Zechariah 5

nyankole

← Chapter 4 Jump to: Chapter 6 →

1Reero ku naimukize nti amaisho naareeba omuzingo gw'ekitabo ogurikugurukira aha iguru.

2Maraika yambuuza ati: Nooreeba ki? Naamugarukamu nti: Nindeeba omuzingo gw'ekitabo ogurikugurukira aha iguru, oburaingwa bwagwo mikono makumi abiri, n'obukiika bwagwo mikono ikumi.

3Nawe nikwo kungira ati: Ogwo n'omukyeeno ogurikushohora kubuga ensi yoona. Nigugira guti: Omuntu weena orikwiba aryahwerekyerezibwa; kandi guti: Omuntu weena orikurahira naabeiha aryahwerekyerezibwa.

4Mukama ow'amahe naagira ati: Ndyagwohereza, gutaahe omu nju y'omushuma, n'omu y'orikurahirira busha eiziina ryangye, gugume omu maju gaabo, gugamarireho kimwe embaaho n'amabaare n'ebyamwo byona.

5Ebyo ku byahwaire, maraika owaagambire naanye yangira ati: Imutsya amaisho oreebe ekyo kintu kirikugyenda.

6Naanye nti: Ni kintu ki? Angarukamu ati: N'ekigyega kirikugyenda. Kandi agira ati: Nikimanyisa ebibi by'ab'omu nsi yoona.

7Reero ndeeba ekifundikizo kyakyo ekya risasi kyafunduurwa, kandi omukazi ashutami omuri ekyo kigyega.

8Maraika agira ati: ogu ni Bibi. Atyo aigatira ogwo mukazi omu kigyega agarura aha munwa gwakyo ekifundikizo kya risasi ekirikuremeera.

9Bwanyima ku naimukize nti amaisho, naareeba abakazi babiri nibaija. Bakaba baine omuyaga omu mapapa gaabo, agari nk'ag'enkongoro. Batyo baakiriza ekyo kigyega baakitwarira ahagati y'ensi n'eiguru.

10Bwanyima naabuuza maraika owaagambire naanye, nti: Ekyo kigyega nibakitwara hi?

11Yangarukamu ati: Nibakitwara omu nsi ya Shinari kukyombekyerayo enju; egyo nju ku erihwa, ekyo kigyega bakite omu mwanya gwakyo.

← Chapter 4 Jump to: Chapter 6 →