Hosea 1

nyankole

Jump to: Chapter 2 →

1Eki n'ekigambo ki Nyakubaho yaagambiire Hosea mwene Beeri, omu busingye bwa Uziya, n'obwa Yotamu, n'obwa Ahazi, n'obwa Hezekiya, abagabe ba Yuda; n'omu busingye bwa Yeroboamu mwene Yoashi, omugabe wa Isiraeli.

2Mukama ku yaatandikire kugambira Hosea ebi yaamutumire, yaamugira ati: Irooko oyeshwerere omukazi maraaya, omuzaareho abaana maraaya, ahabw'okuba egi nsi erengyesereize yaanyimuura.

3Nawe nikwo kugyenda akashwera Gomeri muhara wa Dibulaimu, akabaka enda, akamuzaarira omutabani.

4Reero Mukama yaamugira ati: Mwete eiziina Yezereeli, ahabw'okuba hatsigaire akaanya kakye nkafubira ab'eka ya Yehu, nimbatura abantu bu yaitiire Yezereeli; ntyo mmareho obugabe bw'enju ya Isiraeli;

5kandi eryo izooba mpendere Abaisiraeli obuta omu ruhanga rwa Yezereeli.

6Bwanyima ogwo mukazi yaatwara endiijo nda, yaazaara omuhara. Mukama yaamugira ati: Mwete eiziina Lo-ruhama, amakuru ngu, Nyakwangwa; ahabw'okuba tindigaruka kugirira ab'Enju ya Isiraeli esaasi, nobu kwakuba okubasaasira.

7Kwonka ndyagirira ab'enju ya Yuda esaasi, Nyowe Mukama Ruhanga waabo mbajune, ntabajuniise buta, rurara, rugamba, mbaraasi, nobu baakuba abazigyenderaho.

8Ogwo mukazi ku yaacuukize Nyakwangwa, yaabaka endiijo nda, yaazaara omutabani.

9Mukama yaagira ati: Omwete eiziina Lo-ami, amakuru ngu, Ti-bantu-bangye; ahabw'okuba timuri bantu bangye; naanye tindi Ruhanga waanyu.

10Kwonka omubaro gw'Abaisiraeli guryaingana n'omusheenyi gw'aha nyanja, ogutarikubaasa kurengwa nobu kwakuba okubarwa. Kandi omu mwanya gu baagambiriirwemu ngu “Timuri bantu bangye”, nigwo barigambirirwamu ku bari Abaana ba Ruhanga Ohuriire.

11Reero Abaayuda n'Abaisiraeli baryateeranirwa hamwe, beeteereho omutegyeki omwe; bwanyima bainamukye, barugye omuri egyo nsi, ahabw'okuba eizooba eryo riryaba rikuru Yezereeli.

Jump to: Chapter 2 →