2 Corinthians 5

Romani Baltic Latin (Biblija - Pe Baltitko Romani čib (Romanes) 2019)

← Chapter 4 Jump to: Chapter 6 →

1Pal-dová so ame džinása, so, kiéli daja šátra – so isyn amaró kher pe phuv, phadjola, to Devél déla kher dro Bolybnáskiro Rajo te dživás aménge, davá kher isyn viéčno, i na manušá čhudé les.

2Paldavá ame, čačes, pharés dasa ĥondiá (uzdyhinasa) dro davá Kher pe phuv, pal-dová so ame drieván kamasa te doresas (te dolas) kher Bolybnáskire Rajostyr, sob (kaj) sýrby te urjavas les pe péste;

3kóli ame, čačes, urjavasa len, tedy ame na javása nange.

4Paldová so, kiéli ame dživasa dre daja phuvitko šátra, ame dasa ĥondiá (uzdyhinasa) pharipnastyr; davá na značynéla, so ame kamasa te vydžas pe vólia amaré čačuné maséndyr, ne ame kamasa, sob (kaj) te javél bolybnáskiri fórma pe aménde, sob (kaj) amaré masá, savé isyn xasibnýtka, te parudjon dro viéčno džiibnýtko paló (poslie) otdžidiakiriben.

5Davá Devél, Kon skedyjá amen vaš davá parudyiben i dyjá adiáke-pac' aménge Péskiro Dúho (Fáno) syr symadý (zalogo).

6Paldavá ame ŭsády (sak) zoralés patiása i ame džinása, so paka ame sam kheré dre čačuné masá, ame sam dur Ráskire-Devléskire Kheréstyr,

7pal-dová so ame dživasa pir patiaibén, a na pir dová, so ame dykhasa,

8i ame zoralés patiása i ame fedýr kamasas te mekas amaró kher vaš masá i te javas kheré Devlésa.

9Pal davá ame drieván kamasas te kerás dová, so isyn lačhó Devléske, ci, kiéli ame sam dro amaró kher adái, ci, syr ame javása odój.

10Pal-dová so aménge sarénge trej te sykavas pes angíl Xristosóskiro sendarítko štéto, sob (kaj) ame moginasa te doresas (te dolas) pal dová, so ame kerdiám pal péskiro džiibén dre masá: lačhipén ci fuipén.

11Paldavá, syr ame džinása, so davá značynéla te daras Devléstyr, to ame patiakirása javire manušén dro davá čačipén; Devél džinéla amen sarésa, i mánde isyn lačhó užakiribén, so i tumé džinéna saró pal aménde.

12Ame na šarasa pes nevéstyr angíl tuménde, ne ame dása saštypén (vozmožnost') tuménge te šarén amen, sob (kaj) tumé moginénas te otphenen odolénge, kon šarelape savó manušytkoné javrituné lačhipnása, a na léskire xaraktierosa.

13Kóli ame sam sýrby bigodiakire, davá isyn vaš dová, sob (kaj) te slavinas Devlés, a kóli ame sam dre péskiri godý, davá isyn vaš tuménge.

14Pal-dová so Xristososkiri láska propatiakirela amen, savé pridžinena davá, so; kóli Jekh myjá pal sarénde, tedy saré myné vaš phuranó džiibén;

15Jov myjá pal sarénde, sob (kaj) džidé manušá te na dživén vaš péske, ne vaš Léske, Kon myjá pal lénde i otdžidyjá vaš léngiro lačhipén.

16Paldavá kakaná ame na sendinas manušén pir dalé-svetoskiro manušýtko; a kóli ame i sendindiam Xristosós, syr saré sendinena, tedy ame butýr na kerása adiáke.

17Paldavá, kon isyn dro jekhipén Xristosósa, kodová jačélape sýrby nevó manúš: phuranó dúho (fáno) léstyr gijá, nevó zagijá:

18saró davá isyn Devléstyr, Savó zmirindia (kerdiá rahmanonénca) amen Pésa pir Xristosóste i dyjá zadyiben aménge te primirinas javirén:

19pal-dová so Devél pir Xristosóste primirindia svéto Pésa i primangdia léngire gréhi, i Jov čhudiá dro amaró iló lav, sob (kaj) ame te jačas Léske rahmanone manušénca.

20I ame sam bičhadé manušá Xristosostyr sýrby Devél rakiréla Léskiro lav pir aménde, i ame mangasa vaš Xristosóste: jačénpe rahmana (javén khetané) Devlésa.

21Pe Xristosóste, Savéste na sys grého, Devél čhudiá saré amaré gréhi syr svénto otdyibén, sob (kaj) ame te jačaspe čačunenca angíl Devléste pir Xristosóste.

← Chapter 4 Jump to: Chapter 6 →