Deuteronomy 26

nyankole

← Chapter 25 Jump to: Chapter 27 →

1Ku orihika omu nsi ei Mukama Ruhanga waawe arikukuha kuba obutaka bwawe, waagikubuura, waagituuramu,

2okore emiganuro aha bi oyerize omu misiri yaawe ey'omu nsi yaawe ei Mukama Ruhanga waawe aritoorana kuramizibwamu.

3Oze aha muhongyerezi oriba ari aha murimo omu bunaku obwo, omugire oti: Eri izooba nimpamiza Mukama Ruhanga waawe ku mpikire omu nsi ei yaarahiire baatatenkuriitwe kugituha.

4Mpaho omuhongyerezi akwihe ekiibo omu ngaro, akihuumuze aha nsi omu maisho g'eitambiro rya Mukama Ruhanga waawe.

5Haza ogarukiremu omu maisho ga Mukama Ruhanga waawe, oti: Tatenkuru akaba ari Omuaramu, otaine hu atwire. Yaaza Misiri yaashuuhuukirayo n'abantu bakye, yaahindukirayo eihanga rikuru ery'amaani kandi ery'abantu baingi.

6Abanyamisiri baatwitsa omwaga, baatubonabonesa, baatukoresa emirimo y'obuhuuku.

7Bwanyima twatakira Mukama Ruhanga wa baatatenkuriitwe; yaahurira okutaka kwaitu, kandi yaareeba okubonabona kwaitu n'okufa kubi kwaitu n'okuhatwa.

8Nyakubaho ogwo yaatwiha Misiri n'omukono gwe ogw'amaani kandi ogubangire, naakora ebirikutiinisa munonga n'obumanyiso n'ebirikutangaaza,

9yaatuhitsya omuri ogu mwanya, yaatuha egi nsi erikuhimintika amate n'obwoki.

10Mbwenu, ai Nyakubaho, reeba, naakutoijera emiganuro y'ebi nyerize omu itaka ri wampaire. Reero obite aha nsi omu maisho ga Mukama Ruhanga waawe, omuramizeho.

11Kandi oshemerererwe ebirungi byona ebi akuhaire n'ab'eka yaawe, iwe n'Omuleevi, n'omushuuhuuki otwire naiwe.

12Ku oriheza kuha kimwe kya ikumi ky'ebi oyerize omu mwaka gwa kashatu, oguba omwaka gw'okuha kimwe kya ikumi, kukiha Omuleevi, omushuuhuuki, efuuzi, omufaakazi, ngu bariire omu birorero byawe baigute,

13ogambire omu maisho ga Mukama Ruhanga waawe, oti: Nyihire omu ka yangye ebintu ebihongirwe, naabiha Omuleevi, omushuuhuuki, efuuzi, n'omufaakazi, nk'ebiragiro byawe byona ebi wandagiire oku biri. Tihariho kiragiro kyawe na kimwe eki mpenzire, nobu kwakuba okukyeebwa.

14Tihariho kimwe kya ikumi eki ndiiriire omu rufu, nari okugira eki naihaho ndi otashemeire, nainga okugira eki naagaburiire abazimu. Nkozire ebi iwe Mukama Ruhanga wangye wangambiire, naatwaza nk'oku byona ebi wandagiire biri.

15Mbwenu naga amaisho aha nsi nooyema omu iguru omu butaaho bwawe oburikwera, ohe omugisha eihanga ryawe Isiraeli, n'obutaka bu waatuhaire, nk'oku waarahiire baatatenkuriitwe, ensi erikuhimintika amate n'obwoki.

16Eri izooba Mukama Ruhanga waawe naakuragiira kukuratira ebyatairweho ebyo n'ebyaragiirwe. N'ahabw'ekyo oyezirikye munonga kubihitsya n'omutima gwawe, n'amagara gaawe goona.

17Eri izooba waahamiza Nyakubaho ku ari Ruhanga waawe, ku orikwija kukora ebi arikukuragiira kurinda, ebi yaataireho n'amateeka ge n'ebiragiro bye, kandi n'okubyorobera.

18Na Nyakubaho eri izooba yaakuhamiza ku ori eihanga rye ahabwe, nk'oku yaakuraganiise, kandi ku ori ow'okuguma nookuratira ebiragiro bye,

19ngu abone kukutunguura, okire amahanga goona agu yaahangire, ogakize okusiimwa n'okurangaanwa, n'ekitiinwa, kandi ngu obe eihanga eririkwera ahari Mukama Ruhanga waawe nk'oku yaagambire.

← Chapter 25 Jump to: Chapter 27 →