Zechariah 9

nyankole

← Chapter 8 Jump to: Chapter 10 →

1Okuragura: Nyakubaho aragiire ku ensi ya Haduraaka na Damasiko bifubirwa. Manya endembo za Aramu n'eza Nyakubaho, nk'oku enganda za Isiraeli zoona ziri eze.

2Hamati eyatana na Haduraaka, hamwe na Tuuro na Sidoni nabyo n'ebye; nobu biraabe biine obwengye bwingi.

3Tuuro eyeyombekyeire ekigo kigumire, yaarunda efeeza nk'omucuucu, n'ezaabu nk'ebyondo by'omu nguuto.

4Kwonka reeba, Nyakubaho aryagyaaka ebi etungire, eitungo ryayo arinagye omu nyanja, emarweho omuriro.

5Ashikelooni eryakireeba etiina, Gaaza eryabura omugabe n'Ashikelooni ebure ab'okugituuramu.

6Eihanga ry'ebizaarwa riryatuura Ashidoodi; ntyo ncwe Filisitiya amaryo.

7Ndyagiiha ebitambo by'eshagama omu kanwa, ngisikure omu maino ebirikuzira. Nayo ebe ekicweka ky'abaatsigaireho ahabwa Ruhanga waitu; n'aba Ekurooni babe nk'Abayebusi.

8Reero nte abarinzi omu nsi yangye, harekye kugira ababisha baagirabamu nibakora oku n'oku. Tiharigira ihanga ririkunyangaraza eririgaruka kubataahirira, ahabw'okuba ebyo hati nimbyereebera.

9Iwe Siyooni, Shemererwa munonga! Naiwe Yerusalemu teera akaari! Reeba, omugabe waawe naija ah'ori; ahikiriire kandi n'omusinguzi; kwonka n'omucureezi, atembire omwana gw'endogoya muto.

10Efuraimu ndyagimaramu ebigaari, na Yerusalemu ngimaremu embaraasi z'orugamba, n'amata g'orugamba ngamareho. Aragiire amahanga kugira obusingye. Obutegyeki bwe buryaruga aha nyanja, buhikye aha ndiijo; bwihe aha Mugyera, bute aha muheru gw'ensi.

11Kandi iwe, ahabw'eshagama y'endagaano yangye naiwe, ndyarekura enkwatwa zaawe, nziihe omu kiina kitarimu maizi.

12Imwe mbohe ziine amatsiko 'mwe, nimugarukye omu kigo kyanyu. Eri izooba nimbahamiza ku ndibashumbuusha ebirimu emirundi ebiri.

13Manya nyinikire Yuda kuba obuta bwangye, naahindura Efuraimu omwambi gwabwo. Iwe Siyooni, ndyaimutsya abantu baawe, barwanise abaawe iwe, Buguriiki; nkugire nka rurara y'emanzi.

14Reero Nyakubaho aryabonekyera aha iguru yaabo, omwambi gwe gusyokye nk'omurabyo, Mukama Ruhanga ateere enzamba, kandi ahururire omu miyaga y'akasooroora, ey'omu bukiizi-bwa-buryo.

15Mukama ow'amahe aryabarinda, bamareho abarekyezi b'enjungu, babaribatiirire. Baryanywa eshagama yaabo nka viino, baijure nk'orwabya, bajube nk'amahembe g'eitambiro.

16Ahari eryo izooba Mukama Ruhanga waabo aryabajuna, ahabw'okuba bo n'obusyo bw'abantu be. Baryayengyengyetera omu nsi ye nk'amahunde g'aha kirunga.

17Ebishi ebyabo biryashemera, kandi bibe birungi! Ebyokurya by'omujuma biryareetera abatsigazi kuba gye; viino nto ereetere abaishiki kubengyeya.

← Chapter 8 Jump to: Chapter 10 →