Zechariah 13

nyankole

← Chapter 12 Jump to: Chapter 14 →

1Eryo izooba ab'omuryango gwa Daudi n'abatwire Yerusalemu baryaigurirwa enshuro y'okuboozyabo ebibi n'oburofa.

2Kandi Mukama ow'amahe naagira ati: Eryo izooba ndyamariraho kimwe omu nsi ekyeetwa ebishushani birikuramibwa, birekye kwijukwa obundi. Kandi ndyaiha omu nsi abarangi n'omutima gw'okuramya ebishushani ogutashemeire.

3Reero ku harigira owaagaruka kuba omurangi, ishe na nyina abaamuzaire baryamugira bati: Tori w'okugumaho, ahabw'okuba noogamba ebishuba omu iziina rya Nyakubaho. Kandi ishe na nyina abaamuzaire ku ariba naaranga, baryamucumita, bamwozyemu.

4Eryo izooba buri murangi ku ariba naaranga, aryaitwa enshoni ahabw'ebi ayorekirwe; tarijwara munagiro gw'ebyoya kugobeza abantu.

5Kureka aryagira ati: Tindi murangi, ndi omuhingi, okwiha omu butsigazi bwangye, eitaka niryo riba eitungo ryangye.

6Reero ku harigira owaamubuuza ati: Obu buhuta bu oine aha ngaro zaawe, nibumanyisa ki? Aryagarukamu ati: Obu buhuta nkabuhutaarira omu nju ya banywani bangye.

7Mukama ow'amahe naagira ati: Iwe rurara 'we, sisiimuka orwanise omuriisa wangye, orwanise ogwo muntu onyemereire aha rubaju. Teera omuriisa, entaama zitaataane, n'abaana baazo mbateeze omukono gwangye.

8Nyakubaho naagira ati: Omuri egyo nsi yoona, ebicweka bibiri bya kashatu by'abantu biryacwekyerezibwa, bihwerekyerere, kimwe kya kashatu kyabo kitsigareho kihuriire.

9Reero kimwe kye kashatu ekyo nkite omu muriro, mbashemeze, nk'oku omuntu ashemeza efeeza; kandi mbagyeze, nk'oku ezaabu egyezibwa. Batyo bantakire, naanye mbagarukyemu. Mbagire nti: Muri abantu bangye. Nabo bagire bati: Nyakubaho niwe Ruhanga waitu.

← Chapter 12 Jump to: Chapter 14 →