2 Chronicles 35

nyankole

← Chapter 34 Jump to: Chapter 36 →

1Yosiya akakorera Nyakubaho omuri Yerusalemu omugyenzo gw'Okuhingurwaho. Baita abaana b'entaama b'Okuhingurwaho aha kiro kya ikumi na bina eky'okwezi kw'okubanza.

2Yaagarura abahongyerezi aha myoga yaabo, yaabateera omuhimbo kukora emirimo y'obuheereza omuri Nyaruju ya Nyakubaho.

3Reero yaagambira Abaleevi abeegyesa b'Abaisiraeli, kandi abeeheereire kimwe Nyakubaho, ati: Mute eshanduukye erikwera omuri Nyaruju ei Solomooni mwene Daudi omugabe wa Isiraeli yaayombekire. Timwakyetenga kugiheeka aha mabega bundi. Hati muheereze Mukama Ruhanga waanyu, n'abantu be Abaisiraeli.

4Mwetebeekanise omu mbu zaanyu, nk'emiryango ya baashwenkuriimwe oku eri, nimukuratira ebi Daudi omugabe wa Isiraeli na Solomooni omutabani baaragiire.

5Haza mwemerere omu Mwanya Ogurikwera nk'emitwe y'emiryango ya baishenkuru ba beene waanyu abatari Baleevi oku eri. Buri mutwe gugire ekicweka ky'ab'omuryango gwa baishenkuru b'Abaleevi.

6Mpaho mwite abaana b'entaama b'Okuhingurwaho, naimwe mweyeze, mutebeekanisize beene waanyu, bakore nk'oku Nyakubaho yaaragiire, naakigambisa Musa.

7Bwanyima Yosiya yaaha abantu abatari Baleevi abaana b'entaama n'ab'embuzi; boona hamwe obukumi bushatu, naabaiha omu masyo; n'enimi enkumi ishatu, kuba ebitambo by'Okuhingurwaho ahabw'abateeraniire aho boona. Haza ebyo byona akabiiha omu matungo ge.

8Abategyeki be nabo beekundiire baagira ebi baaha abantu n'abahongyerezi n'Abaleevi. Hilikiya, Zekariya na Yehieli, abakungu bakuru aba Nyaruju ya Ruhanga, baaha abahongyerezi abaana b'entaama n'ab'embuzi enkumi ibiri na magana mukaaga, n'enimi magana ashatu kuba ebitambo by'Okuhingurwaho.

9Konaniya na Shemaaya na Netaneeli abarumuna, na Hashabiya na Yeieli na Yozabadi abakuru b'Abaleevi, nabo baaha Abaleevi abaana b'entaama n'ab'embuzi enkumi itaano, n'enimi magana ataano, kuba ebitambo by'Okuhingurwaho.

10Emirimo y'okwetebeekanisa ku yaahwaire, abahongyerezi baayemerera omu myanya yaabo, n'Abaleevi baaza omu bichweka byabo, nk'oku omugabe yaaragiire.

11Baita abaana b'entaama b'Okuhingurwaho. Abahongyerezi baamiisiira eshagama ei baabaire nibaheebwa Abaleevi abarikubaaga ebitambo.

12Baihaho ebitungirwe by'okuba ebitambo bicwekize, baabibaganisa nk'emitwe y'ab'emiryango ya baishenkuru abatari Baleevi oku eri, kubitambira Nyakubaho, nk'oku kihandiikirwe omu kitabo kya Musa. N'enimi baaba nikwo baitwaza.

13Baayotsya abaana b'entaama b'Okuhingurwaho, nk'oku kirikuragiirwa; kandi baateeka ebitambo ebirikwera omu nyabya, n'omu nyungu, n'omu sefuriya; baabitwarira abantu boona abatari Baleevi ahonaaho.

14Bwanyima baayebonereza ebyabo n'eby'abahongyerezi; ahabw'okuba abahongyerezi beene Arooni bakaba nibeehenenga, nibatamba ebitambo bicwekize n'enyama z'ebishaju, okuhitsya obu bwaizire. Abaleevi batyo baayetebeekanisiza ebyabo n'eby'abahongyerezi beene Arooni.

