1 Kings 9

Kirundi (Bibliya Yera 1951, 1967 (Burundi))

← Chapter 8 Jump to: Chapter 10 →

1Maze Salomo arangije kwubaka ingoro y’Uhoraho n’ingoro y’ubgami n’ivyo yagomvye gukora vyose,

2Uhoraho amwiyereka ubugira kabiri, nk’uko yamwiyerekeye i Gibeyoni.

3Uhoraho aramubarira, ati Numvise ugusenga kwawe n’ukwinginga kwawe wingingiye imbere yanje; kandi nejeje iyi ngoro wubakiye izina ryanje ngo rihabe ibihe vyose; nzoyihozakw amaso n’umutima na ntaryo.

4Nuko nawe ni wagendera imbere yanje nk’uko so Dawidi yagenda, ufise umutima w’ukuri kand’ utunganye, ugakora ivyo nakugeze vyose, ukitondera amabgirizwa yanje n’amateka nashinze;

5nanje nzotuma ingoma yawe ihangama mu Bisirayeli ibihe vyose, nk’uko nasezeraniye so Dawidi, nkamubarira, nti Ntuzobura uwo gusubira ku ngoma y’ i Bgisirayeli.

6Ariko ni mwanta, mukareka kunkurikira, cank’ abana banyu, ntimwitondere ivyagezwe vyanje n’amabgirizwa yanje nabashize imbere, mukaja gusaba izindi mana, mukaba ari zo musenga;

7nuko nanje nzoherengeteza Abisirayeli mu gihugu nabahaye, kand’ iyi ngoro nejeje kubg’ izina ryanje nzoyishibura imve mu maso; kand’ Abisirayeli bazoba iciro ry’imigani n’agashinyaguro mu mahanga yose;

8kand’ iyi ngoro nah’ ar’ agahambaye irtya, ūzoyica i ruhande wese azokwumirwa, avuze agahwa, at’ Ariko n’iki catumye Uhoraho agirira artya iki gihugu n’iyi ngoro?

9Bazomwishura, bati N’uko bahevye Uhoraho Imana yabo, yakūye ba sekuruza mu gihugu ca Egiputa, bakaramatana n’izindi mana, bakazisenga, bakaba ari zo basaba; ni co catumye Uhoraho abateza ivyo vyago vyose.

10Nuko hashize imyaka mirongwibiri, ari yo Salomo yubakiyemw’ ingoro zompi, iy’ Uhoraho n’iyiwe ubgiwe,

11umwami Salomo aha Hiramu ibisagara mirongwibiri mu gihugu c’i Galilaya; kandi Hiramu uwo, umwami w’i Tiro, ni we yari yarahaye Salomo ibiti vy’amasederi n’ivy’ akajwari n’amazahabu, nk’uko yagomba kwose.

12Bukeye Hiramu ava i Tiro aja kugendura ivyo bisagara Salomo yamuhaye; maze ntiyabishima.

13Aramubarira, ati Mbega mugenzi wanje, ibisagara wampaye ubona ar’ ibisagara ki? Ni kwo kuhīta igihugu c’i Kabula; kandi ni ko hacitwa na bugingo n’ubu.

14Kandi Hiramu yari yararungikiye umwami Salomo amazahabu italanto ijana na mirongwibiri.

15Ubu ni bgo buryo umwami Salomo yashizeh’ abanyabikebere bo kwubaka ingoro y’Uhoraho n’ingoro yiwe ubgiwe n’i Milo n’uruzitiro rw’amabuye rw’i Yerusalemu, n’i Hasori n’i Megido n’i Gezeri.

16Kandi Farawo umwami wa Egiputa yari yarateye i Gezeri, arahatsinda, arahaturira, ageseza Abanyakanani bāba mur’ ico gisagara, ahaha muka Salomo umukobga wiwe kw indongoranywa.

17Nuko Salomo yubaka i Gezeri nyene, n’i Beti‐horoni ho hepfo,

18n’i Bayalati n’i Tamari mu bugaragwa bgo mu gihugu c’Abayuda;

19n’ibisagara vyose vy’ibigega vyiwe, n’ibisagara vyo kubīkamw’ imikogote yiwe, n’ivy’ abagendera ku mafarasi biwe, n’ amazu yose yagomvye kwubaka i Yerusalemu n’i Lebanoni no mu gihugu cose yaganza.

20Abantu bose b’amasigarira y’Abamori n’ Abaheti n’Abaferizi n’Abahiwi n’ Abayebusi, abatār’ Abisirayeli,

21abuzukuruza babo bari barasigaye mu gihugu, abo Abisirayeli batāshoboye guherengeteza rwose, abo ni bo Salomo yatojemw’ abo gushinga ibikebere, abahindura abaja na bugingo n’ubu.

22Ariko mu Bisirayeli bo, nta bo yahinduye abaja; ariko bār’ ingabo zo kuja mu ntambara, n’abagendanyi, n’abagabisha b’ingabo, n’ abatware, n’abagaba abagendera ku mafarasi n’imikogote.

23Abo ni bo bakoresha bakuru bāgaba ibikorwa vya Salomo; bose na bose bār’ amajana atanu na mirongwitanu, bārāba abantu mu bikorwa.

24Maze wa mukobga wa Farawo yimuka mu gisagara ca Dawidi, aja kuba mu ngoro Salomo yamwubakiye; maze Salomo yubaka i Milo.

25Kandi Salomo yahora atanga ibimazi vyo kwoswa n’ivy’ ishimwe gatatu‐gatatu mu mwaka, abitangira ku gicaniro yubakiye Uhoraho, akosereza n’imibavu imbere y’Uhoraho.

26Kand’ umwami Salomo abāzīsha amāto i Eziyoni‐geberi, hafi y’i Eloti, kw isēsero ry’Ikiyaga Gitukura mu gihugu c’Abanyedomu.

27Maze Hiramu arungika mur’ ayo māto abantu biwe b’ abasoza bamenyereye ivy’ ikiyaga, bafatanya n’abantu ba Salomo;

28baragenda baja i Ofiru, bakūray’ amazahabu italanto amajana ane na mirongwibiri, bayazanira umwami Salomo.

← Chapter 8 Jump to: Chapter 10 →