oku enzaaro zaabo ziri, abashaija, okwiha aha b'emyaka eshatu y'obukuru n'okweyongyerayo, boona abataahire omuri Nyaruju ya Nyakubaho kukoramu omurimo gwabo gwa buri izooba, baine abakuru baabo, nk'oku embu zaabo zirikukuratana.

17Abahongyerezi bakahandiikwa nibakuratira emiryango ya baishenkurubo. Kandi Abaleevi, okwiha aha b'emyaka makumi abiri y'obukuru n'okukiraho, baahandiikwa nibakuratira emirimo yaabo n'embu zaabo.

18Abahongyerezi bakahandiikwa hamwe n'abaana baabo abato, n'abakazi baabo, na batabani baabo, na bahara baabo, ekimbuuro kyona. Ahabw'okuba, nk'oku baabaire bari abeesigwa, bakaba nibeerinda kuguma bari abantu abeeyereize kimwe.

19Reero ahabwa beene Arooni, abahongyerezi abatwire omu byanga by'aheeru y'endembo zaabo, omu ndembo ezo hakaba harimu abantu nanka na nanka abatoorainwe kugaburira ebyokurya omushaija weena oyetwa ow'omu bahongyerezi; na buri muntu ow'omu Baleevi owaahandiikirwe.

20Hezekiya nikwo yaakozire atyo omuri Buyuda yoona. Yaakora kyona ekirungi, ekihikire, kandi eky'obwesigwa omu maisho ga Mukama Ruhanga we.

21Emirimo yoona ei yaakozire ahabw'obuheereza bw'omuri Nyaruju ya Ruhanga naakuratira eiteeka n'ebiragiro, ainiire Ruhanga ekihika, akagikora n'omutima gwe gwona. Haza yaamuhiira.

← Chapter 30 Jump to: Chapter 32 →