2 Corinthians 10

Romani Baltic Latin (Biblija - Pe Baltitko Romani čib (Romanes) 2019)

← Chapter 9 Jump to: Chapter 11 →

1A me, Pávli, kokoró, mangáva tumen pir naphuvitko kovlypen Xristosóskiro, me, savó som kovlé-ilýtko tuménca, ne savó som murškanó, kiéli me na som tuménca;

2me mangáva tumen, kiéli me javáva, sob (kaj) mánge te sykavav muršypen dasavé-pac' zorjása, savjása me duminava péske te sykavav vari-savé manušénge, kon rakiréla, so ame, xači, kerása pir dalé svetóskire-manušýtko godý.

3Pal-dová so ame dživasa pe davá svéto, ne ame na marasape dalé-svetóskire godiása.

4I amaró mardýtko (oružyjo), savésa ame marasape, isyn na dalé svetóskire-manušytkoné godiatyr, ne ame sam zoralé Devléskire zoralypnasa, savjása ame phagirasa foróskire rikiribena;

5hohané dophenybena i saró, so phutjola proti Devléskiro dynaribén; ame phandasa kažno godiákiri mýslia, sob (kaj) te javél kanduny Xristosóske;

6i ame sam skedyné te čhuvas xas' (kára) pe kažno nakandypen paló (poslie) dová, kiéli tumé dophenena péskiro kandypen.

7Ci dykhéna tumé pe manušýtko muj? Kóli vari-kon zoralés patiála dro dová, so jov isyn Xristosóskiro, mek jov nevéstyr te piriduminel pal dová; léske trej te ĥaljol, so ame dasavé-pac' sam Xristosóskire.

8Ne, kóli me butýr javáva te šaravpe péskire pravosa, savó Devél dyjá te dav vast, sob (kaj) te barjol tumaró patiaibén, a na vaš dová, sob (kaj) te čhuvav telé tumen, tedy mánge na javéla ladžavo;

9mek davá te na zdelpe tuménge, so me kamdjom te darjakirav (te strahakirav) tumen lylénca:

10vari-savé rakiréna, so miré lylá isyn stroga i zorjakirena dúho (fáno), ne kiéli jov isyn aménca, ne léste masá isyn bizorjákire i léskiro lav isyn nadžindlo.

11Mek dasavo manúš te duminel péske, so, savé ame sam dre lylá, syr ame čhindiam dur tuméndyr, adasavé-pac' ame sam pir réndo, kiéli ame sam tuménca.

12Paldavá aménde nane muršypen te das čol (timín) péske ci te priparuvas (te zroŭninás) pes vari-savé javire manušénca; ne kon déla čol i priparuvela pes kokoró pésa, isyn bigodiakiro manúš.

13I ame na javása te šaraspe bi mierakiro, ne pir miéra butiakiri, saví Devél vykedyjá vaš aménge i saví dodžála ke tumé.

14Ame na vydžasa zorjátyr, so ame sýrby na dogijam ke tumé, pal-dová so ame dogijam ke tumé Xristosóskire bahtalé zaniása (zviesiasa);

15i ame na šarasape butýr mierátyr javiré-manušéngire butiasa, ne aménde isyn lačhó užakiribén, so, kóli tumaró patiaibén vybarjola, to i ame moginasa te kerás butý butýr maškír tuménde, ne ame na piridžasa miéra, saví Devél vykedyjá vaš aménge,

16tedy, sob (kaj) aménge te rosphenas bahtalý zan (zvies') pir rigá, savé isyn dur pal tuménde, pal-dová so ame na kamasa te šaraspe butiasa, saví uže kerdy pir javír rigá.

17A odová, kon šarelape, mek jov te šarelpe dolesa, so Raj Devél kerdiá.

18Pal-dová so na kodová manúš isyn lačhó, kon šarela pes, a kodová, konés Raj Devél šarela.

← Chapter 9 Jump to: Chapter 11 →