Hosea 7

nyankole

← Chapter 6 Jump to: Chapter 8 →

1Ku mba niinyenda kutambira Isiraeli, ebibi by'Abaefuraimu n'ebihagaro ebi Abasamariya barikukora byeruuka; ahabw'okuba bagobya, abashuma bafumura amaju, n'ebigombe by'abasikuzi bitaahirira abantu aheeru.

2Haza tibarikuteekateeka ku ndikwijuka ebibi ebi bakora. Mbwenu ebi barikukora bibaturikire oku n'oku, timbuzire kubireeba.

3Ebibi byabo nibyo barikukoresa kugwisa gye omugabe, n'obugobya bwabo nibwo barikwejunisa kwekundisa abategyeki.

4Boona n'enshambani, Bari nk'ekyoma kirikwotsya, ekiteekwamu emigaati: eki omuteeki waayo ateenegyezemu muriro, atakakanzire isyanga n'akaritumbisa.

5Aha kiro ky'omugabe, ogwo mugabe n'abategyeki be bakabatiiha amaarwa, baasinda, reero omugabe yaatezya emikono n'abagaaniiza.

6Manya emitima yaabo neebugumwamu enaama mbi, nk'ekyoma kirikuteeka emigaati. Ekiniga kyabo kiraara nikyaka mpora-mpora, omu kasheeshe kyaka nk'omuriro gurikubuguma.

7Boona oku baingana nibootsya nk'enyungu eteeka, kandi nibashonshomera abategyeki baabo. Abagabe baabo boona bagwire, tihariho n'omwe omuribo orikuntakira.

8Abaefuraimu nibeejwanzya n'abanyamahanga. Abaefuraimu ni nk'omugaati ogutahindwirwe.

9Abanyamahanga nibabamaramu amaani, kwonka tibarikukimanya. Enju zibabarangaine omu mutwe, kwonka tibarikukimanya.

10Okwetunguura kw'Abaisiraeli nikubashinja. Ahabw'ebyo byona ebibabaireho tibangarukiire nyowe Mukama Ruhanga waabo, nobu kwakuba okunsherura.

11Abaefuraimu ni nk'enkombe efiire omutima etaine bwengye. Nibeeta Abanyamisiri kubaha emikono, bairukangira Asiriya.

12Ku bariba nibagyenda, ndyabarengyezaho ekigoye kyangye, mbahanure nk'enyonyi z'omu mwanya, mbafubire ahabw'ebibi bi barikukora.

13Baryakareeba ahabw'okuba barazire, bantsigaho! N'ab'okucwekyerera ahabw'okuba bangomeire! Nkaabacungwire, kwonka nibangambaho ebitari by'amazima.

14Tibarikuntakira baihire aha mutima baaba nibaboroogyera aha bitanda byabo. Nibeebonabonesa ahabw'ebyokurya by'omujuma na viino; haza bantsigaho.

15Nobu ndaabe naabatendekire, nkaha emikono yaabo amaani, kwonka baanyiniire enaama mbi.

16Beehongyera Baali, baba nk'obuta burikureebya. Abategyeki baabo baryaitwa rurara ahabw'okugambisa amaryo. Haza ekyo kibareetere okushekyeererwa omu nsi ya Misiri.

← Chapter 6 Jump to: Chapter 8 →