Zechariah 4

nyankole

← Chapter 3 Jump to: Chapter 5 →

1Maraika owaagambire naanye, akaija obwa kabiri yansisiimura nk'oku omuntu asisiimurwa omu turo.

2Yangira ati: Nooreeba ki? Naamugira nti: Nindeeba ekikondo ky'eitabaaza ekikozirwe omu zaabu kyona, kandi ekiteekirweho orwabya, n'amatabaaza mushanju, againe entambi mushanju buri rimwe.

3Kandi aha rubaju rwakyo hariho emiti y'emioliva ebiri, gumwe aha rubaju rwa buryo orw'orwabya n'ogundi aha rwa bumosho.

4Mpaho mbuuza maraika orikugamba naanye nti: Mukama wangye, mbwenu ebyo nibimanyisa ki?

5Maraika ogwo owaabaire naagamba naanye, angarukamu ati: Torikumanya eki ebyo birikumanyisa? Ngira nti: Ngaaha, mukama wangye.

6Nawe nikwo kungira ati: Eki nikyo Nyakubaho arikugambira Zerubabeeli ati: Mukama ow'amahe naagira ati: Ti habw'amaani, kandi ti habw'obushoboorozi; kureka n'ahabwa Mutima wangye.

7Mbwenu iwe rushozi 'we oruhango, niiwe oha? Omu maisho ga Zerubabeeli oryaba oruhita, areete eibaare ry'aha mutwe eririkuhamirwaho, obwo nibateera akaari bati: Nirikagire emigisha! Nirikagire emigisha!

8Reero ekindi, Nyakubaho akangambira ati:

9Emikono ya Zerubabeeli etaireho omusingi gwa Nyaruju egi, niyo erigiheza. Aho niho murimanyira ku Mukama ow'amahe niwe abantumireho.

10Manya boona, abaagayire omurimo nigutandika, baryashemererwa baareeba Zerubabeeli aine kariisho omu ngaro, agumiizemu kwombeka. Mbwenu amatabaaza ago mushanju nigo maisho ga Nyakubaho agarikubuga omu nsi yoona.

11Bwanyima nkamubuuza nti: Emiti y'emioliva egi ebiri, ei ogumwe guri aha rubaju rwa buryo n'ogundi aha rwa bumosho orw'ekikondo ky'eitabaaza neemanyisa ki?

12Kandi naamubuuza omurundi gwa kabiri nti: Gariya mataagi abiri g'emioliva agari aha mbaju zombi ez'enshekye ibiri z'ezaabu ezi amajuta g'emioliva garikushohoreramu nigamanyisa ki?

13Nawe ambuuza ati: Torikumanya eki garikumanyisa? Ngira nti: Ngaaha, mukama wangye.

14Mpaho angarukamu ati: Ago n'ababiri abaasiigirwe amajuta, abeemerera omu maisho ga Nyakubaho w'ensi yoona nibamugaragira.

← Chapter 3 Jump to: Chapter 5 →