1 Kings 6

Kirundi (Bibliya Yera 1951, 1967 (Burundi))

← Chapter 5 Jump to: Chapter 7 →

1Maz’ imyaka amajana ane na mirongumunani ishize, uhereye igihe Abisirayeli baviriye mu gihugu ca Egiputa, Salomo atangura kwubaka ingoro y’Uhoraho, hāri mu mwaka ugira kane ari ku ngoma, mu kwezi kwa Zivu, ari kwo kwezi kwa kabiri.

2Iyo ngoro umwami Salomo yubakiye Uhoraho, uburebure bgayo bgar’ amatambge mirongwitandatu y’ ukuboko uciriye mu nkokora, ubgaguke bgayo bgar’ amatambge mirongwibiri, uburebure bgayo bg’igihagararo bgar’ amatambge mirongwitatu.

3Urubaraza ruherereye imbere y’Ahēra h’iyo ngoro, uburebure bgarwo bg’ amakika bgar’ amatambge mirongwibiri, nk’uk’ ubgaguke bg’iyo ngoro bgangana; ubgaguke bgarwo bgar’ amatambge cumi.

4Iyo ngoro ayishiramw’ amadirisha y’ inshingo zikomeye.

5Mu mbavu z’iyo ngoro ahōmeka utwumba tugerekeranye, dukikuje iyo ngoro yose uhereye Ahēra n’Ahēra Cane; uko ni ko yubatse utwumba tuyikikuje.

6Utwumba two hasi, ubgaguke bgatwo bgar’ amatambge atanu; utwo hagati ubgaguke bgatwo bgar’ atandatu; utwa gatatu, ubgaguke bgatwo bgar’ indwi; ku gisika c’iyo ngoro ahahera inyuma, yagenda asiga ahaniguye impande zose, kugira ngw imbaho z’utwo twumba ntizinjire mu gisika c’iyo ngoro.

7Mw iyubaka ry’iyo ngoro bayubakishije amabuye yatunganirijwe aho bayimvye; nta nyundo cank’ incabiti cank’ ikindi kintu cose c’icuma cumvikana mur’ iryo yubakwa ryayo.

8Umuryango w’utwumba two hasi wari ku ruhande rw’i buryo rw’iyo ngoro; abāja mu twumba two hagati bāca ku curirizo cihotaguye mu gushikayo, bahavuye bagashika mu twa gatatu.

9Uko ni ko yubatse iyo ngoro, arayuzuza; ayimanikisha ibishōro n’imbaho vy’amasederi.

10Twa twumba yometse kur’ iyo ngoro impande zose, kamwe‐kamwe uburebure bgako bg’igihagararo bgar’ amatambge atanu y’ukuboko uciriye mu nkokora; twari twubatswe ku myaro y’amasederi ifashe kur’ iyo ngoro.

11Bukeye ijambo ry’Uhoraho riza kuri Salomo,

12riti Ku vy’ iyi ngoro urik’ urubaka, ni wagendera mu vyo nashinze, ugashitsa amabgirizwa yanje, ukitondera ivyagezwe vyanje vyose, ukaba ari vyo ugenderamwo, nanje nzokomeza ijambo ryanje kuri wewe, iryo navuganye na so Dawidi.

13Kandi nzoba mu Bisirayeli, sinzoheba abantu banje.

14Uko ni ko Salomo yubatse iyo ngoro, arayuzuza.

15Imbere ku bisika vy’iyo ngoro ahōmeka imbaho z’amasederi; uhereye hasi ugashitsa ku myaro y’urusenge, imbere hose ahōmeka imbaho; kandi hasi ahasasa imbaho z’akajwari.

16Haruguru imbere mur’ iyo ngoro ahōmeka imbaho z’ amasederi kumara amatambge mirongwibiri, uhereye hasi ugashitsa ku myaro; aho hantu imbere haruguru arahakīngīra kugira ngo habe ahantu hiherereye, habe Ahēra Cane.

17Ingoro isigaye hino y’Ahēra Cane yar’ amatambge mirongwine; ni yo yitwa Ahēra.

18Hose imbere mur’ iyo ngoro hāri hōmetse imbaho z’ amasederi zisharijwekw ibishushanyo vy’uturende n’amashurwe asambuye; hose zar’ imbaho z’ amasederi, nta buye ryaboneka.

