Deuteronomy 30

nyankole

← Chapter 29 Jump to: Chapter 31 →

1Ebyo byona ku biriheza kukuhikaho, niyo migisha n'emikyeeno ei naaheza kukworeka, waaguma noobiijukira omu mahanga agu Mukama Ruhanga waawe arikutwaramu,

2waamugarukira iwe, n'abaana baawe, kandi waakora byona ebi arikukuragiira, ebi ndikukugambira eri izooba, n'omutima gwawe gwona, n'amagara gaawe goona,

3Mukama Ruhanga waawe nibwo arikugarurira emigisha, akakugirira esaasi, akakutaaruura omu mahanga goona agu yaakutaataanisiizemu.

4Encuubwa zaawe nobu ziriba ziri okwo ahu eiguru riherera, Mukama Ruhanga waawe aryakutaaruurayo akwiheyo;

5reero akureete omu nsi ei baashwenkuru baakubwire, obone kugitunga, akugogyeeze, kandi akukanyise okukira baashwenkuru.

6Mukama ogwo aryahindura omutima gwanyu n'ogw'ab'oruzaaro rwanyu; mube abe, mubone kumukunda n'omutima gwanyu gwona, n'amagara gaanyu goona; haza mube abahuriire.

7Mukama Ruhanga waawe egyo mikyeeno yoona aryagirunda aha babisha baawe n'abazigu baawe abaabaire nibakuhiiganisa.

8Ogarukye okore ebi arikukugambira; okuratire ebiragiro bye byona ebi ndikukuragiira eri izooba.

9Mukama Ruhanga waawe aryakuha emigisha eshaagaane, ogogyeerere omu bi orikukoresa emikono yaawe, n'omu ruzaaro rwawe, n'omu bizairwe amatungo gaawe, n'omu bi ensi yaawe eyerize. Manya aryashemerererwa okukuha okuganagana, nk'oku yaashemerereirwe okwa baashwenkuru.

10Waaba okuratiire ebi arikukuragiira, orinzire ebiragiro bye n'ebi yaataireho, ebihandiikirwe omuri eki kitabo ky'Ebiragiro, kandi waaba ogarukiire Mukama Ruhanga waawe n'omutima gwawe gwona, n'amagara gaawe goona.

11Manya eki kiragiro ki ndikukuragiira eri izooba tikikugumiire, nobu kwakuba okukuba hare.

12Tikiri mu iguru, ngu ogire oti: N'oha oraatugiireyo, akakitwihirayo, tukakihurira tukakikuratira?

13Kandi tikiri seeri y'enyanja, ngu ogire oti: N'oha oraatwambukire enyanja, akakitureetera, tukakihurira, tukakikuratira?

14Kureka Ekigambo kikuri haihi; kiri omu kanwa kaawe n'omu mutima gwawe, ngu obone kukyorobera.

15Mbwenu reeba, eri izooba naakuta omu maisho amagara n'ebirungi, na rufu n'ebibi.

16Ku oryorobera ebiragiro bya Mukama Ruhanga waawe ebi ndikukuragiira eri izooba, waamukunda, waakora ebi arikuragiira, waakuratira ebiragiro bye ebi yaataireho n'ebi yaaragiire, obwo oryagira amagara kandi okanye; nawe akuheere emigisha omu nsi ei waaza kuzamu kukubuura.

17Kwonka omutima gwawe ku guriteishuka, otaahurira, waatwaririzibwa okuramya baaruhanga abandi n'okubaheereza,

18nimbagambirira kimwe eri izooba, ku buzimazima murihwerekyerera! Timurihangaarira mu nsi ei murikwambuka Yorudaani kuzamu kukubuura.

19Niinyeta eiguru n'ensi kubashinja eri izooba: Ku naakuta omu maisho amagara na rufu, omugisha n'omukyeeno. N'ahabw'ekyo, toorana amagara, obone kuba ohuriire iwe na baijukuru baawe,

20nookunda Mukama Ruhanga waawe, nookora ebi arikukugambira, kandi noomuhamiraho. Manya ekyo nigo magara gaawe n'okuhangaarira omu nsi ei Mukama Ruhanga waawe yaarahiire baashwenkuru, Aburahamu na Isaaka na Yakobo, kubaha.

← Chapter 29 Jump to: Chapter 31 →