Hosea 13

Quechuan QXO (Biblia en Quechua del sur de Conchucos)

← Chapter 12 Jump to: Chapter 14 →

1Ñöpataqa Efraín runakuna yätsiyaptin Israelchö wakin trïbukuna cäsukuyaqmi. Tsaynö kaykarpis Baal diosta adorarmi Efraín runakunaqa wanushqanöna kaykäyan.

2Jutsa ruraytaqa manam dëjayantsu Yuraq qellayta fundiskatsirmi munayanqannö ïdulukunata ruratsiyan. Tsaypitam niyan: «Ïduluntsikpä llapantsik sacrificiuta rupatsishun». Tsaynö nirmi torïtu niraq ïduluta mutsayan.

3Tsaymi patsa waraskiptin pukutaypis y shullyapis illakaskiqnö illakäyanqa. Tsaki oqshata vientu apanqannö y jornupita qoshni yarqur ushakaqnömi illakäyanqa.

4Tayta Diosmi nin: «Egiptuchö unay castaykikuna kayanqanpitam Tayta Diosniki kä. Noqallam salvashuqnikikuna kä. Tsaynö kaykaptïqa imamanpis ama «diosnï» nir yärakuyaytsu.

5«Unay castaykikuna desiertupa puriyaptin noqam cuidarqä.

6Qamkunatapis pacha junta mikuyänaykipä mikuyta alistapaptïmi orgullösu kayanki. Tsaymi qonqaskamar cäsuyämarquykinatsu.

7Tsaynö kayanqaykipitam imayka leonnö y nänichö tigri pakakuykur atacaqnö atacayäshayki.

8Wawankunata suwapaptin ösu atacar ushanqannömi qamkunatapis ushakätsiyäshayki. Imayka león atacar ushaqnömi chipyaq ushakätsiyäshayki. Imayka chucaru ashmanömi chipyaq ushakätsiyäshayki.

9«Israel runakuna, yanapaykaptïpis conträ kayanqaykipitam ushakätsiyäshayki.

10Mandayäshuqniki reykuna kananpämi unay castaykikuna autoridäninkunata mañakuyarqan. Kananqa salvayäshunaykipä ¡maychötä tsay rey kaykan! Autoridänikikunapis ¡maychötä kaykäyan yanapayäshunaykipä!

11Mandayäshuqniki reykunata churanäpä mañakayämaptinmi rabyashqa karpis reyta churaparqä. Kananqa qamkunawanpis rabyashqa karmi mandayäshuqniki reyta illakätsishä.

12«Qamkuna jutsata rurayanqaykiqa llapanmi libruchö qellqashqa kaykan.

13Warmita wachay nanay tsarinqannömi qamkunapis ñakayanki. Wachay nanay tsariptinpis yurinanpä jatikashqa caprichüdu wamranömi kaykäyanki. Tsay wamra jatikashqa kar mamanpa pachallanchö wanunqannömi qamkunapis wanuyanki.

14«¿Wanuypita salvashaykitsurä? ¡Manam! ¡Ä wanuy! ¡Ushakätsikuq kaynikiwan yarqamuy! ¡Ä sepultüra! ¡Mikukuq kaynikiwan shamuy! Tsay runakunata manam kuyapäshänatsu.

15«Israel runakuna, pasaypa rïcuyarmi kuyayllapä waytanö kayaptikipis ushakätsiyäshayki. Achaq vientu desiertupita shamur yakuta y pukyukunata tsakitsinqannömi qamkunatapis ushakätsiyäshayki. Contraykikuna shamurmi riquëzaykikunata y alhäjaykikunata qechuyäshurniki apayanqa.

16Samaria marka ushakanqam. Conträ kayanqaykipitam espädawan wanutsiyäshunki. Tsurikikunatapis tsapirmi wanutsiyanqa. Qeshyaq warmikunapa pachantapis qasharmi ushayanqa».

← Chapter 12 Jump to: Chapter 14 →