Hosea 11

nyankole

← Chapter 10 Jump to: Chapter 12 →

1Isiraeli ku yaabaire akiri omwana, nkamukunda; naamweta mutabani wangye, obu aruga Misiri.

2Kwonka ei naagarukiire kubeeta, niyo baagarukiire kundugaho. Baaguma nibatambira Baabaali ebitambo, nibooterera obubaani ebishushani birikuramibwa.

3Haza niinye naayegyeise Abaefuraimu okugyenda, nkabakiikira omu mikono; kwonka tibaramanyire ku niinye naabatambiire.

4Nkabeebembera mbakomeise emigoye y'esaasi n'emirunga ya rukundo; naababeera nk'orikuyuzya omugamba aha ibega. Nainama, naabagaburira.

5Kwonka n'ab'okugaruka omu nsi ya Misiri, Omuasiriya abe omugabe waabo; ahabw'okuba bangire kungarukira.

6Endembo zaabo ziryacurikirwa rurara, ecwekyereze empimbi z'amarembo gaabo, ebamare omu bigo byabo.

7Abantu bangye bahigire akabaju kundugaho. Nikyo babeereire ab'okuteebwaho omugamba, kandi tihaine origubaihaho.

8Iwe Efuraimu 'we, nimbaasa nta kukureka? Iwe Isiraeli, nimbaasa nta kukuhayo? Nimbaasa nta kukuhindura nka Aduma! Nimbaasa nta kukugira nk'oku naagizire Zeboimu? Omutima ka niguunyangira, esaasi yangye ekeeyongyera kuba nyingi!

9Tindikwija kukora nk'ekiniga kyangye kingi oku kiri. Tindikugaruka kucwekyereza Efuraimu, ahabw'okuba ndi Ruhanga, tindi muntu. Ndi Orikwera omuriimwe, kandi tindiija kucwekyereza.

10Baryakuratira Nyakubaho, ku aritsinda nk'entare. Buzimazima aryatsinda, abaana be baije nibatetema nibaruga oburengyerwa-izooba.

11Baryaija nibatetema nk'enyonyi nibaruga Misiri, bari nk'enkombe nibaruga omu nsi ya Asiriya. Haza mbagarure omu maka gaabo, nikwo Nyakubaho arikugira.

12Efuraimu anyehinguririziise ebishuba, abantu bangye, Isiraeli baanyehinguririzisa obugobya; kwonka Yuda naakimanywa Ruhanga, kandi n'omwesigwa ahari Nyakwera.

← Chapter 10 Jump to: Chapter 12 →