Hosea 4

nyankole

← Chapter 3 Jump to: Chapter 5 →

1Imwe Baisiraeli 'mwe, nimuhurire ekigambo kya Mukama, ahabw'okuba aine eki arikufa n'abatuuzi b'omu nsi egi. Omuri egi nsi tiharimu bwesigwa nari embabazi, nobu kwakuba okumanya Ruhanga;

2kureka harimu okurya endahiro, okubeiha, okwita, okwiba n'okushambana. Barengyesereize kukora ebibi, okwita abantu nikukuratwa okundi.

3N'ahabw'ekyo ensi neecura. Abagitwiremu boona n'enyamaishwa, n'enyonyi z'omu kaabunga binyangaraire; nangwa n'ebyenyanja by'omu nyanja bihwerekyereire.

4Kwonka imwe bahongyerezi 'mwe, hatagira owaatongana, nainga owaatabaaza, ahabw'okuba niimwe ndikutonganisa.

5Muryateera entsibo nyomushana, n'abarangi bagiteere naimwe nyekiro; naanye ncwekyereze baanyokoimwe.

6Manya abantu bangye nibacwekyerera ahabw'okutammanya; ahabw'okuba mukanga kuunyikiriza. Mbwenu naanye naayanga ku muba abahongyerezi bangye. Kandi nk'oku mwayebirwe eby'omu iteeka ryangye, naanye niinyija kwebwa abaana baanyu.

7Nk'oku ei baagarukiire kukanya niyo baagarukiire kuncumuraho, naanye ekitiinwa kyabo ndyakihindura ekihemu.

8Manya nibatungwa ebibi by'abantu bangye; baruruuhira ebicumuro byabo.

9Nikyo naanye ndinganisiza abantu n'abahongyerezi; nkabafubira ahabw'emitwarize yaabo, nkabatura ebi baakozire.

10Baryarya, kwonka tibarikanya; ahabw'okuba nyowe Nyakubaho bakantsigaho, baahampuka.

11Viino y'omutahe ebuza abantu okwetegyereza.

12Abantu bangye baraguza aha biti, enkoni zaabo nizo zibaragurira. Manya omutima gw'okuhampuka gukabahabisa, baatsigaho Ruhanga waabo, baaraaya.

13Batambira ebitambo aha mitwe y'enshozi, booterera obubaani omu bibungo; ahansi y'omuvule n'omu mishebeya n'omu misisa, ngu ahabw'okugira ekicuucu kirungi. Nikyo bahara baanyu barikuhampukira, abagore baanyu bakashambana.

14Tindikwija kufubira bahara baanyu baahampuka, nari abagore baanyu baashambana; ahabw'okuba abashaija nabo beekiika aha rubaju na baamaraaya; batamba ebitambo na baamaraaya b'emigyenzo y'ediini. Nikyo eihanga eritarikwetegyereza ririhwerekyererera,

15Iwe Isiraeli nobu oraahampukye, reka Yuda erekye kugira orubanja. Otariza Giligaali, nobu kwakuba okwinamuka Betaaveni; kandi otarirahira oti: Nindahira Nyakubaho!

16Nk'enyana etarikutsimbuka, na Isiraeli nikwo eri empiga. Mbwenu shi Nyakubaho naabaasa kubariisa nk'abaana b'entaama omu iriisizo ryeshanzire?

17Efuraimu eyehongyeire ebishushani birikuramibwa, nimugirugyeho.

18Bo n'ekigombe ky'abasinzi abeehaireyo kuraaya. Bakunda okuhemuka okukira okuheebwa ekitiinwa.

19Omuyaga guryabatwarira omu mapapa gaagwo, bahemukye ahabw'ebitambo byabo.

← Chapter 3 Jump to: Chapter 5 →