1 Kings 21

Kirundi (Bibliya Yera 1951, 1967 (Burundi))

← Chapter 20 Jump to: Chapter 22 →

1Kandi hār’ umuntu yitwa Naboti w’i Yezireli, yar’ afise uruzabibu aho nyene i Yezireli, rubangikanye n’urugo rwa Ahabu umwami w’i Samariya.

2Bukeye Ahabu abarira Naboti, ati Mpa urwo ruzabibu rwawe, kugira ngo ndahagire umurima w’imboga, kuko ruri hafi y’urugo rwanje, nanje ndaguha urundi ruruta urwo mu gishingo carwo; canke ni wagomba, ndaguha amahera aruciye.

3Naboti yishura Ahabu, ati N’Uhoraho ntakavyumve ko noguha ishamvu ya ba sogokuruza!

4Nuko Ahabu arataha ashavuye yijiriwe, kubg’ iryo jambo Naboti w’i Yezireli yamubariye: kuko yamubariye, ati Sinoguha ishamvu ya ba sogokuruza. Nukw aragenda yiryamira ku kirwa, aroresha amaso hirya mu rusika, yanka gufūngura.

5Maz’ umwamikazi wiwe Yezebeli araza, aramubaza, ati N’ iki kikubabaje, ukanka kurya?

6Aramwishura, at’ Ikimbabaje n’uko nabariye Naboti w’i Yezireli, nti Mpa urwo ruzabibu rwawe ndarugure, nti Canke ndaguhe urundi mu gishingo carwo; akambarira kw atampa uruzabibu rwiwe.

7Umwamikazi wiwe Yezebeli aramubaza, ati None si wewe uganza igihugu c’Abisirayeli? Vyuka mufūngure, mushire umubabaro, jewe nzoguha urwo ruzabibu rwa Naboti w’i Yezireli.

8Nuko yandika ivyete mw izina rya Ahabu, abidomakw ikimenyetso ciwe, abirungikira abashingantahe n’abaganwa bābana na Naboti mur’ ico gisagara.

9Yandika mur’ ivyo vyete, aravuga, ati Ni mushinge umusi wo kwisonzesha, mushire Naboti imbere y’abantu;

10maze muzane abantu babiri b’inshirukanya, baje imbere yiwe bamwagirize, bati Warogose ku Mana no ku mwami. Muheze mumujane inyuma y’ igisagara, mumwicishe amabuye.

11Nukw abantu bo mur’ ico gisagara, ari bo bashingantahe n’ abaganwa bene ho, babigenza nk’ uko Yezebeli yabatumyeko muri vya vyete yabandikira.

12Bashinga umusi wo kwisonzesha, bashira Naboti imbere y’abantu;

13maz’ abo bantu babiri b’inshirukanya baraza bamwicara imbere, bāgiriza Naboti ngaho imbere y’ abantu, bati Naboti yarogose ku Mana no ku mwami. Maze baca bamukūra mu gisagara, bamwicisha amabuye.

14Baraheza batuma kuri Yezebeli, uti Naboti bamuteye amabuye; yapfuye.

15Maze Yezebeli yumvise ko Naboti bamuteye amabuye kandi ko yapfuye, abarira Ahabu, ati Haguruka uje gushikīra rwa ruzabibu Naboti w’i Yezireli yanka ko mugura: ntakiriho, yapfuye.

16Ahabu yumvise ko Naboti yapfuye, arahaguruka, aramanuka, aja gushikīra rwa ruzabibu rwa Naboti w’i Yezireli.

17Maz’ ijambo ry’Uhoraho riza kuri Eliya w’i Tishubi,

18riti Va hasi umanuke uje guhūra na Ahabu umwami w’Abisirayeli, aba i Samariya; uramusanga mu ruzabibu rwa Naboti, aramanutse kurushikīra.

19Umubarire, ut’ Uku ni k’Uhoraho agize, ngo Non’ urishe, utak’ ushikīra imyandu? Uheze umubarire, ut’ Uku ni k’ Uhoraho agize, ngw Ah’ imbga zarigatiye amaraso ya Naboti, ni ho zizorigatira n’ayawe.

20Maze Ahabu abarira Eliya, at’ Urandonse akabero, wa mwansi wanje! Na we ati Ndakuronse akabero koko, kuko witanze gukora ivyo Uhoraho abona kw ari bibi.

21Mbere ngw Azokuzanakw ivyago, agufyēfyēture agukūreho, aherengeteze izinamuhungu wese wo kuri wewe, Ahabu, aho bava bakagera mu Bisirayeli;

22kandi ngw Inzu yawe azoyihindura nk’iya Yerobowamu mwene Nebati, kandi ngw Ayihindure nk’iya Bayasha mwene Ahiya, ngo Kubg’ umwikomo wamuteye ukamuratsa, ugakwegera Abisirayeli mu vyaha;

23kandi kuri Yezebeli Uhoraho agize ngw Imbga zizomurīra ku ruzitiro rw’i Yezireli.

24Kandi ng’ Ūzogwa mu gisagara mu ba Ahabu azoribga n’imbga; ng’ Ūzogwa mu gahinga azoribga n’ibisīga.

25Nta wundi yigeze kwīgira umugurano wo gukora ivyo Uhoraho abona kw ari bibi nka Ahabu, yavyohejwe n’umwamikazi wiwe Yezebeli.

26Yama akora ibintu vy’ubugesera, akurikira ibishushanyo, nk’ukw Abamori babigenza kwose, abo Uhoraho yirukanye imbere y’Abisirayeli.

27Maze Ahabu yumvise ayo majambo, aca yitantamurirakw impuzu ziwe, yambara amagunira, arisonzesha, aryama mu magunira nyene, agenda yifumbereje.

28Maz’ ijambo ry’Uhoraho riza kuri Eliya w’i Tishubi,

29riti Mbeg’ urabonye ingene Ahabu yicishije bugufi imbere yanje? Ko yicishije bugufi artyo imbere yanje, sinzozana ivyo vyago ku ngoma yiwe, ariko ku ngoma y’ umuhungu wiwe ni ho nzozana ivyo vyago ku nzu yiwe.

← Chapter 20 Jump to: Chapter 22 →