2 Corinthians 12

Romani Baltic Latin (Biblija - Pe Baltitko Romani čib (Romanes) 2019)

← Chapter 11 Jump to: Chapter 13 →

1Ĥáda, nane ni saví l'góta mánge te šaravpe. Ne me rosphenava pal dykhibena i sykadyipena mánge Rástyr-Devléstyr.

2Me džinóm jekhé patiaibnaskires dre Xristosóste (dešuštar berš pale, ci jov sys dro péskire masá, me na džinóm, ci dová sys léskiro dúho (fáno), me na džinóm, Devél džinéla); adasavó manúš sys ĥazdynó ke tríto bolybén.

3I me džinóm (džináv) dasavé manušés, (ci jov sys dro péskire masá, ci dová sys léskiro dúho (fáno) me na džinóm, Devél džinéla:)

4so jov sys ĥazdynó dro Bolybnáskiro Rajo, i šundiá dasavo, so naštý te piridel lavénca, savé manušytkoné ušténca fedýr te na vyphenen.

5Kadasavé manušésa me javáva te šaravpe, ne na pésa kokoresa, a jekh so jekhé miré bizoralypnása.

6Pal-dová so, kóli me kamamas te šaravpe, tedy me na javáva dylynesa. Pal-dová so me phenáva čačipén, sob (kaj) nijékh manúš te na poduminel kučedyr pal mánde daléstyr, so jov dykhéla dre mánde i šunéla pal mánde.

7Sob (kaj) mánge te na phutjovav divoskire dykhibnasa, mánge isyn dyný phusadý bust (koliučka) dre loč sýrby dynári (slúga) nalačhéstyr, sob (kaj) jov te menčynel man vaš dová, sob (kaj) mánge te na phutjovav.

8Paldavá me i mangdjom patýv Rástyr-Devléstyr trin móly, sob (kaj) Jov te durjakirel bust mándyr.

9I Jov phendiá mánge: “Uhtýlla (dósi) vaš túke Miro bahtalypén, savó sykavelape so naj fededýr, kiéli me som bizorjákiro!” Paldavá mánge butýr pir iló te šaravpe miré bizoralypnasa, sob (kaj) Xristososkiri zor te zadžál dre mánde.

10Paldavá me radynavpe péskire bizoralypnastyr, so man ladžakirena; trebimatyr, tradypnastyr, pharé džiibnastyr vaš Xristosóske, pal-dová so, kiéli me som bizorjákiro, tedy me som zoraló.

11Me jacjom dylynó, tumé začhude man: pal-dová so tuménge treindiá te šarén man; me na som ni dro so fujedýr kadalé baré Apostolendyr, xoc' me i adiáke-pac' na som mol ničý.

12Čačes, ĥertyka (znamiénii), savé dophenena, so me som Apostolo, sykade pes baré vyrikiribnasa, divenca i zorjása pir dívna butiá.

13Syr ža tedy ke tumé te otlydžavpe fujedýr javire khangir'jendyr, apríč dová, so me na jandjom pharipén tuménge. Primangen mánge, so me vyphendjom dasaví xolý.

14Ĥáda, me skedyjompe te džav ke tumé tríto mólo. I me na janáva pharipén dre lové tuménge, pal-dová so me na rodava vari-saví l'góta tuméndyr, a tumé kokoré trej mánge. I na čhavé skedéna lové vaš dadénge, a dadá vaš čhavénge.

15Kakaná me fedýr javáva te rozmekav péskiro i te otdav pes pal tumaró iló. Kóli me kamám tumen butedýr, naúšto tumé javéna te sykavén patýv mánge kutedyr (nabutedyr)?

16A kóli te javél adiáke, ci me jandjom pharipén tuménge? Ne vari-kon phenéla, so me som mendro, i me, xaj, lyjom vari-so tuméndyr xohaibnasa?

17Ci lyjom me vari-so tuméndyr pir vari-konéste, konés me bičhadjom ke tumé?

18Me mangdjom Titos i bičhadjom pšalés lésa: ci lyjá Tito vari-so tuméndyr? Ci na kerdiám ame dro jekh dúho (fáno)? Ci na psirdiam ame jekhe dromésa?

19Ci duminéna tumé, so ame, xači, zaterdjovasa pal péste? Davá ame rakirasa angíl Devléste dro jekhipén Xristosósa pir saré réndy vaš tumaró podrikiribén.

20Pal-dová so me darava, so, kiéli me nevéstyr javáva, me mogináva te lathav tumen adasavenca, syr me na kamám, i tumé moginéna te lathén man adasavesa, syr me na kamám: me darava, so moginéna te javén košybena, zevlynypena, xoliakiribena, rosperibena pe grupki, gundiakiribena, phut'kiribena, bizlady;

21sob (kaj) miro Devél te ná čhuvél telé man pal tuménde, kiéli me javáva nevéstyr, i, sob (kaj) mánge te na rováv pal buténde tuménde, savé kerdé grého i na otrisine nažužypnastyr, biladžaipnastyr, ladžave rendéndyr, savénca jone zalenaspe.

← Chapter 11 Jump to: Chapter 13 →