Ezekiel 40 — nyankole

1Ku twabaire tumazire emyaka makumi abiri n'etaano omu bukwatwa, omwaka nigutandika, aha kiro kya ikumi ky'okwezi kw'okubanza, obwo orurembo rukaba rumazire emyaka ikumi n'ena rukwatsirwe; eryo izooba Nyakubaho akaba ari hamwe naanye,

2yantwara omu nsi ya Isiraeli, ndi omu kworekwa, yanta aha rushozi ruraingwa munonga. Orwo rushozi rukaba ruriho ekintu kirikushusha orurembo kishungaine naanye.

3Ku yaampikizeyo naareeba omuntu orikushusha omuringa, ayemereire omu irembo, aine omurunga gwa furakisi omu ngaro, n'ekibingo ky'okugyeresa.

4Ogwo mushaija yangira ati: Iwe muntu 'we, yetegyereze ebi naaza kukworeka, obitegye amatu, kandi obiteho omutima. Manya ekikureetsire aha n'okubikworeka; ngu ebi oraareebe, obigambire ab'eihanga rya Isiraeli.

5Hakaba hariho orugo rwehinguririize ekibuga kya Nyaruju, kandi oburaingwa bw'ekibingo ky'okugyeresa eki omushaija yaabaire akwaitse, bukaba buri mikono mukaaga, buri gumwe gwine oburaingwa bwa mukono gumwe n'ekita. Atyo yaagyera omuzimba gw'orugo, gwaingana ekibingo kimwe, n'obwemi bwarwo bwaba ekibingo kimwe.

6Bwanyima yaahika aha irembo eririkureeba oburugwa-izooba; ku yainamukire aha matembero gaaryo, yaagyera ekisasi kyaryo eky'aheeru, kyaba ekibingo kimwe omu bucuzi.

7Ebishengye by'aha rubaju, ekibingo kimwe oburaingwa kandi n'ekibingo kimwe obukiika. Ahagati y'ebyo bishengye haabaho omwanya gwa mikono etaano, ekisasi ky'eirembo eky'omunda haihi n'eirembo aharikureebana na Nyaruju, naho haaba ekibingo kimwe.

8Bwanyima yaagyera ekisasi eky'omunda kyaba mikono munaana,

9kandi yaagyera ebiti by'eirembo, byaba mikono ebiri; ekyo kisasi ky'eirembo kikaba kishungaine na Nyaruju.

10Aha rubaju rw'eirembo rya burugwa-izooba hakaba hariho ebishengye bishatu ahari buri rubaju, byona birikwingana, n'ebiti by'eirembo ahari buri rubaju nabyo birikwingana.

11Ekyakuratsireho, yaagyera obuhango bw'eirembo bwaba mikono ikumi, n'obukiika bwaryo bwa mikono ikumi n'eshatu.

12Omu maisho g'ebishengye by'aha mbaju zombi, haabamu omwanya gwa mukono gumwe, ahari buri rubaju, kandi ebyo bishengye by'ahari buri rubaju bikaba biri mikono mukaaga.

13Bwanyima yaagyera eirembo, naiha enyima y'ekishengye kimwe okuhitsya enyima y'ekindi, obukiika bwaho bwaba mikono makumi abiri n'etaano, okuruga aha rwigi okuhika aha rundi.

14Okucwekanisa ekyo kisasi yaagyera mikono makumi abiri. Kandi okwehinguririza ekyo kisasi ky'eirembo kyaba ekibuga.

15Okwiha omu maisho g'eirembo okuta ahu orikutaahira nooza omu kisasi ky'omunda aha muheru gwakyo, haaba mikono makumi ataano.

16Kandi ebishengye by'eirembo bikaba biine amadirisa okubyehinguririza, gafunzire omunda aharikureeba ebiti byago omu bishengye by'omunda; kandi n'ekisasi kikaba kiine amadirisa okukyehinguririza; n'ebiti by'ago madirisa bihunzirwe emikindo.

17Bwanyima yantwara omu kibuga ky'enyima ekyabaire kyehinguririziibwe ebishengye n'omwariro gw'amabaare. Omu maisho g'ogwo mwariro gw'amabaare hakaba harimu ebishengye makumi ashatu.

