Hosea 5

nyankole

← Chapter 4 Jump to: Chapter 6 →

1Imwe bahongyerezi 'mwe, nimuhurire eki! Imwe bantu ba Isiraeli 'mwe, muteho omutima! Naimwe ab'enju y'omugabe, mutegye okutu. Manya niimwe muri ab'okucwerwa orubanja; ahabw'okuba ahari Mizipa mubaire omutego, n'ahari Tabora mwaba ekigoye kitegire.

2Batimbire Shitimu obusya buraingwa, kwonka boona ndyabafubira.

3Efuraimu ninkumanya, naiwe Isiraeli tonyesherekire. Mbwenu iwe Efuraimu oraayire, Isiraeli yaasiisikara.

4Ebi barikukora tibirikubareka kugarukira Ruhanga waabo, ahabw'okuba omutima gw'okuraaya gubarimu, tibarikumanya Nyakubaho.

5Amaryo ga Isiraeli nigamushinja, Efuraimu ekibi kye kiryamuteeza entsibo, agwe, na Yuda aryateera nabo entsibo.

6Baryagyenda n'ebitambo by'amasyo g'ente n'ag'entaama kusherura Nyakubaho; kwonka tibarimubona, ahabw'okuba abeecwireho.

7Bareebize Nyakubaho, baazaara abaana abanyamahanga. Nikyo baraacwekyererezibwe n'emisiri yaabo okwezi kwaboneka.

8Muteerere enzamba omuri Gibea, n'eikondere omuri Raama. Muteerere enduuru Betaaveni; muhuruze Benyamiini.

9Efuraimu n'ey'okuhinduka eitongo aha izooba ry'okufubirwa. Nindangira enganda za Isiraeli ekifubiro ekitaribura kuzihikaho.

10Abategyeki ba Yuda babaire nk'abantu abarikukuura obumanyiso bw'omwatano. Nikyo ndaaboohororeho kashanga yangye nk'amaizi.

11Efuraimu neehata, esingyeera eby'oburyo neekuratiririra eryo ebitaine mugasho.

12Nikyo mbeereire Efuraimu nk'ekiyenje, nkabeera ab'omuryango gwa Yuda nk'emungu.

13Efuraimu ku yaareebire arwaire, na Yuda yaareeba ahutaire, Efuraimu yaaza Asiriya, yaatuma aha mugabe Yarebu. Kwonka tarikubaasa kubatambira nari kubakiza obuhuta bwanyu.

14Manya Nyowe Efuraimu niinyija kugibeera nk'entare; ab'omuryango gwa Yuda mbabeere entare nto. Nyowe nyenka niinyija kubataagataagura, reero nyegyendere. Mbatware, habure owaabajuna.

15Bwanyima nyegarukire omu butaaho bwangye, okuhitsya obu baryemera ekicumuro kyabo, bakandonda. Haza omuri ezo naku zaabo bansherure.

← Chapter 4 Jump to: Chapter 6 →