Hosea 11

Quechuan QXO (Biblia en Quechua del sur de Conchucos)

← Chapter 10 Jump to: Chapter 12 →

1«Israel naciontaqa unaypitam kuyä. Tsurï kaptinmi Egiptupita qayamurqä.

2Pasaypa kuyaykaptïmi noqapita witikuyan. Baal dioskunapämi sacrificiukunata rupaykätsiyan. Ïdulukunapämi inciensiuta qoshniykätsiyan.

3«Wamrata makinpita jancharkur puriyta yachatsinqannömi Efraín runakunata yachatsirqä. Tsaynö yachaykätsiptïpis manam tantiyayantsu yanapaykanqäta.

4Paykunata pasaypa kuyarmi shullpapayllapa ñöpäman pushamurqä. Imayka llullu wamrata marqarkur cäranta cäräman töpaykatsir kuyaqnömi kuyarqä. Tsaynö kuyarmi mikuytapis kikï qararqä.

5«Tsaynö kuyaykaptïpis paykunaqa manam yachanäyämantsu. Tsaymi Egiptuchötsu yapay esclävu kayanqa, sinöqa Asiria runakunapa poderninchönam kayanqa.

6Markachö täraqkunataqa espädawanmi wanutsiyanqa. Markankuna murallashqa kaptinpis ushakätsiyanqam. Tsaynömi ushakätsiyanqa tsapakuyta yarpäyaptinpis.

7Kuyanqä runakunaqa noqapita witikushqam kaykäyan. Poderösu Dios kanqäta nirpis janan shonqullam sirviyäman.

8«Efraín runakuna, ¡imanöpatä qamkunata qonqaskïman! Israel runakuna, ¡imanöpatä qamkunata jaqiskïman! ¿Adma markata y Zeboim markata ushakätsinqänötsurä qamkunatapis ushakätsiman? Qamkunata kuyapaptïmi shonqüpis pasaypa tiktikyanrä.

9Rabyanätsiyämaptikipis manam llapaykikunataqa ushakätsiyäshaykitsu. Castigarpis manam llapaykikunataqa wanutsiyäshaykitsu. Noqaqa manam runatsu kä, sinöqa qamkunawan kaykaq santu Diosmi. Manam chipyaqtsu ushakätsiyäshayki.

10«Qamkuna tantiyarmi qatiräyämanki. Leonnö qayaraptïmi rupay ullunan kaq lädupita tsuktsukyarrä kutiyämunki.

11Pishqukuna päriyanqannömi Egiptupita ras kutiyämunki. Palumakuna päriyanqannömi Asiriapitapis ras kutiyämunki. Wayikikunachö yapay täyänaykipämi yanapayäshayki». Tayta Diosmi tsaynö nin.

12«Israel runakunaqa imaykanöpam llullapaykäyäman. Judá runakunapis mana cäsumarmi ïdulukunata adoraykäyan.

← Chapter 10 Jump to: Chapter 12 →