Zechariah 2

nyankole

← Chapter 1 Jump to: Chapter 3 →

1Reero ku naimukize nti amaisho, ahonaaho naareeba omushaija aine omu ngaro omugoye gw'okugyeresa.

2Naamubuuza nti: Nooza hi? Nawe angarukamu ati: Ninza kugyera Yerusalemu, kureeba obukiika bwayo n'oburaingwa bwayo.

3Kandi ahonaaho maraika owaabaire naagamba naanye, ku yaabaire yaatsimbura ati ekigyere kugyenda, maraika ondiijo yaija kumubugana.

4Yaamugira ati: Iruka ogambire ogwo mutsigazi oti: Yerusalemu n'ey'okutuurwamu nk'ebirorero ebitaine ngo, ahabw'okuba abantu baamwo n'amatungo gaamwo biryaba bingi.

5Manya Nyakubaho naagira ati: Niinye ndiba orugo rwayo rw'omuriro orugyehinguririize; kandi niinye ndiba ekitiinwa kyayo ngirimu.

6Nyakubaho naagira ati: Yaimwe! Yaimwe! Nimuhungye, murugye omu nsi y'omu bukiizi-bwa-bumosho. Manya niinye naabataataanisiize okwo hare, ei emiyaga ena y'eiguru egarura, Nyakubaho nikwo arikugira.

7Yaimwe abatwire Babulooni, nimuhungire Siyooni.

8Ahabw'okuba Mukama ow'amahe ahabw'ekitiinwa kye, ku yantumire omu mahanga agaabanyagire; manya obakoraho aba eyekozire omu mbone y'eriisho, yangira ati:

9Reeba ago mahanga ndyagatigitira omukono, gabe omunyago gw'abaabaire bari abahuuku baago. Nibwo murimanya ku Mukama ow'amahe niwe antumire.

10Nyakubaho naagira ati: Iwe Siyooni, yeshongore, kandi onanukye; ahabw'okuba niinyija juba kukutuuramu.

11Eryo izooba amahanga maingi garyayehongyera Nyakubaho babe abantu be. Kandi aryatuura omuriimwe; mubone kumanya ku Mukama ow'amahe niwe abantumireho.

12Reero Nyakubaho aryatunga Buyuda, ebe eye ahabwe, omu nsi ye erikwera; kandi agarukye ahindure Yerusalemu orurembo rwe oru ayetooraniire.

13Imwe bantu 'mwe mwena, nimucecekye omu maisho ga Nyakubaho, ahabw'okuba ayebandatwire omu butaaho bwe oburikwera.

← Chapter 1 Jump to: Chapter 3 →