Zechariah 10

nyankole

← Chapter 9 Jump to: Chapter 11 →

1Mushabe Nyakubaho abagwisize enjura omu biro bya katumba; Nyakubaho oreeta ebicu birimu eihunga, akagwisiza abantu enjura y'orutoonyerera, Buri muntu akamumereza obunyaatsi omu ishwa rye.

2Manya ebishushani birikuramibwa nibigamba ebitaine muhoho, abafumu bagamba ebishuba; n'abarootorozi barootorora ebishuba; bahuumuriza abantu n'ebitaine mugasho. Nikyo abantu barikuzengyererera nk'entaama, bakabonabona ahabw'okubura omuriisa.

3Nyiniire abariisa ekiniga kingi, kandi ndyafubira abeebembezi. Ahabw'okuba Mukama ow'amahe ata omutima aha busyo bwe, nibo b'omuryango gwa Yuda; kandi aryabagira nk'embaraasi ye erikugunduukira aha rugamba.

4Omuribo haryarugamu eibaare ry'obuhamizo, omuribo harugyemu enkondo y'eihema, omuribo harugyemu obuta bw'orugamba, omuribo harugyemu buri mutegyeki.

5Boona hamwe baryaba amamanzi omu rugamba, baribatiiririre ababisha baabo omu byondo by'omu nguuto. Baryarwana ahabw'okuba Nyakubaho ari hamwe nabo; kandi baryarimbagiriza ab'ahambaraasi,

6Ndyaha amaani ab'omuryango gwa Yuda, njune ab'omuryango gwa Yosefu. Ndyabagarura, ahabw'okuba mbainiire esaasi, babe nk'abu ntakacwaga. Ahabw'okuba niinye Mukama Ruhanga waabo, kandi ndyabagarukamu.

7Abaefuraimu baryaba abarwani emanzi, bashemererwe nk'abaanywa viino. Abaana baabo bakireebe, beesiime, emitima yaabo eyesingiririze omuri Nyakubaho.

8Ndyabeetesa akamanyiso, mbataaruure; ahabw'okuba mbacungwire; kandi baryaba baingi nk'obunyakare.

9Nobu ndaabe naabataataanisiize omu mahanga, kwonka baryanyijukira omu nsi za hare. Kandi bo n'abaana baabo baryagumaho, barugyeho bagarukye.

10Ndyabareeta omuka mbaihire Misiri, mbataaruure nimbaiha Asiriya; mbareete omu nsi ya Gileadi n'eya Lebanooni;

11okuhitsya obu barifundamu. Baryaraba omu Nyanja ya Misiri; ateere ebingonzi byayo, Omugyera gwa Nailo gwome; Asiriya ecuubwe amaryo, n'enkoni y'obugabe bwa Misiri erugireho kimwe.

12Ndyabahindura ab'amaani omuri Mukama, beehimbisize omu iziina rye; Nyakubaho nikwo arikugamba.

← Chapter 9 Jump to: Chapter 11 →