15Abeeshongozi beene Asafu baaza omu mwanya gwabo, nk'oku Daudi na Asafu na Hemani na Yedutuuni omuhanuuzi w'omugabe baaragiire. Reero abakumiirizi baaguma aha marembo, kitarikubeetengyesa kuruga aha murimo gwabo, ahabw'okuba beene waabo Abaleevi bakabatebeekanisiza ebyabo.

16Okwo nikwo omurimo gwona ogw'okuramya Nyakubaho gwatebeekanisiibwe eryo izooba kukora omugyenzo gw'Okuhingurwaho, n'okutambira aha itambiro rya Nyakubaho ebitambo bicwekize, nk'oku omugabe Yosiya yaaragiire.

17Abaisiraeli boona abaabaire bari aho ago magingo baagira obugyenyi bw'Okuhingurwaho, n'obw'Emigaati Etatumbisiibwe, okumara ebiro mushanju.

18Omuri Isiraeli, okwiha omu biro bya Samueli omurangi, hakaba hatakabahoga obugyenyi bw'Okuhingurwaho oburi nk'obwo. Kandi hakaba hatakabahoga bagabe ba Isiraeli abaragizire obugyenyi bw'Okuhingurwaho nk'obwagizirwe Yosiya, n'abahongyerezi, n'Abaleevi, n'Abaayuda boona, n'Abaisiraeli abaabaire bariho, n'abatwire omuri Yerusalemu.

19Omugyenzo gw'Okuhingurwaho ogwo gukakorwa omu mwaka gwa ikumi na munaana ogw'omu busingye bwa Yosiya.

20Yosiya ku yaabaire yaaherize kutebeekanisa ebya Nyaruju byona, Neeko omugabe wa Misiri yaahurura kurwanira orugamba Karikemishi, ahari Eufuraati. Yosiya nawe yaahurura kumurwanisa.

21Kwonka Neeko yaamutumaho entumwa naamugira ati: Iwe mugabe wa Buyuda 'we, nyowe naiwe nitufa ki? Aha murundi ogu tiiwe nyizire kurwanisa, kureka ab'ogundi muryango gw'obugabe nibo ndikwenda kurwana nabo orugamba. Kandi Ruhanga andagiire kukikoresa obwira. Ruga Ruhanga omu kaso, ahabw'okuba ari hamwe naanye; atakaakucwekyereza.

22Kwonka Yosiya yaayanga kumurugaho, yaayehindura okundi, ngu arwane nawe. Tiyaikiriza bya Neeko ebi yaagambisiibwe Ruhanga; kureka yaaza omu rugamba omu ruhita rwa Megido.

23Ab'amata baarasha omugabe Yosiya, nawe nikwo kugambira abagaragwa be ati: Nimuunyiheho, ahabw'okuba naahutaara munonga.

24Abagaragwa be batyo bamwiha omu kigaari kye, bamuta omu kya kabiri, bamutwara Yerusalemu, agwayo; bamuziika omu bituuro bya baishenkuru. Abaayuda boona n'ab'omuri Yerusalemu bamucurira.

25Yeremiya yaahimba ekyeshongoro ky'okutongyeza Yosiya; abashaija n'abakazi boona abeeshongozi baaguma nibakyeshongora nibamutongyeza, okuhitsya n'eri izooba. Ekyo kyeshongoro bakihindura omugyenzo omuri Isiraeli; na mbwenu kihandiikirwe omu by'Okutonzya.

26Endiijo mirimo ya Yosiya, n'ebirungi bi yaakozire naakuratira ebihandiikirwe omu iteeka rya Nyakubaho,

27n'ebi yaakozire okwiha aha kutandika okuhitsya aha muheru, reeba, bihandiikirwe omu Kitabo ky'Abagabe ba Isiraeli n'aba Yuda.

← Chapter 34 Jump to: Chapter 36 →