Deuteronomy 2

nyankole

← Chapter 1 Jump to: Chapter 3 →

1Bwanyima tukahinduka twaza omu ihamba, tugyemire ogurikuza aha Nyanja Erikutukura, nk'oku Nyakubaho yangambiire, twamara ebiro bingi nitwehinguririza Orushozi Seiri.

2Reero Nyakubaho yangira ati:

3Mumazire omwanya muraingwa nimwehinguririza egi nsi y'enshozi. Hati mukiikame, mutoore aha bukiizi-bwa-bumosho.

4Kandi ogambire abo bantu oti: Muri haihi kuraba omu nsi ya beene waanyu Abaesau, abatwire Seiri, haza nibaija kubatiina. N'ahabw'ekyo mwerinde;

5mutabarwanisa, ahabw'okuba tindikwija kugira ekyanga ky'ensi yaabo eki imwe ndaabahe; nangwa nobu haakuba ah'okuta ekigyere. Manya orwo Rushozi Seiri nkaruha Esau kuba orwe.

6Mubashakyemu ebyokurya by'okurya kandi mubagureho amaizi g'okunywa.

7Ijuka oku Mukama Ruhanga waawe yaahaire omugisha byona ebi waakozire, kandi ku arikumanya orugyendo rwawe orw'omuri eri ihamba rihango. Egyo myaka makumi ana, Mukama Ruhanga waawe agumire naiwe, otaine ki obuzire.

8Tutyo tugumizamu, turaba hangahari beene waitu Abaesau abatwire omuri Seiri; tutoora omuhanda gwa Araba, ogurikuruga Elati na Ezionigeberi. Tukuba, tuha ogurikuza omu ihamba rya Moabu.

9Mpaho Nyakubaho angira ati: Otarahura Abamoabu, nobu kwakuba okubarwanisa orugamba; ahabw'okuba tindikwija kugira ekyanga ky'ensi yaabo eki naakuha kukikubuura. Manya Aari nkagiha beene Looti kuba eyaabo.

10Omu myaka ya kare, Abaemimu bakaba batwireyo, bari eihanga rikuru ry'abantu baingi, baraingwa nk'Abaanaki

11Kandi nk'Abaanaki, nabo bakaba beetwa Abareefa, kwonka Abamoabu baabeeta Abaemimu.

12Abahoori nabo ira bakaba batwire omuri Seiri, kwonka beene Esau baabanyaga, baabacwekyereza, baatuura omu myanya yaabo, nk'oku Abaisiraeli baagizire ensi ei baakubwire, ei Nyakubaho yaabahaire.

13Mbwenu mwimukye, mwambukye akagyera Zeredi. Tutyo twambuka ako kagyera Zeredi.

14Haza emyaka, ei twamazire obu twaruga Kadeshibarinea okuhitsya obu twayambukire ako Kagyera Zeredi, ekahika makumi ashatu na munaana, okuhitsya obu ab'oruzaaro orwo boona abarwani baahwereireho kimwe omu rusiisira, nk'oku Nyakubaho yaabarahiriire.

15Buzimazima omukono gwa Mukama gukabateera kitaraariire kubahwerekyerereza kimwe omu rusiisira okuhitsya obu baahwaireho.

16Abantu boona abarwani ku baafiire baahweraho kimwe,

17Nyakubaho yangira ati:

18Eri izooba noija kucwekanisiza omwatano gwa Moabu ahari Aari.

19Haza ku oraahikye haihi n'omwatano gw'Abaamoni otabarahura nari okubarwanisa, ahabw'okuba tindikwija kugira ekyanga ky'ensi yaabo eki ndaakuhe kukubuura. Manya egyo nsi nkagiha beene Looti kuba eyaabo;

20kandi neemanywa ku eri ey'Abareefa. Abareefa ira niyo baabaire batwire, kwonka Abaamoni baabeeta Abazamuzumi.

21Bakaba bari eihanga rikuru ry'abantu baingi kandi baraingwa nk'Abaanaki. Kwonka Nyakubaho akabacwekyerereza omu maisho g'Abaamoni; banu baatuura omu kyanga byabo;

22nk'oku yaagiriire Abaesau, abatwire omuri Seiri, obu yaacwekyerereza Abahoori omu maisho gaabo, bakabanyaga bakatuura omu byanga byabo n'okuhitsya eri izooba.

23Nikyo kimwe n'Abaavi, abaabaire batwire omu birorero okuhika Gaaza, oku Abakafutoori abaarugire Kafutoori baabacwekyereize, bakatuura omu byanga byabo.

24Nimwimukye mugyende, mwambukye oruhanga rwa Arunooni. Reeba, naabarekurira Sihooni Omuamori, omugabe wa Heshibooni, n'ensi ye. Nimutandikye kugikubuura, mumurwanisize aha rugamba.

25Eri izooba naaza kwitsa amahanga agari ahansi y'eiguru obwoba; gatiine, gahurire enkuru yaawe; haza gateteme, gaganye ahabwawe.

26Ntyo ntuma entumwa ahari Sihooni omugabe wa Heshibooni ebigambo by'obusingye ndi omu ihamba rya Keedemooti, nimmugira nti:

27Onyikirize ndabe omu nsi yaawe. Niinyija kugumizamu omuhanda gwonka, ntakiikamire ahari buryo nari ahari bumosho.

28Onguze ebyokurya by'okurya n'amaizi g'okunywa; kwonka onyikirize ndabisemu amaguru.

29Ongirire nk'oku beene Esau abatwire Seiri, n'Abamoabu abatwire Aari bangiriire, okuhitsya obu ndaayambukye Yorudaani, nkahika omu nsi ei Mukama Ruhanga waitu arikutuha.

30Kwonka Sihooni omugabe wa Heshibooni taratwikiriize kuraba omu nsi ye; ahabw'okuba Mukama Ruhanga waanyu akagangaaza omutima gwe, yaamutizya, ngu abone kumubarekurira, nk'oku kiri na hati.

31Mpaho Nyakubaho angira ati: Reeba, naatandika kukurekurira Sihooni n'ensi ye, tandika kugikubuura, ogituuremu.

32Reero Sihooni ahurura n'engabo ze zoona kututeera, kuturwanisiza Yahaazi.

33Haza Mukama Ruhanga waitu amuturekurira, tumusingura n'abatabani n'abantu be boona.

34Tukwata endembo ze zoona ago magingo, buri rurembo turucwekyerereza kimwe; twita abashaija n'abakazi n'abaana, tutaine ou twatsigaho.

35Kureka amatungo gonka nigo twayetwariire gari eminyago, hamwe n'ebi twanyagire omu ndembo zi twakwatsire.

36Okwiha Aroeri, eri aharikurengyera omu ruhanga rwa Arunooni, n'okwiha aha rurembo oruri omuri orwo ruhanga, okuza kuta Gileadi, tiharabaireho rurembo rwaturemire ahabw'oburaingwa bwarwo. Mukama Ruhanga waitu byona yaabiturekurira.

37Kureka ensi y'Abaamoni yonka niyo mutarahikire haihi, niyo nsi ey'aha myegyeego y'aha mugyera Yaboki hamwe n'endembo z'omu nsi y'ebibungo, kandi n'ahandi hoona ahi Mukama Ruhanga waitu yaatuzibiire.

← Chapter 1 Jump to: Chapter 3 →