Hosea 8

Quechuan QXO (Biblia en Quechua del sur de Conchucos)

← Chapter 7 Jump to: Chapter 9 →

1«¡Marka cuidaqkuna, cornëtata tukayay! ¡Kuyanqä runakunata atacayänanpämi contrankuna ankanö shamuykäyan! Paykunawan pactu ruranqäta y leynïkunata mana cumpliyanqanpitam Israel runakunata castigashä.

2Israel runakunam rugakamar nikäyäman: «¡Taytay, yanapaykallämay! ¡Qammi kanki Tayta Diosnï! ¡Noqakunaqa kuyanqayki Israel runakunam kaykäyä!»

3Tsaynö rugakayämarpis alli kaqta manam chaskikuyantsu. Tsaymi castigaptï chikiqninkuna atacar qatikachäyanqa.

4Paykunaqa mana tapukamarninmi mandaqnin reykunatapis churayashqa. Mana mañakamayllapam autoridäninkunatapis churayashqa. Yuraq qellaypita y qoripitam ïdulukunatapis rurayashqa. Tsaynö rurayanqanpitam ushakäyanqa.

5«Samaria runakuna, qoripita torïtuta rurayanqaykita adorayaptikim pasaypa melanä. Tsaynö rurayanqaykipitam pasaypa rabyashqa kaykä. ¡Imayyaqrä penqakuypä jutsasapa kayanki!

6¡Israel runakuna, wiyakuyay! Tsay adorayanqayki torïtuqa manam Diostsu, sinöqa runa ruranqallanmi. Tsaymi pasaypa pakir ushakätsishä.

7«Israel runakunaqa vientuta muruqnö karmi shukukuy vientullata cosechayanqa. Muruyanqankunapis mana wayuptinmi aqatsikuyänanpäpis kanqatsu. Ichikllata cosechayanqantapis jäpa runakunam mikuyanqa.

8¡Israel nación ushakanqam! Juklä nación runakunaqa mana sirviq uyllutanömi rikayanqa.

9Israel runakunaqa chucaru ashnunö karmi Asiria nación runakunaman aywaykäyan. Paykunaqa waynäkuq warminömi kaykäyan.

10Asiria nacionta y wakin nacionkunata tsaynö pägayaptinpis tsay nacionkunatam qorishä atacayänanpä. Poderösu reypa poderninchö karmi juk tiempuyaq ñakayanqa.

11«Efraín runakunaqa atska altarkunatam rurayashqa tsaychö perdonta mañakayämänanpä. Peru tsay altarkunachö ïdulukunata adorarmi mas jutsata ruraykäyan.

12Paykunapä atska leykunata qellqatsishqa kaptïpis manam cäsukuyantsu.

13Sacrificiukunata altarchö rupatsirmi aytsata kushishqa mikuykäyan. Tsaynö ruraptinpis tsay sacrificiukunaqa manam shonqüpänötsu. Jutsata rurayanqantaqa manam imaypis qonqashätsu. Perdonanäpa rantin castigaptïmi Egiptuman kutiyanqa.

14Kamaqnin Tayta Dios kaykaptïpis Israel runakunaqa manam yärakayämantsu. Yärakayämänanpa trokinmi amparakuyänanpä palaciukunata shäriykätsiyan. Judá runakunapis alli murallashqa markankunamanmi yärakuykäyan. Nina rupar ushanqannömi murallashqa markankunata y alli shäritsinqan palaciunkunatapis ushakätsishä».

← Chapter 7 Jump to: Chapter 9 →