18Ogwo mwariro gukaba gwekiikwire aha mbaju z'ago marembo, nigwingana nago omu buraingwa; ekyo nikyo kyabaire kiri ekicweka kyariire ekya ifo.

19Yaagaruka yaagyera naiha omu kicweka ky'omunda eky'omu maisho g'eirembo rya ifo, okuhika aha rubaju rw'aheeru orw'ekibuga ky'omunda, kyaba mikono igana.

20Kandi yaanyebembera naatoora aha bukiizi-bwa-bumosho, ei eirembo ry'ekibuga ky'enyima ryabaire nirireeba, yaagyera oburaingwa bwakyo n'obukiika bwakyo.

21Ebishengye bishatu by'aha rubaju rw'eryo irembo, na bishatu aha rundi rubaju, ebiti byaryo n'ekisasi kyaryo, byona bikaba nibingana n'eby'eirembo ry'okubanza. Oburaingwa bwaryo bukaba mikono makumi abiri n'etaano.

22Amadirisa gaaryo, ekisasi kyago, n'amahunde gaaryo g'emikindo bikaba nibingana n'eby'eirembo eririkureeba burugwa-izooba. Kandi amatembero agaabaire nigatemberwaho kurihikaho gakaba gari mushanju, n'ekisasi kyaryo kiri omunda.

23Ahashungaine n'eirembo ery'aha bukiizi-bwa-bumosho hakaba hariho eirembo eririkutaaha omu kibuga ky'omunda, nk'oku kiri aha rubaju rwa burugwa-izooba. Atyo yaagyera okwiha aha irembo okuta aha rindi, haaba mikono igana.

24Kandi akaanyebembera nantooza aha bukiizi-bwa-buryo; ahari orwo rubaju hakaba hariho eirembo; yaagyera ebiti byaryo n'ekisasi kyaryo byaingana n'ebindi.

25Omunda yaaryo n'omu kisasi kyaryo hakaba heehinguririziibwe amadirisa agarikwingana n'ag'omu gandi marembo. Oburaingwa bwaryo bukaba buri mikono makumi ataano, n'obukiika bwaryo buri mikono makumi abiri n'etaano.

26Kandi amatembero agaabaire nigatemberwaho kurihikaho gakaba gari mushanju; ekisasi kyaryo ky'omunda, n'ebiti byaryo bikaba bihunzirweho emikindo, gumwe aha rubaju rumwe n'ogundi aha rundi.

27Aha rubaju rw'obukiizi-bwa buryo obw'ekibuga eky'omunda hakaba hariho eirembo; yaagyera okuruga aha irembo okuhika aha rindi ery'aha bukiizi-bwa-buryo, haaba mikono igana.

28Bwanyima yandabya omu irembo ry'aha bukiizi-bwa-buryo, yantaasya omu kibuga ky'omunda, yaagyera eirembo, ryaingana n'agandi.

29Ebishengye by'aha mbaju zaaryo, ebiti n'ekisasi kyaryo, bikaba nibingana n'ebindi; kandi omuri eryo irembo n'omu kisasi kyaryo hakaba harimu amadirisa agarikwingana n'agandi okwehinguririza. Oburaingwa bwaryo bukaba mikono makumi ataano, n'obukiika bwaryo bwaba mikono makumi abiri n'etaano.

30Kandi hakaba hariho ebisasi okwehinguririza, oburaingwa bwabyo bukaba buri mikono makumi abiri n'etaano, n'obukiika bwabyo buri mikono etaano.

31Ekisasi kikaba nikireeba ekibuga ky'aheeru, ebiti byaryo bihunzirweho emikindo, n'amatembero garikutemberwaho kurihikaho gari munaana.

32Yaagaruka yantaasya omu kibuga ky'omunda aha rubaju rwa burugwa-izooba, yaagyera eirembo ryaho, ryaba ery'orugyero rumwe n'agandi.

33Ebishengye byakyo by'aha rubaju, ebiti byaryo, n'ekisasi kyaryo byona bikaba nibingana n'ebindi; kandi omuri eryo irembo n'omu kisasi kyaryo hakaba hakiikiizemu amadirisa. Oburaingwa bwaryo bukaba buri mikono makumi ataano, n'obukiika bwaryo buri mikono makumi abiri n'etaano.

