Zechariah 3

nyankole

← Chapter 2 Jump to: Chapter 4 →

1Bwanyima Nyakubaho akaanyoreka Yoshwa, omuhongyerezi mukuru, ayemereire omu maisho ga maraika wa Nyakubaho, na Sitaane amwemereire aha rubaju rwa buryo kumutabaariza.

2Maraika wa Nyakubaho yaagira Sitaane ati: Iwe Sitaane 'we, Nyakubaho akukabukire! Nyakubaho owaatooraine Yerusalemu naakakukabukire! Torikumanya ogu ku ari ekicumurwa ekiihirwe omu muriro?

3Obwo Yoshwa akaba ayemereire omu maisho ga maraika, ajwaire ebijwaro bisiisikaire.

4Maraika ogwo yaagambira abaabaire bamwemereire omu maisho ati: Nimumujuure ebyo bijwaro bisiisikaire. Kandi yaagira Yoshwa ati: Reeba, naakwihaho ekibi kyawe, nkujwekye ekijwaro ekirungi munonga.

5Naanye ngira nti: Ka bamujwekye omu mutwe ekikwemba kishemeire. Batyo bamujweka omu mutwe ekikwemba kishemeire, bamujweka n'ebijwaro, maraika wa Nyakubaho ayemereire aho.

6Reero maraika wa Nyakubaho ayehanangiriza Yoshwa ati:

7Mukama ow'amahe naagira ati: Ku orikuratira emitwarize yangye, waakora ebi naakuragiire, oryareeberera Nyaruju yangye, otegyekye ebikaari byangye, naanye nkwikirize kuunyehikira hamwe n'aba abeemereire aha.

8Mbwenu Iwe Yoshwa omuhongyerezi mukuru, hurira; iwe na bagyenzi baawe abashutama omu maisho gaawe, ku muri ab'akaso karungi. Reeba ndyaimutsya omuheereza wangye, Itaagi.

9Ahabw'okuba Mukama ow'amahe naagira ati: Aha ibaare ri ntaire omu maisho ga Yoshwa, eibaare ry'embaju mushanju, ndyasharuraho ebihandiiko; kandi egi nsi ngiiheho ebibi omu izooba rimwe.

10Mukama ow'amahe naagira ati: Ahari eryo izooba, buri omwe omuriimwe aryayeta mutaahi we, bashutame buhooro ahansi y'omuzaabibu gwe n'omutiini gwe.

← Chapter 2 Jump to: Chapter 4 →