19Nukw atunganya Ahēra Cane aho nyene imbere haruguru mur’ iyo ngoro, kugira ngw ahatereke isandugu y’isezerano ry’Uhoraho.

20Kand’ Ahēra Cane, amakika yaho yar’ amatambge mirongwibiri, n’ubgaguke bgaho bgari mirongwibiri, n’uburebure bg’igihagararo na bgo bgari mirongwibiri nyene. Hose ahōmekakw izahabu iramuye, abāza n’igicaniro mw isederi, na co acomekakw izahabu, agitereka imbere y’Ahēra Cane.

21Nuko ku ngoro imbere hose ahōmekakw izahabu iramuye, araheza atambika iminyororo y’izahabu imbere y’Ahēra Cane.

22Nuko ku ngoro hose yahōmetse izahabu kugeza ingoro yose ihwanye; na ca gicaniro c’imbere y’ Ahēra Cane na co yacometsekw izahabu hose.

23Abāza mu biti vy’imyelayo ibishushanyo vy’abakerubi bibiri vyo gushira Ahēra Cane, uburebure bgavyo bgar’ amatambge cumi y’ukuboko uciriye mu nkokora.

24Uburebure bg’ibaba rimwe ry’umukerubi bgar’ amatambge atanu, n’irindi baba n’uko: uhereye kw isonga ry’ibaba rimwe ukageza ku ry’irindi yar’ amatambge cumi.

25Igishushanyo c’ umukerubi ca kabiri uburebure bgaco bgar’ amatambge cumi nyene; abo bakerubi bompi bārangana cabugerwe, kandi n’ishusho yabo yar’ imwe.

26Uburebure bg’umukerubi umwe bgar’ amatambge cumi, n’ubg’ uwundi kuno nyene.

27Nukw atereka abo bakerubi aho nyene haruguru mur’ iyo ngoro; amababa yabo yar’ ashānje, ibaba ry’umwe ryaruma ku nzu ku ruhande rumwe, iry’ uwundi ku rundi ruhande, yandi abiri agasomanira hagati mu nzu.

28Kand’ abo bakerubi abomekakw izahabu.

29Ku nzu hose imbere mur’ iyo ngoro ahabāzira ibishushanyo vy’ abakerubi n’ivy’ ibigazi n’ivy’ amashurwe asambuye, imbere haruguru no hino.

30No hasi mur’ iyo ngoro ahōmeka izahabu, imbere haruguru no hino.

31Umuryango uja Ahēra Cane awushirakw inzugi z’imbaho z’ imyelayo; uwo muryango, hakora ikibambāsi co hejuru n’ibishimaryango, watwaye umwanya w’ikigiragatanu c’umukingo waho.

32Kand’ abāza inzugi zibiri mu mbaho z’imyelayo, mu kuzibāza azishushanyakw ibishushanyo vy’ abakerubi n’ivy’ ibigazi n’ivy’ amashurwe asambuye, azomekakw izahabu, ayiyagiriza no kur’ ivyo bishushanyo vy’abakerubi no ku vy’ibigazi.

33Akora ibishimaryango vy’ urwinjiriro rw’urusengero mu biti vy’imyelayo, uwo muryango utwara umwanya w’ikigirakane c’urwo ruhande;

34akora n’inzugi zaho zibiri mu mbaho z’akajwari; urugi rumwe iyo buguruye, imbaho zarwo zompi zarīzinga, n’iz’ urwa kabiri zīzinga kuno nyene.

35Kandi mu kuzibāza azishushanyakw ibishushanyo vy’abakerubi n’ivy’ ibigazi n’ivy’ amashurwe asambuye, azomekakw izahabu ayikuyengeza no kur’ ivyo bishushanyo.

36Urugo rw’inyubakwa arwubakisha amabuye abājwe imirongo itatu igerekeranye, n’uwundi murongo w’ibiti bibājwe vy’amasederi.

37Igihe bātanguriye kwubaka itanguriro ry’iyo ngoro y’Uhoraho hāri mu mwaka ugira kane Salomo ari ku ngoma, mu kwezi kwa Zivu.

38Mu mwaka ugira icumi na rimwe, mu kwezi kwa Bulu, ari kwo kwezi kw’umunani, barangiza iyo ngoro n’ivyayo vyose, nk’ukw icitegererezo cayo cose cari kimeze. Nuko yamaze imyaka ndwi ayubaka.

← Chapter 5 Jump to: Chapter 7 →