Hosea 6

nyankole

← Chapter 5 Jump to: Chapter 7 →

1Abantu nibagira bati: Nimwije tugarukire Mukama, ahabw'okuba niwe atuhutaize, kandi niwe araatutambire; niwe atuteire kandi niwe araatushembe.

2Ku haraahingureho ebiro bibiri naija kutuhimbuura, aha kiro kya kashatu atuzoore; tubone kuguma turi abahuriire omu maisho ge.

3Ka tumanye Mukama, tugumizemu kumumanya; ahabw'okuba okwija kwe ni nk'omushekye, tikuribura. Aryatwijaho nk'orutoonyerera nari nk'enjura ya Katumba eitirira ensi.

4Iwe Efuraimu 'we, mbwenu nkugire nta? Iwe Yuda, nkugire nta? Rukundo yaawe ni nk'ekicu ky'omu kasheeshe; ni nk'orume orutsya bukiri kare.

5Nikyo mbooherereize abarangi kubataagataagura, nkabacwekyerezesa ebigambo by'akanwa kangye; kandi emicwere yangye y'emanja eryaija nk'omushana.

6Manya eki nyenda ni rukundo etahararuka, bitari bitambo; kandi okumanya Ruhanga nikukira ebitambo bicwekize.

7Kwonka bakaita endagaano nka Adamu, bandeebya.

8Gileadi n'orurembo rw'enkozi z'ebibi, orwijwire ebirari by'eshagama.

9Nk'oku abasikuzi bagwera omuntu n'abahongyerezi nikwo beeteerana, bakaitira busha abantu aha muhanda gurikuza Shekemu. Eego, buzimazima ekyo kibi ky'obwinazi nibakikora.

10Ndeebire ekihagaro omu bantu bangye aba Isiraeli ahabw'okuba okwo niyo obwamaraaya bwa Efuraimu buri; Isiraeli esiisikaire munonga.

11Naiwe Yuda nkuteereireho obunaku bw'okukugyesha, ku ndiba ningarura abantu bangye aha buteeka.

← Chapter 5 Jump to: Chapter 7 →