Zechariah 6

nyankole

← Chapter 5 Jump to: Chapter 7 →

1Kandi ku naagarukire kwimutsya amaisho, ahonaaho naareeba ebigaari bina by'orugamba nibiruga ahagati y'enshozi ibiri. Haza ezo nshozi zikaba ziri ez'omuringa.

2Ekigaari ky'okubanza kikaba nikikururwa embaraasi zirikutukura, ekya kabiri ezirikwiragura,

3ekya kashatu ezirikwera; kandi ekya kana nikikururwa embaraasi z'ebihuura by'obugondo.

4Ntyo mbuuza Maraika owaagambire naanye, nti: Mukama wangye, ebigaari ebyo nibimanyisa ki?

5Maraika ogwo angarukamu ati: Nibiza ei emiyaga ena y'omu iguru eri, byaherize kweyoreka omu maisho ga Nyakubaho ow'ensi yoona.

6Ekigaari ekirikukururwa embaraasi zirikwiragura nikiza omu nsi y'omu bukiizi-bwa-bumosho; eky'ezirikwera nikiza omu nsi y'oburengyerwa-izooba, kandi ekirikukururwa embaraasi z'ebihuura by'obugondo nikiza omu nsi y'omu bukiizi-bwa-buryo.

7Ezo mbaraasi ezirikwiruka munonga ku zaarugireyo, zaija n'obwira bw'okwenda kugyenda kwetegyereza ensi. Maraika ogwo yaazigira ati: Nimwirooko mwetegyereze ensi. Nazo zaagyenda, zaagyetegyereza.

8Bwanyima Nyakubaho yangambira n'eiraka rihango ati: Ezo ezirikutoora omu nsi y'omu bukiizi-bwa-bumosho zaikaikanisa ekiniga kyangye eki naaba nyiniire ab'omuri egyo nsi.

9Kandi Nyakubaho akangambira ati:

10Twara ebiconco ebitoizirwe Helidai, Toobiya na Yedaaya, abarugire omu bukwatwa, abaizire nibaruga Babulooni; kandi eryo izooba oze omwa Yosiya mwene Zefaniya.

11Abo bantu obaiheho efeeza n'ezaabu, obiheeshemu ekirunga, okite aha mutwe gwa Yoshwa omuhongyerezi omukuru, mwene Yehozadaki.

12Haza omugire oti: Mukama ow'amahe naagira ati: Reeba, omuntu orikwetwa Itaagi aryakurira gye omu mwanya gwe, kandi aryayombeka Nyaruju ya Nyakubaho.

13Niwe aryombeka Nyaruju ya Nyakubaho, akagira ekitiinwa ky'obugabe, akashutama aha kitebe kye ky'obugabe, akakitegyekyeraho. Aha rubaju rw'ekitebe kye hariho omuhongyerezi, kandi bombi bakeetegyerezana baine obusingye.

14Ekyo kirunga kiryaguma omuri Nyaruju ya Nyakubaho kiri eky'okwijukiraho Helidai, Tobiya, Yedaaya na Yoshwa mwene Zefaniya.

15Reero abari hare munonga baryaija bahe emikono abarikwombeka Nyaruju ya Nyakubaho. Aho niho murimanyira ku Mukama ow'amahe niwe abantumireho. Kandi ekyo kiryabaho, mwaba mutaire omutima aha kworobera ebi Mukama Ruhanga waanyu arikubaragiira.

← Chapter 5 Jump to: Chapter 7 →