2 Corinthians 13

Romani Baltic Latin (Biblija - Pe Baltitko Romani čib (Romanes) 2019)

← Chapter 12 Jump to:

1Davá javéla tríto mólo me džáva ke tumé. “Trej duj ci trin jakhítka (svidiétieli), sob (kaj) te čhuvén zor (tvárdyma) pe lav pir davá réndo.”

2Me phendjom tuménge ĥaredyr i me phenáva angíl kakaná (adiáke-pac', syr me rakirdjom, kiéli me sómas ke tumé javír mólo, kakaná me na som tuménca čačunés) odolénge, kon kerdiá grého angíl i saré javire manušénge, so kiéli me javáva nevéstyr, me na potanginava (na požalinava) len.

3Ci rodéna tumé dophenybén, so Xristóso rakiréla pir mánde? Jov isyn na bizorjákiro vaš tuménge, a Jov sykavéla Péskiri zor maškír tuménde;

4pal-dová so Jov sys primardo pe trušúl Péskire bizoralypnasa, ne Jov isyn džidó Devléskire zorjátyr; pal-dová so ame, čačes, sam bizorjákire dro jekhipén Lésa; ne ame javása te dživás Lésa pir Devléskiri zor, saví isyn dyný tuménge;

5propatiakiren pes, ci dživéna tumé pir patiaibén; otphenen kokoré péske: ci džinéna tumé kokoré, so tumé san Xristosóskire? Kóli na adiáke, tedy tumé na san lačhé.

6Mánde isyn lačhó užakiribén, sob (kaj) tumé te džinén, so tumé san lačhé.

7Ne me mangavpe Devléske, sob (kaj) tumé te na kerén čoripén na vaš dová, sob (kaj) aménge te sykavas, so ame progijam propatiakiriben, ne sob (kaj) tumé te kerén pir čačipén, – ničý, kóli ame i na javása pridžindle syr lačhé.

8Pal-dová so aménde nane zor proti čačipén, a pal čačipén.

9Paldavá ame radynasape, kiéli ame sam bizorjákire, a tumé san zoralé. I ame adiáke-pac' mangasape Devléske, sob (kaj) tumé te javén bidošakire.

10Paldavá me čhindjom davá, so, paka me na som tuménca; a kiéli me javáva ke tumé, mánge te na otlydžavpe strogimasa tuménca pir pravo, savó Raj Devél dyjá mánge te podrikirav tumen, a nad, sob (kaj) te xas tumaró iló.

11Palatunó lav, pšalále: radynénpe, javén bidošákire, podrikirén jekh jekhés, javén jekhé-godiákire, javén dro ramánjo (miro) jekh jekhésa.

12Piridén “ramánjo” jekh jekhéske sventoné čamudypnasa.

13Saré svénta piridena “ramánjo” tuménge.

14Mek bahtalypén amaré Ráskire-Devléskiro, Isusóskire-Xristosóskiro, Devléskiri láska i patýv i Sventoné Duhóskiro khetanypén te javén tuménca. Amín'.

← Chapter 12 Jump to: