Zechariah 11

nyankole

← Chapter 10 Jump to: Chapter 12 →

1Iwe Lebanooni, igura amarembo gaawe, omuriro gubone kumaraho kaarwenda zaawe!

2Imwe miti y'emiryohe 'mwe, nimucure, ahabw'okuba zaakaarwenda zigwire, emiti y'amaani ehwerekyereziibwe! Imwe mivule ya Bashani, nimuboroogye, ahabw'okuba ekibira kikwataine kitemirwe!

3Nimuhurire okuborooga kw'abariisa, ahabw'okuba amariisizo gaabo marungi gasiisirwe! Nimuhurire entare nizitsinda, ahabw'okuba ebishaka byazo ebya Yorudaani bicwekyereziibwe.

4Mukama Ruhanga wangye agizire ati: Ba omuriisa w'obusyo bw'entaama zangye ez'okubaagwa.

5Abarikuzigura nibaziita, haza bagyenda batafubiirwe! N'abarikuzitunda bagira bati: Nyakubaho naakasingye, ahabw'okuba twaba abatungi; kandi abariisa baazo tibaziiniire saasi.

6Manya Nyakubaho naagira ati: Tinkigaruka kugirira saasi abatwire omuri egi nsi. Reeba, niinyija kuhayo abo bantu, buri omwe mutaahi we nari omugabe we amugireho obushoboorozi, basingyeere ensi. Haza tindigira ou ndiiha omu mikono yaabo.

7Ntyo mba omuriisa w'obusyo bw'entaama z'okubaagwa, ezaabaire ziri enshoberwa. Nkwata enkoni ibiri. Emwe ngyeeta Mbabazi, endiijo ngyeeta Bumwe. Nguma nindiisa ezo ntaama.

8Omu kwezi kumwe nyita abariisa bashatu. Kwonka shi zindusya, kandi ziinyanga.

9Naanye nikwo kuzigira nti: Tinkiba muriisa waanyu. Erikufa efe, n'erikucwekyerera ecwekyerera, n'eziraatsigareho ziryane.

10Ntyo nkwata enkoni yangye Mbabazi ngihenda, nyita endagaano ei naabaire ndagaine n'amahanga goona.

11Egyo ndagaano efa eryo izooba, n'abashuubuzi b'entaama abaabaire bampangire amaisho bamanya ku eki naakora Mukama niwe akigambire.

12Reero mbagira nti: Ku muraabe nimureeba ngu kuhikire, mumpe ebihembo byangye; ku kiraabe kitari kwo, mugume nabyo. Nabo bandengyera ebicweka makumi ashatu by'efeeza kuba ebihembo byangye.

13Bwanyima Nyakubaho angira ati: Bite omu ibiikiro, ebyo bihembo by'ekitiinwa ebi bansiimiire. Ntyo nkwata ebicweka makumi ashatu eby'efeeza, mbita omu Ibiikiro rya Nyaruju ya Nyakubaho.

14Bwanyima mpenda enkoni yangye eya kabiri erikwetwa Bumwe niinyita obuzaare obu Abaayuda baine n'Abaisiraeli.

15Ebyo ku byahwaire, Nyakubaho yangira ati: Garuka oyetwarire ebintu by'omuriisa otaine mugasho.

16Manya reeba, ndi haihi kuta omu nsi omuriisa otarikweta ha ntaama ezibuzire, nobu kwakuba okusherura ezirazire nari okubunga ezihendekire nainga okuriisa ezihuriire; kureka orikushonshomera enyama y'ezigomokire, akaguguna n'ebyara byazo.

17Ebishi ogwo muriisa wangye otaine mugasho, orikutsigaho obusyo bw'entaama, aryakareeba! Rurara neekamuteme omukono n'eriisho rye rya buryo! Omukono gwe gwa buryo nigukakookoote gwona, n'eriisho rye rya buryo rikahumira kimwe!

← Chapter 10 Jump to: Chapter 12 →