Deuteronomy 24

nyankole

← Chapter 23 Jump to: Chapter 25 →

1Omushaija ku aritwara omukazi yaamushwera, kwonka bwanyima ogwo mukazi yaareeba amaisho ga iba gatarikumukunda, naamutura okugira emicwe mibi, iba yaahandiika ebaruha y'okumushenda yaagimukwatsa, yaamubinga omu ka ye, n'onu yaagirugamu,

2mbwenu ogwo mukazi ku araagyende yaaba muk'ondi mushaija,

3haza iba owa kabiri nawe yaamwanga, yaamuhandiikira ebaruha y'okumushenda, yaagimukwatsa yaamubinga omu ka ye, nari iba ogu owa kabiri omushweire yaafa;

4obwo iba ow'okubanza owaamushenzire tarikwikirizibwa kugaruka kumushwera kuba omukazi we; ogwo mukazi yaaherize kusiisikara. Manya ekyo n'ekihagaro omu maisho ga Mukama. Haza ensi ei Mukama Ruhanga waawe arikukuha kuhungura, otarigireetera orubanja.

5Omushaija ku ariba ashweire juba omukazi, atarihurura n'ezindi ngabo kuza aha rugamba, nari okukoresibwa ogundi murimo, kureka amare omwaka gumwe omuka ataine ki arikugyemwa kukora, abone kushemererwa n'omukazi we ou ashweire.

6Hatarigira owaakwatirizibwa orubengo nari eseiso, ahabw'okuba naaba akwatiriziibwe ebirikubaisaho amagara ga mutaahi we.

7Omuntu ku arishangwa naiba mwene waabo ow'omu Baisiraeli, yaamuhindura omuhuuku nari yaamutunda, ogwo mushuma aitwe. Oihe otyo ekibi omuriiwe.

8Waaba okwatsirwe ebibembe, taho omutima kwerinda munonga kukora byona ebi abahongyerezi Abaleevi barikukuhabura, nk'oku naabaragiire. Naimwe mube nikwo mwayerinda kubikora.

9Ijuka eki Mukama Ruhanga waawe yaakozire Miriyamu, obu mwabaire muri omu rugyendo nimuruga Misiri.

10Ku origuza mutaahi waawe ekintu, otaritaaha omu nju ye kwihamu eki araakukwatirize,

11kureka ogume aheeru. Reero ogwo muntu waaguza ekintu, akushangiseyo eki yaakukwatiriza.

12Ku ariba ari omworo, otariraara n'ekintu ki yaakukwatiriza.

13Eizooba ku ririba nirirenga, omugarurire eki yaakukwatiriza, abone kuraara ayeshwekire omunagiro gwe, haza akushabire omugisha, kikuhaise okuhikiirira omu maisho ga Mukama Ruhanga waawe.

14Otariryangatanisa omuheereza waawe oguririirwe, ori omworo kandi omukyene yaaba ari ow'omu beene waanyu, nari ow'omu bashuuhuuki abari omu nsi yaawe omu birorero byawe.

15Omuhe ebihembo bye aha kiro ki yaakoreraho, eizooba ritakarengire. Manya n'omworo, kandi ebihembo bye nibyo ataireho omutima; atakaatakira Mukama naakutabaariza, kikakurugiramu ekibi.

16Baishe b'abaana batariitwa ahabw'abaana baabo. N'abaana batariitwa ahabwa baishebo. Buri muntu aitwe ahabw'ekibi kye ahabwe.

17Otariita orubanja rw'omunyaihanga, nari rw'efuuzi, nainga okukwatirira ekijwaro ky'omufaakazi;

18kureka ogume oijukye ku waabaire ori omuhuuku omuri Misiri, haza Mukama Ruhanga waawe akakwihayo. Naanye nikyo ndikukuragiirira kutwaza otyo.

19Ku orishaaruura ebi ogyesire omu musiri gwawe, haagira omuba gwakwebayo, otarigarukayo kugwakiira, ogurekye gube ogw'omushuuhuuki, efuuzi n'omufaakazi; Mukama Ruhanga waawe abone kukuha omugisha omu mirimo yoona ei orikukora.

20Ku orishoroma ebijuma aha miti yaawe y'emioliva, otarigaruka omu mataagi gaayo. Ebiritsigaramu bibe eby'omushuuhuuki, efuuzi n'omufaakazi.

21Kandi ku orishoroma ebijuma by'emizaabibu omu musiri gwawe, otarigarukamu kuhumba. Ebiritsigaramu bibe eby'omushuuhuuki, efuuzi n'omufaakazi.

22Guma oijukye ku waabaire ori omuhuuku omu nsi ya Misiri. N'ahabw'ekyo nikyo ndikukwehanangiririza kuguma nootwaza otyo.

← Chapter 23 Jump to: Chapter 25 →