Zechariah 1

nyankole

Jump to: Chapter 2 →

1Omu kwezi kwa munaana, okw'omu mwaka gwa kabiri, ogw'omu busingye bwa Dariyo, Nyakubaho akagambira Zekariya, mwene Berekiya, mwijukuru wa Ido omurangi ati:

2Nyowe Nyakubaho nkagwerwa kubi munonga baashwenkuriimwe.

3N'ahabw'ekyo obagambire oti: Mukama ow'amahe naagira ati: Nimungarukire, naanye mbagarukire. Nikwo Mukama ow'amahe arikugira.

4Mutaba nka baashwenkuriimwe abu abarangi ba ira baabaire beehanangiriza nibaamuza bati: Mukama ow'amahe naagira ati: Murekye emitwarize yaanyu emibi, n'ebibi bi murikukora; kwonka tibarahuriire, nobu kwakuba okuunyetaho. Nyakubaho nikwo arikugira.

5Mbwenu baashwenkuriimwe barahi? Kandi abarangi bagumaho ebiro byona?

6Kwonka shi ebi naagambire n'ebi naataireho; ebi naaragiire abagaragwa bangye abarangi tibirahikire hari baashwenkuriimwe? Batyo bakeeteisa nibagira bati: Nk'oku Mukama ow'amahe ayenzire kututwaza nk'emitwarize yaitu n'ebi turikukora oku biri, nikwo atutwarize.

7Aha kiro kya makumi abiri na bina eky'okwezi kwa ikumi na kumwe, nikwo kwezi kwa Shebati, omu mwaka gwa kabiri ogw'omu busingye bwa Dariyo, Nyakubaho akagambira Zekariya, mwene Berekiya, mwijukuru wa Ido, nawe yaagira ati:

8Nyekiro ku ngiire kugira nti, naareeba omushaija atembire embaraasi erikutukura. Abaire ayemereire ahagati y'emiti y'emirama omu ruhanga; kandi enyima ye hariyo embaraasi zirikutukura, n'ez'obugondo n'ezirikwera.

9Ntyo mbuuza nti: Nyakubaho wangye, ebyo ni ki? Maraika, owaabaire naagamba naanye angira ati: Ka nkugambire eki birikumanyisa.

10Omushaija owaabaire ayemereire ahagati y'emirama, nikwo kungarukamu ati: Abo nibo Nyakubaho atumire kugyendagyenda omu nsi.

11Nabo baagarukamu maraika wa Nyakubaho owaabaire ayemereire ahagati y'emirama, bati: Tugyendagyenzire omu nsi, twashanga yoona ecureire, etuurize.

12Bwanyima maraika wa Nyakubaho agira ati: Ai Mukama ow'amahe, oryahitsya hi okutagirira mbabazi Yerusalemu n'endembo za Buyuda, ebi omazire emyaka makumi mushanju oiniire ekiniga kingi?

13Mpaho Mukama n'ebigambo by'embabazi kandi ebirikuhuumuriza, agarukamu maraika owaabaire naagamba naanye.

14Reero maraika owaabaire naagamba naanye angira ati: Yamuza noogira oti: Mukama ow'amahe naagira ati: Nyiniire Yerusalemu na Siyooni eihato ringi munonga.

15Kandi nyiniire amahanga agajarami ekiniga kingi munonga; ahabw'okuba ku naabaire nkigwereirwe kubi abantu bangye, ago mahanga gaababonabonesa ekirengyesereize.

16N'ahabw'ekyo Nyakubaho naagira ati: Ngarukiire Yerusalemu ngiiniire esaasi, Nyaruju yangye ebe nimwo yaayombekwa. Mukama ow'amahe naagira ati: kandi omugoye gw'okugyeresa guryagyeresibwa Yerusalemu.

17Garuka oyamuze oti: Mukama ow'amahe naagira ati: Endembo zangye ziryagaruka kugira obugogyeere bushaagaine, kandi Nyakubaho aryagaruka ahuumurize Siyooni, atoorane Yerusalemu busya.

18Reero ku naimukize nti amaisho, naareeba amahembe ana.

19Ntyo mbuuza maraika owaabaire naagamba naanye, nti: Ebi ni ki? Nawe angarukamu ati: Aga mahembe nigamanyisa amahanga g'amaani agaataataaniise aba Yuda n'Abaisiraeli n'aba Yerusalemu.

20Ebyo ku byahwaire, Nyakubaho yaanyoreka abaheesi bana,

21Naagira nti: Aba nibaija kukora ki? Yangarukamu ati: Ago n'amahembe agarikumanyisa amahanga g'amaani agaataataaniise aba Yuda, hakabura owaimutsya omutwe. Kandi aba baheesi baizire kutiinisa ago mahanga n'okugahwerekyereza, ahabw'okuba gakaimutsya amahembe gaago kurwanisa ensi ya Yuda n'okutaataanisa abantu baayo.

Jump to: Chapter 2 →