2 Chronicles 7

nyankole

← Chapter 6 Jump to: Chapter 8 →

1Solomooni ku yaaherize kushaba, omuriro gwashuuma niguruga omu iguru gwayokyeza kimwe ebitambo bicwekize n'ebindi bitambo; ekitiinwa kya Nyakubaho kyaijura Nyaruju.

2Abahongyerezi tibaabaasa kutaaha omuri Nyaruju ya Nyakubaho, ahabw'okuba ekitiinisa kya Nyakubaho kikagiijura.

3Abaisiraeli boona ku baareebire omuriro nigushuuma, n'ekitiinisa kya Nyakubaho kiri aha mutwe gwa Nyaruju, baajumara aha nsi aha mwariro, baaramya Nyakubaho, kandi baamusingiza bati: Ahabw'okuba ni murungi kandi rukundo ye etahararuka egumaho ebiro byona.

4Bwanyima omugabe n'abantu boona baatambira Nyakubaho ebitambo.

5Omugabe Solomooni yaatamba ekitambo ky'ente obukumi bubiri n'enkumi ibiri; n'entaama akasiriira kamwe n'obukumi bubiri. Omugabe n'abantu boona baahonga batyo Nyaruju ya Ruhanga.

6Abahongyerezi baayemerera omu myanya yaabo, n'Abaleevi nabo baayemerera nibasingiza Nyakubaho, nibateera ebirikujumeeza amaraka ebi Omugabe Daudi yaakozire kusiimisa Nyakubaho, nibeeshongora bati: Ahabw'okuba rukundo ye etahararuka egumaho ebiro byona. Manya Daudi ku yaabaire aba naasingiza Nyakubaho, Abaleevi nibamukwatsa, abahongyerezi abashungaine nabo bateera amakondere, Abaisiraeli boona beemereire.

7Reero Solomooni yaahaasirira ekibuga kya rwagati eky'omu maisho ga Nyaruju ya Nyakubaho, ahabw'okuba aho niho yaatambiire ebitambo bicwekize, n'empongano z'ebishaju ez'okurya kumwe. Manya eitambiro ry'omuringa, eri Solomooni yaakozire, tirirabaasize kuhikwaho ebyo bitambo bicwekize, n'eby'esaano, n'eby'ebishaju.

8Omuri obwo bunaku Solomooni akagira obugyenyi bw'ebiro mushanju hamwe n'Abaisiraeli boona, ekimbuuro kihango munonga, abaarugire hare okwiha aharikutaahirwa omuri Hamati, okuhika aha Kagyera ka Misiri.

9Aha izooba rya munaana baagira oruteerane rukuru, ahabw'okuba bakaba bamazire ebiro mushanju nibahonga eitambiro, n'ebindi mushanju baine obugyenyi.

10Aha kiro kya makumi abiri na bishatu by'okwo kwezi kwa mushanju yaaragiira abantu kugaruka omu maka gaabo. Baagarukayo bashemereirwe, kandi bananukire, ahabwa Nyakubaho kubeera Daudi na Solomooni n'abantu be Abaisiraeli murungi.

11Solomooni yaaheza atyo Nyaruju ya Nyakubaho, na nyaruju y'omugabe. Byona ebi Solomooni yaabaire ateekateekire kukora omuri Nyaruju ya Nyakubaho, n'omuri nyaruju ye ahabwe, yaabiheza gye.

12Bwanyima Nyakubaho akabonekyera Solomooni nyekiro, yaamugira ati: Mpuriire okushaba kwawe, kandi naayetooranira omwanya ogu kuba enju y'okutambiriramu ebitambo.

13Ku ndizibira enjura kugwa, nari ku ndyohereza enzigye kurya ensi zikagikunduura, nainga naayoherereza abantu bangye orufu,

14abo bantu bangye abaanyetererwa baayebundika, baashaba bansherura, kandi baareka emitwarize yaabo mibi, obwo ndyabahurira niinyema omu iguru, mbasaasire ebibi byabo, nkize ensi yaabo.

15Mbwenu niinyija kuguma mpangire amaisho kandi ntegire okutu okushaba okuraagume nikushabirwa omu mwanya ogu.

16Manya hati naatoorana, kandi naahaasirira egi nju kuguma nibandamizamu ebiro byona. Ndyaguma ngitaireho eriisho n'omutima obutwire bwona.

17Kandi iwe ku orintwariza gye, waakora byona ebi nkuragiire, waakuratira ebi naataireho n'ebi naaragiire,

18naanye ndyahamya baijukuru baawe aha kitebe kyawe ky'obugabe, nk'oku naaraganiise Daudi sho, nimmugira nti: Toribura muntu w'okutegyeka Isiraeli.

19Kwonka ku muriteishuka, mwareka kukuratira ebi naataireho n'ebi naaragiire, ebi naabahaire, mwagyenda mwaheereza baaruhanga abandi, mwabaramya,

20naanye ndyarandura Abaisiraeli omu nsi i naabahaire. Egi nju i naahaasirira kuguma nibandamizamu ngyecweho, ngihindure ey'okucuubwaho enfumu n'ekigaaniizo omu banyamahanga boona

21Reero orihika ahari egi nju hati erikurangaanwa, weena oriba naarabaho aryatangaara, ayebuuze ati; Beitu shi Nyakubaho egi nsi n'egi nju akabitura ki?

22Haza bamugarukyemu bati: Manya bakaimuura Mukama Ruhanga wa baishebo, owaabaihire omu nsi ya Misiri, baayehongyera baaruhanga abandi, baabaramya kandi baabaheereza. Nikyo yaabagwisiize ako kagwe koona.

← Chapter 6 Jump to: Chapter 8 →