Hosea 12

Quechuan QXO (Biblia en Quechua del sur de Conchucos)

← Chapter 11 Jump to: Chapter 13 →

1Efraín runakunaqa llullakuyllapä y wanutsinakuyllapä yarpararmi Asiria runakunawan pactuta ruraykäyan. Egipto nacionwanpis pactuta rurarmi aceitita apaykätsiyan. Peru tsay nacionkunawan pactuta rurarqa vientullawan pachan juntananpä kanqanta yarpaqnömi manakaqllapä ruraykäyan. Rupay yarqamunan kaq lädupita shamuq achaq vientuta qoyat qatipaq runanöllam manakaqkunata ruraykäyan».

2Judá runakunawanpis Tayta Dios rabyashqam kaykan. Tsaymi jutsata rurayanqallanman castiganqa.

3Unay castantsik Jacobpis wawqinpa atakan aptashqam yurirqan. Jövinyarkurnam Tayta Dioswan pelyarqan.

4Angelwan pelyar vinciskirmi waqarnin bendisananpä rugakurqan. Tsaypitanam Bet-elchö Tayta Dios yuripaykur parlaparqan.

5Paymi llapanta mandaq Tayta Dios. ¡Paypa jutinpis Yahwehmi!

6Tsaynö kaykaptinqa jutsata rurayanqaykita jaqiskir Tayta Diosta perdonta mañakuyay. Tayta Diosta awniyanqaykinölla leyninkunata cäsur kawayay. Kuyashuqniki Tayta Diosman imaypis yärakuyay.

7Tayta Diosmi nin: «Qamkunaqa cananeo runakunanömi runa mayikikunata pësuwan engañaykäyanki. Runa mayikikunata engañaymi gustayäshunki.

8Tsaynö engañarmi kushishqa nikäyanki: «Pasaypam rïcuyäyarqü. Negociupä suertï kanmi. Runakunata engañanqäta manam pipis cuentata qokuntsu».

9Tsaynö nirpis tantiyakuyay unay castaykikuna Egiptuchö kayanqanpita Tayta Diosniki kanqäta. Castigaptïmi toldukunallachö täyanki Ramäda fiestata rurar täyanqaykinö.

10«Jutsata rurayanqaykita dëjayänaykipämi profëtakunawan willakatsimurqä. Willayäshunaykipämi sueñuyninchöpis kutin kutin revelarqä. Imamanpis iwalatsiypa tantiyatsishunaykipämi mandamurqä.

11«Galaad partichö täraq runakunaqa ïdulukunata manakaqllapämi sirviyan. Gilgalchö täraq runakunapis törukunata pishtar juk dioskunapä sacrificiukunatam altarkunachö rupaykätsiyan. Tsaymi altarninkunatapis llapanta pakir ushashä. Pirqayanqan rumikunapis chakrachömi mashtakashqa jitaranqa».

12Unay castantsik Jacobqa Aram partimanmi qeshpir aywakurqan. Tsaychömi warmiyuq kananpä üshata mitsipakurqan.

13Tsaypita unaytanam Israel runakunata Egiptupita juk profëtawan Tayta Dios jipimurqan. Tsay profëtawanmi paykunata cuidatsirqan.

14Tsaynö kaykaptinpis qamkunaqa Tayta Diosta pasaypam rabyanaykätsiyanki. Pasaypa jutsayuq kayanqaykipitam Tayta Dios castigayäshunki. Castigashqa kayänaykipäqa kikikikunam jutsayuq kaykäyanki.

← Chapter 11 Jump to: Chapter 13 →