Hosea 1

Quechuan QXO (Biblia en Quechua del sur de Conchucos)

Jump to: Chapter 2 →

1Kaychömi Tayta Diospa willakuyninta Beeripa tsurin Oseas willakunqan qellqashqa kaykan. Judá nacionchö Uzías rey kaykanqan witsanmi Oseas willakurqan. Tsaynöllam willakurqan Jotam rey kaykanqan witsan, Acaz rey kaykanqan witsan y Ezequías rey kaykanqan witsanpis. Israel nacionchönam Joáspa tsurin Jeroboam rey kaykarqan.

2Puntata parlaparmi Oseasta Tayta Dios nirqan: «Prostitüta warmiwan churakaptiki tsurikikuna yuriyätsun. Israel runakuna noqata dëjaskamar juk dioskunata adorarmi prostitüta warminö kaykäyan».

3Tsaypitanam Diblaimpa tsurin Gomerta warminpä Oseas ashirqan. Tsay warmichömi Oseaspa mayor tsurin ollqu yurirqan.

4Peru Oseastanam Tayta Dios nirqan: «Jezreel markachö tsaytsika runakunata Jehú wanutsinqannömi noqapis castigar Jehúpita miraqkunata wanutsishä. Tsaynö castigaptïmi Israel nacionpa mandaqnin reykuna kanqanatsu. Tsaynö ruranäpä kanqanta musyayänanpä tsurikita jutitsiy Jezreelta.

5Tsaynöllam Israel nacionpa soldädunkunata Jezreel pampachö ushakätsishä».

6Tsaypitanam Oseaspa warmin Gomer warmi wamrata qeshyakurqan. Tsaymi Oseasta Tayta Dios nirqan: «Tsay tsurikipa jutinta churanki Lo-ruhamata. Tsaynö jutin kanqa Israel runakunata manana kuyapänäpä kaptinmi. Paykunataqa mananam perdonashänatsu.

7«Peru Judá nación runakunatam sïqa kuyapar kikï salvashä. Manam guërrawantsu, flëchawantsu, espädawantsu, caballuwantsu ni caballuta muntaraq soldädukunawantsu salvashä, sinöqa poderösu kaynïwanmi».

8Lo-ruhamata wasqiskirnam Gomerqa yapay qeshyakurqan ollqu wamrata.

9Tsaymi Oseasta Tayta Dios nirqan: «Tsurikipa jutinta churay Lo-ammita. Tsay jutinmi kanqa Israel runakuna noqapa manana kayanqanta tantiyayänanpä. Mananam noqapis paykunapa Diosninnatsu kashä».

10«Tsaypitanam Israel runakunata yanapashä atskaman mirayänanpä. Lamar kuchunchö arënanörämi yupaytapis mana atipaypä atskaq kayanqa. «Paykunaqa manam noqapanatsu» ninqächöpis runakunam niyanqa: «Paykunaqa imayyaqpis kawaq Tayta Diospa wamrankunam kaykäyan».

11Tsaymi Judá nación runakuna y Israel nación runakuna juk nacionllana kayanqa. Mandaqnin reytapis jukllayllatanam churayanqa. Maytsay nacionchö kayanqanpita kutiyaptinmi kushikuypä kanqa. Tsay junaqtam jutitsiyanqa Jezreel jutin kananpä.

Jump to: Chapter 2 →