Hosea 13

nyankole

← Chapter 12 Jump to: Chapter 14 →

1Efuraimu ku yaabaire agamba, abantu batetema; ahabw'okuba akaba ari omuntu mukuru munonga omuri Isiraeli. Kwonka ku yaayereeteire orubanja ahabwa Baali, yaafa.

2Kandi na hati nibakyeyongyera kukora ebibi, beeheeshera ebishushani biyagiibwe, ebirikuramibwa ebikozirwe n'obwengye omu feeza zaabo, byona nibikorwa abanyamyoga. Haza bagira bati: Nimubitambire ebitambo! Ka n'eihano abantu kunywegyera enyana!

3Nikyo baribeera nk'oruho rw'omu kasheeshe, nari nk'orume orutsya bukiri kare. Babe nk'ebishushunga ebituntumurwa omuyaga aha mbuga, nari nk'omwika gurikuraba ahaiguru omu kihengyere ky'enju.

4Niinye Mukama Ruhanga waawe owaakwihire omu nsi ya Misiri. Toine Ruhanga ondi ou orikumanya, kureka nyowe, kandi ahatari nyowe, tihariho ondiijo mujuni.

5Niinye naakureebereire ori omu ihamba, omu nsi y'omushana mwingi.

6Kwonka abantu baawe ku baariire baiguta, baahaaga, emitima yaabo yaayetunguura; baanyebwa.

7Nikyo ndibabeerera nk'entare, nkabagwera aha muhanda nk'engwe.

8Ndyabagurukira nk'edubu ei baayaka ebyana byayo, mbataagure ebifuba; kandi mbashonshomere nk'entare, nk'oku enyamaishwa enshaarizi yaakubataagura.

9Iwe Isiraeli 'we, ku ndikucwekyereza, n'oha orikujuna?

10Mbwenu omugabe waawe ow'okukujuna ari nkahi? Abategyeki baawe boona ab'okukurwanaho bari nkahi, abu waagizire oti: Mpa omugabe n'abategyeki?

11Nkakuha abagabe ngwirwe kubi, mbwenu naabatwara nyine ekiniga kingi.

12Ebicumuro bya Efuraimu bikomeirwe hamwe, n'ebibi bye bibiikirwe.

13Omwana ku aza kuzaarwa, nyina agira ebisha. Kwonka aba atakagizire bwengye, ahabw'okuba aba atakashuuriize kuruga omunda.

14Mbwenu niinye ndibaiha okuzimu owa Nyamuteza? Nari niinye ndibajuna Rufu? Iwe Rufu, enfu zaawe zirahi? Iwe Kuzimu 'we, okucwekyereza kwawe kurahi? Nyowe tinkiine ku ndaabagirire esaasi.

15Nobu yaakukurira gye omuri beene ishe, omuyaga gwa Nyakubaho ogw'oburugwa-izooba guryaija niguruga omu ihamba, gwomye enshuro ze zoona, emigyera ye ekarangatane; gumare omu mabiikiro ge ebintu bye byona eby'obuguzi bwingi.

16Samariya eryafubirwa, eturwe okugomera Ruhanga waayo. Abantu baayo baryaitwa rurara; abeereere baabo bateerwe ahansi bacwagurikye; n'abakazi baabo abaine enda bashaturwe.

← Chapter 12 Jump to: Chapter 14 →