2 Chronicles 34

nyankole

← Chapter 33 Jump to: Chapter 35 →

1Yosiya akaba omugabe aine emyaka munaana y'obukuru; yaategyekyera emyaka makumi ashatu na gumwe omuri Yerusalemu.

2Akakora ebi Nyakubaho arikusiima, yaatwaza nka Daudi ishenkuru, tiyaateishuka muhanda kutoora oku n'oku.

3Ahabw'okuba omu mwaka gwe gwa munaana ari aha ngoma, akiri omutsigazi, akatandika kuramya Ruhanga wa Daudi ishenkuru. Kandi omu mwaka gwe gwa ikumi n'ebiri, yaiha omuri Buyuda n'omuri Yerusalemu emyanya etunguukire ey'okuramizamu, n'enyomyo z'emirinzi eza ruhangakazi Ashera, n'ebishushani ebisharwirwe n'ebiheesirwe.

4Yaayemererera abarikusheenyagura amatambiro ga Baabaali, yaatemagura amatambiro agu barikwotereraho obubaani agagatungamiire. Yaasheenyagura ebishushani bya Ashera ebisharwirwe n'ebiheesirwe, yaabicwa obusaasingo, yaabwata aha bituuro by'abaabaire babitambira ebitambo.

5Yaataho n'okwokyeza amagufa g'abahongyerezi aha matambiro gaabyo, yaashemeza Buyuda na Yerusalemu.

6Yaakora atyo n'omu ndembo za Manaase, n'eza Efuraimu, n'eza Simeoni, okuhikira kimwe omu za Nafutaali, n'omu byanga ebyacwekire amatongo, ebizeehinguririize.

7Yaasheenyagura amatambiro, yaacwa obusaasingo enyomyo z'emirinzi, n'ebishushani bya Ashera; kandi yaatemagura amatambiro g'okwotereraho obubaani omuri Isiraeli yoona. Bwanyima yaagaruka Yerusalemu.

8Omu mwaka gwa ikumi na munaana ogw'omu busingye bwa Yosiya, aherize kwiha omu ihanga n'omuri Nyaruju eby'obukaafiiri, akoohereza Shafani mwene Azaliya, na Maseya omutegyeki mukuru w'orurembo, na Yoa mwene Yoahazi omuhandiiki w'ebirikubaho, kuhunduuza Nyaruju ya Mukama Ruhanga we.

9Baija, baahika Hilikiya omuhongyerezi omukuru, baamukwatsa empiiha ezareetsirwe omuri Nyaruju ya Ruhanga ezi Abaleevi abakumiirizi b'aha marembo baashoroorize aha Baamanaase, n'Abaefuraimu, n'abandi boona abaatsigaire omuri Isiraeli, n'ab'omuri Buyuda boona, n'aha Baabenyamiini, n'aha batwire omuri Yerusalemu.

10Nabo baazitwarira abakozi abarikureeberera Nyaruju ya Nyakubaho. Abo bakozi b'omuri Nyaruju ya Nyakubaho baazihayo kuzihunduuzisa Nyaruju n'okugigira nsya.

11Baaziha ababaizi n'abombeki kuziguramu amabaare gabaizire, n'embaaho z'okuteerana, n'emitambiko, eby'okukoresa aha byombeko ebi abagabe ba Buyuda baarekire bikasiisikara.

12Haza abo bashaija baakora omurimo n'obwesigwa. Baabataho Yohati na Obadiya Abaleevi b'omuri beene Meraari, na Zekariya na Meshuula ab'omuri beene Kohati, kubareeberera. Abaleevi boona abaabaire nibamanya gye eby'okujumeeza amaraka,

13bakaba nibareeberera abeekorezi, hamwe n'okuhabura abarikukora emirimo y'okuheereza ey'emiringo yoona. Abandi Baleevi baaba abahandiiki na baakaraani, n'abakumiirizi.

14Reero ku baabaire nibaiha omu mabiikiro ga Nyaruju ya Nyakubaho empiiha ezaareetsirwemu, Hilikiya omuhongyerezi yaazoora ekitabo ky'eiteeka rya Nyakubaho eri yaahaire abantu naarirabya ahari Musa.

15Hilikiya agira Shefani omuhandiiki ati: Naazoora omuri Nyaruju ya Nyakubaho ekitabo ky'eiteeka. Atyo Hilikiya akiha Shefani.

16Shefani nawe akireetera omugabe, amugambira n'eby'omurimo, ati: Byona ebi waaragiire abairu baawe, bariyo nibabikora.