34Ekisasi kikaba nikireeba ekibuga ky'aheeru, ebiti byaryo bihunzirweho emikindo, n'amatembero garikutemberwaho kurihikaho gari munaana.

35Bwanyima yantwara aha irembo ery'aha bukiizi-bwa-bumosho, yaarigyera, ryaingana n'agandi.

36Ebishengye byaryo eby'omu mbaju, ebiti byaryo, n'ekisasi kyaryo, byaingana n'ebindi, haza ryona rikaba rikiikiiziibwemu amadirisa. Oburaingwa bwaryo bukaba mikono ataano, n'obukiika bwaryo bwaba mikono makumi abiri n'etaano.

37Ekisasi kikaba nikireeba ekibuga ky'aheeru, ebiti byaryo bihunzirweho emikindo, n'amatembero garikutemberwaho kurihikaho gari munaana.

38Hakaba hariho ekishengye, eki omuryango gwakyo gwabaire nigureeba omu kisasi ky'eirembo, omu baabaire boogyeza ekitambo ky'okucwetsya.

39Omuri ekyo kisasi hakaba harimu emeeza ina, ibiri aha rubaju rumwe n'ezindi ibiri aha rundi. Ezo meeza nizo baabaire baitiraho enyamaishwa z'ebitambo eby'okucwetsya, eky'empongano n'eky'ekarabo.

40Kandi aheeru y'ekisasi ahu orikutaahira nooza omu irembo ry'aha bukiizi-bwa-bumosho, hakaba hariho emeeza ibiri, n'aha rundi rubaju ezindi ibiri.

41Aha rubaju rw'omunda orw'eryo irembo hakaba hariho emeeza ina, zoona munaana ziri ez'okwitiraho enyamaishwa z'ebitambo.

42Hakaba hariho n'ezindi meeza ezibaizirwe omu mabaare, ez'okutaho ebitambo by'okucwetsya; oburaingwa bwazo bukaba buri mukono gumwe n'ekicweka, obukiika bwazo mukono gumwe n'ekicweka, n'obwemi bwazo buri mukono gumwe. Ezo meeza zikaba ziteebwaho ebintu by'okwitsa enyamaishwa z'ebitambo.

43Kandi omuri ekyo kisasi hakaba hateereiremu ebyoma by'okuhanikaho by'oburaingwa bw'ekita kimwe, bikiikiize omunda. Ezo meeza nizo baabaire bataho enyama z'okutoija.

44Bwanyima yaanyiha aheeru, yantaasya omu kibuga ky'omunda ekyabaire kirimu ebishengye, kimwe aha rubaju rw'eirembo ry'aha bukiizi-bwa-bumosho nikireeba aha bukiizi-bwa-buryo, n'ekindi aha rubaju rw'eirembo ry'aha bukiizi-bwa-buryo, nikireeba aha bukiizi-bwa-bumosho.

45Yangira ati: Eki kishengye ekirikureeba aha bukiizi-bwa-buryo, n'eky'abahongyerezi abaheereza omuri Nyaruju.

46Kandi ekishengye ekirikureeba aha bukiizi-bwa-bumosho n'eky'abahongyerezi abaheereza aha itambiro; abo nibo beene Zadoki ab'oruganda rwa Leevi, abarikwikirizibwa bonka kuhika haihi Nyakubaho kumuheereza.

47Atyo yaagyera ekyo kibuga, kyaba mikono igana oburaingwa na mikono igana obukiika, embaju zaakyo zoona ina zaingana; kandi eitambiro rikaba riri omu maisho ga Nyaruju.

48Bwanyima yantwara aha kisasi kya Nyaruju, yaagyera enyomyo zaakyo zombi, ey'aha rubaju rumwe yaaba mikono etaano, n'ey'aha rundi rubaju nayo yaaba mikono etaano. Obuhango bw'eirembo bwaba mikono ikumi n'ena, n'ebisiika by'omu rubaju rw'eirembo byaba mikono ashatu buri rubaju.

49Oburaingwa bw'ekyo kisasi bukaba mikono makumi abiri, n'obukiika bwakyo bwaba mikono ikumi n'ebiri, n'amatembero agarikutemberwaho kukihikaho gari ikumi. Kandi aha rubaju rw'ebiti by'eirembo hakaba hariho enyomyo emwe, n'endiijo aha rundi rubaju.