Hosea 7

Quechuan QXO (Biblia en Quechua del sur de Conchucos)

← Chapter 6 Jump to: Chapter 8 →

1y mana alli kawayanqanpita jampiyta munarpis Efraín y Samaria runakuna jutsata rurallanqantam rikä. Llapankunapis llullakur yachakashqam kaykäyan. Suwakuyänanpä yachakashqa karmi wayikunatapis suwakuykäyan. Tsaynöllam cällikunachöpis runakunapa imantapis qechuykäyan.

2Manam tantiyayantsu llapan jutsata rurayanqankunatapis yarparaykanqäta. Imaypis jutsata ruraykaqllatam rikaykä».

3«Jutsata rurayaptinpis reyqa kushikunmi. Llullakuyaptinpis reypa yanapaqninkunaqa asikuyanmi.

4Tsay yanapaqninkunaqa imayka mäsa jakanqanyaq wayllashqa jornu achanqannömi kaykäyan. Tsaynö achachäpakurmi warminkunata engañar llapanpis chïnäkur puriykäyan.

5«Fiestata rey ruraptinmi autoridäkunaqa reytapis machanqanyaq upyatsiyan. Machaskirmi reyqa tsay machätsiq runakunata churan yanapaqninkuna kayänanpä.

6Tsay yanapaqninkunam shonqunkunachö yarpachakuyan reypa contran shäriyänanpä. Tsaymi reypa contran willanakur waraskiyanpis.

7Paykunaqa jornuchö nina imatapis rupar ushaqnömi mandaqnin reykunatapis wanutsir ushaykäyan. Tsaynöpam reykuna qatinayllaman wanuykäyan. Tsaynö kaptinpis manam pipis mañakamantsu yanapanäpä».

8«Efraín runakunaqa mana cäsumaq nación runakunawanmi qorikäyan. Jukaq lädupa chashqa y jukaq lädupa chawa tantanömi kaykäyan.

9Tsaymi alli kawayänanpä kallpankunapis kannatsu. Kallpankuna ushakanqantapis manam musyayantsu. Soquyanqantapis manam musyayantsu.

10«Allish tukuyanqanqa mana alli kayanqantam willakuykan. Allish tukurmi Tayta Diosnin kaykaptïpis noqaman kutiyämuntsu ni ashiyämantsu.

11Tsaymi Egipto runakunata y Asiria runakunata yanapayänanpä mañakuykäyan. Tsay nacionkunaman mañakuq aywar imayka paluma wakläpa kayläpa päriqnömi kaykäyan.

12Peru tsaynö aywaykaqtam atarräyäwan tsarishä. Pishqukunata trampawan tsariqnömi tsariskir jutsata rurayanqanpita castigashä.

13«¡Allaw paykuna! Noqapita witikushqa kayaptinmi paykunata ushakätsishä. Paykunaqa conträ shärir manam cäsuyämantsu. Mana ushakätsinäpä perdonayta munaptïpis paykunaqa «cäsushaykim» nir llullapäyämanmi.

14Cämanchö pasaypa waqar mañakamarpis manam llapan shonqunkunawantsu mañakayäman. Trïguta y vïnuta alistapänäta munar qaranta pasaypa roqukur mañakamarpis ninqäta manam cäsuyämantsu.

15«Noqam alli kawayänanpä paykunata yachatsirqü. Kallpayuq kayänanpäpis noqam kamarqü. Tsaynö kaykaptinpis conträ shäriyänanpämi willanakuykäyan.

16Poderösu Dios kaykaptïpis manam imapäpis cuentayämantsu. Wiksu flëcha flëchaptin jukläman aywaqnömi kaykäyan. Autoridäninkunapis noqapä llutankunatam parlaykäyan. Peru contran soldädukunatanam espädawan wanutsiyänanpä mandashä. Tsayta musyaykurmi Egiptuchöpis Israel runakunata manakaqman churar asipäyanqa».

← Chapter 6 Jump to: Chapter 8 →