Hosea 3

Quechuan QXO (Biblia en Quechua del sur de Conchucos)

← Chapter 2 Jump to: Chapter 4 →

1Tayta Diosmi yapay nimarqan: «Warmiki juk runawan kakushqa kaykaptinpis paywan amishtay. Tsaynöpam Israel runakuna tantiyakuyanqa runanta engañaykaq warminö kaykäyaptinpis paykunata imaypis kuyanqäta. Paykunataqa juk dioskunata adorar päsasllan atipashqa biscöchuta kushishqa mikuyaptinpis kuyämi».

2Tsaynö nimaptinmi warmïta qorinäpä pägarqä chunka pitsqa siclo qellayta y kimsa pachak kimsa chunka (330) kïlu cebädata.

3Qoriskirnam nirqä: «Kananpitaqa noqallapanam warmï kanki. Juk runawanqa mananam purinkinatsu. Noqawan amishtashqa karpis manam oqllanakushunrätsu, sinöqa atska junaq päsaskiptinrämi punushun».

4Tsaynömi Israel runakunapapis atska watayaq kanqatsu mandaqnin rey ni autoridäninkunapis. Manam Tayta Diospä sacrificiutapis rupatsiyanqatsu ni juk diosta adorar juytu rumitapis ichïtsiyanqatsu. Manam ni sacerdötikunapis ni wayinkunachö ïdulunkunapis kanqanatsu.

5Tsaypitam Israel runakuna perdonta mañakur Tayta Diosta ashiyanqa. Tsaynöllam David casta mandaqnin reyta cäsuyanqa. Shamuq watakunachömi Tayta Diosta mantsapakur bendicionninkunata kushishqa chaskiyanqa.

← Chapter 2 Jump to: Chapter 4 →