17Baihireyo empiiha zoona ezi bashangire omuri Nyaruju ya Nyakubaho, baazikwatsa abareeberezi b'omurimo n'abakozi baagwo.

18Bwanyima Shefani omuhandiiki agambira omugabe ati: Hilikiya omuhongyerezi ampaire ekitabo. Shefani akishomera omugabe.

19Omugabe ku yaahuriire eby'omu iteeka, yaataagura ebi ajwaire.

20Mpaho omugabe aragiira Hilikiya, na Ahikaamu mwene Shafani, na Abudooni mwene Miika, na Shafani omuhandiiki, na Asaaya omugaragwa we ati:

21Nimwirooko, nyowe n'abaatsigaire omuri Isiraeli n'omuri Yuda, mutubuurize Nyakubaho ebikwatiraine n'ebigambo by'omuri eki kitabo ekizoirwe. Manya kashanga ya Nyakubaho empango etuhingamiire, ahabw'okuba baatatenkuriitwe tibarakuratiire ki Nyakubaho yaabagambiire, kuguma nibakora byona ebihandiikirwe omuri eki kitabo.

22Hilikiya n'abu omugabe yaatumire bakagyenda, baahika Huluda omurangikazi, muka Shalumu, mwene Tokuhaati, mwijukuru wa Hasira, omurinzi w'eibiikiro ry'ebijwaro; (obwo ogwo mukazi atwire omuri Yerusalemu omu kirorero kyayo kya kabiri), baabimuteekyerereza.

23Nawe yaabagambira ati: Mukama Ruhanga wa Isiraeli naagira ati: Mugambire omuntu obantumireho, muti:

24Nyakubaho naagira ati: Reeba, niinyija kugwisiza akagwe ogu mwanya n'abagutwiremu, gwitwe emikyeeno ehandiikirwe omu kitabo eki bashomeire omugabe wa Buyuda.

25Ahabw'okuba bakaanyimuura, baatambira baaruhanga abandi ebitambo. Haza bangwisa kubi ahabw'ebi baakozire byona. Nikyo kashanga yangye erikwija kujuumikirira ogu mwanya, kandi terikwija kwikaikanisibwa.

26Kwonka omugabe wa Buyuda obatumire kwehanuuza ahari Mukama, mumugire muti: Mukama Ruhanga wa Isiraeli naagira ati: Aha bikwatiraine n'ebi ohuriire;

27nk'oku oyeteisize oihire aha mutima, okeebundika omu maisho ga Ruhanga, waahurira ebi agambire aha mwanya ogu n'abagutwiremu, okeebundika omu maisho gangye, okataagura ebi ojwaire, okandirira omu maisho, naanye nkuhuriire. Nikwo Nyakubaho arikugira.

28Reeba, ndyakushangisa baashwenkuru, oziikwe omu kituuro kyawe n'obusingye, oteereebeire n'amaisho gaawe ako kagwe karigwera ogu mwanya n'abagutwiremu. Nabo baagyenda, baabiteekyerereza omugabe.

29Ebyo ku byahwaire, Omugabe Yosiya yaatuma aha bakuru b'omuri Buyuda n'omuri Yerusalemu kuteeranira hamwe boona.

30Omugabe yaaza omuri Nyaruju ya Nyakubaho hamwe n'Abaayuda boona, n'abatuuzi b'omuri Yerusalemu, n'abahongyerezi, n'Abaleevi, n'abantu boona abakuru n'abato. Baamutega okutu, yaabashomera eby'omu kitabo ky'endagaano ekyazoirwe omuri Nyaruju ya Nyakubaho.

31Bwanyima yaayemerera omu mwanya gwe, yaaragaanira endagaano omu maisho ga Nyakubaho kuguma naamworobera, naakuratira ebiragiro bye, n'ebi yaahamize, n'ebi yaataireho, n'omutima gwe gwona, n'amagara ge goona, kandi n'okuhikiiriza eby'egyo ndagaano ebihandiikirwe omuri ekyo kitabo.

32Bwanyima yaaragiira abaabaire bateeraniire Yerusalemu boona, n'ab'omu kyanga kya Benyamiini, kugyeemera; n'abatwire Yerusalemu baaba nikwo baatwaza egyo ndagaano ya Ruhanga wa baishebo.

33Kandi Yosiya yaiha ebihagaro byona omu byanga byona eby'Abaisiraeli; yaareetera boona abatwire omuri Isiraeli kuramya Mukama Ruhanga waabo. Omu busingye bwe bwona tibaagira bu barekire kukuratira Mukama Ruhanga wa baishebo.

← Chapter 33 Jump to: Chapter 35 →