Deuteronomy 14

nyankole

← Chapter 13 Jump to: Chapter 15 →

1Muri abaana ba Mukama Ruhanga waanyu. N'ahabw'ekyo mutaryesharashara, nobu kwakuba okutega ebyeyera ahabw'omuntu ofiire.

2Manya iwe ori eihanga ririkwera erya Mukama Ruhanga waawe, kandi Nyakubaho ogwo akakutoorana omu mahanga goona ag'omu nsi kuba eihanga rye ahabwe.

3Otarirya ekintu kyona ekirikuzira.

4Mbwenu ezi nizo nyamaishwa ezi murikwikirizibwa kurya; ente, entaama, embuzi,

5empara, esirabo, esa, enzaza, enkorongo, enyemera, ekishwaga, n'ekihondamabaare.

6Kandi nimwikirizibwa kurya enyamaishwa zoona ezaatsizemu ebyara, eziine ebigyere by'ebyara bibiri, kandi ezirikwekuuma.

7Kwonka omu zeekuuma zikaatsamu ebyara, ezi mutarizirya: engamira, akame, n'endirira; ahabw'okuba zo zeekuuma, kwonka tizaatsizemu byara; n'ahabw'ekyo ahariimwe nizizira.

8N'empunu ahariimwe neezira, ahabw'okuba eyatsizemu ebyara, kwonka teyekuuma. Mutarirya enyama yaazo, nobu kwakuba okukora aha mitumbi yaazo.

9Reero ahari byona ebiri omu maizi, ebi nibyo murikwikirizibwa kurya: Nimubaasa kurya ebiine amagaara n'engamba,

10kandi kyona ekitaine magaara na ngamba mutarikirya; n'ekirikuzira ahariimwe.

11Nimwikirizibwa kurya enyonyi zoona ezitarikuzira;

12kwonka ezi timurikwikirizibwa kuzirya; eishamba, empungu-mareere, kanyamushungushungu,

13ekyanira, nyakabaka n'eziri nk'ezo;

14taho ekikoona n'ebiri nka kyo;

15maaya, ekishomabwire, enyangi, akaca, n'eziri nkazo;

16ekihihizi, ekikye n'ekihango, n'enkoko z'omu maizi;

17ekishaayaaya, ekihuhura-bahuta, n'ekiyoyo;

18enkongoro n'oruyongoyongo, n'eziri nk'ezo; taho enkooherwa n'orubaka.

19Kandi ahariimwe ebikooko byona ebiine amapapa nibizira. Bitaririibwa.

20Nimwikirizibwa kurya byona ebiine amapapa, ebitarikuzira.

21Mutarirya ekintu kyona ekyefeereire. Noikirizibwa kukiha omunyaihanga otwire naiwe akirye, nari kukiguza ondiijo munyaihanga. Manya iwe ori eihanga eririkwera erya Mukama Ruhanga waawe. Otariteeka akaana k'embuzi omu mahenehene ga nyinako.

22Otaribura kuha kimwe kya ikumi aha bihingirwe byawe ebyezire omu musiri buri mwaka.

23Kandi oryaguma oriire omu maisho ga Mukama Ruhanga waawe, omu mwanya ogu aritoorana kumuramizamu, kimwe kya ikumi ky'engano zaawe, kya viino yaawe, ky'amajuta gaawe g'emioliva, n'eky'emijigaijo y'obusyo bwawe bw'ente n'obw'entaama; obone kumanya obutoosha kutiina Mukama Ruhanga waawe.

24Kwonka orugyendo ku rurikubeera ruraingwa munonga, otaabaasa kutwara kimwe kya ikumi, haza Mukama Ruhanga okuhaire emigisha ahabw'ogwo mwanya gu yaatooraine kumuramizamu kukuba hare munonga;

25obwo ebyo bintu obihingisemu empiiha. Haza ozizingirire, ozitware omu mwanya gu Nyakubaho ariba atooraine,

26oziguremu ekintu kyona eki orikwenda, nk'ente, entaama, viino, nari eky'okunywa ky'amakuuta, nainga ekindi kyona eki ogombire. Reero okiriire okwo omu maisho ga Mukama Ruhanga waawe, oshemererwe n'ab'eka yaawe.

27Kwonka otaryebwa Omuleevi otwire naiwe omu birorero byawe, ahabw'okuba we tagira naiwe mugabo, nobu ryakuba eitaka ry'obuhunguzi.

28Aha muheru gwa buri myaka eshatu, nabwo ogume oreete kimwe kya ikumi kyona eky'ebi oyerize omuri ogwo mwaka; okibiikye omu birorero byawe.

29Reero Abaleevi, ahabw'okutagira naiwe mugabo nari eitaka ry'obuhunguzi, n'omushuuhuuki n'efuuzi n'omufaakazi abari omuri ebyo birorero byawe, baije barye, baigute; Mukama Ruhanga waawe abone kukuha omugisha omu bintu byona ebi okoresa emikono yaawe.

← Chapter 13 Jump to: Chapter 15 →