2 Corinthians 4

Romani Baltic Latin (Biblija - Pe Baltitko Romani čib (Romanes) 2019)

← Chapter 3 Jump to: Chapter 5 →

1Kóli Devél sykadiá Péskiro lačhipén ke ame i dyjá dasaví butý aménge, tedy ame na perasa ilésa.

2Ne ame durjovasa ĥaradé ladžaipnytkone rendéndyr, ame na mendrinasa, na pirikerasa Devléskiro lav, a ame rakirasa čačipén i sykavasa pes, syr ame sam, pe manušýtka jakhá angíl Devléste.

3A kóli amarí Jevángielija isyn garady, tedy joj isyn ĥarady vaš odolénge, savé isyn xasibnýtka,

4pal-dová so lénde, napatiaibnaskirende, davá svetoskiro xohanó devloro štyliakirdia léngiri godý, sob (kaj) jone te na dykhén dud (svéto) i te na ĥaljon rosphenyben pal bahtalý zan (zvies') pal Xristososkiri jarko sláva, a Xristóso isyn Devléskiri patrín (óbrazo).

5Pal-dová so ame na rosphenasa pal péste, a pal Xristosóste, amaré Raste-Devléste, i ame sam Xristosóskire pishárja.

6Adavá isyn Devél, Savó phendiá: “Te ziainel dud (svéto) ciamlypnastyr”, isyn dová-pac' Devél, Kon začhudia davá dud te ziainel dro amaró iló, sob (kaj) ame te ĥaljovas Devléskiri jarko sláva, saví ziainela Isusóstyr Xristosostyr.

7A davá kučipén ame rikirasa dre ĥlejána (glinýtka) pirja, sob (kaj) te sykavas zorjakiro baripén, savó isyn Devléstyr, a na améndyr:

8amen tasavena saré rigéndyr, ne aménge nane ciasno (tango); ame kuninasape, ne ame na perasa Duhósa;

9amen tradéna, ne ame na sam bistyrde; amen vyčhurdena javrí, ne ame na xasjovasa.

10Ame dre masá ŭsády (sak) lydžása Xristosóskiro meribén dre péste, syr Isúso myjá vaš dová, sob (kaj) te javél bicialó Isusóskiro džiibén pir dúho (fáno) dre aménde.

11Amen džiden ŭsády (sak) zdena pe meribén pal Xristosóste, sob (kaj) te sykadjol Xristosóskiro džiibén pir amarí loč (plot'), saví meréla.

12Meribén, čačes, keréla butý dre tuménde, a džiibén dre aménde.

13Ne aménde isyn dasavo-pac' patiaibnaskiro dúho (fáno), syr isyn čhindló: “Me upatiandyjom, paldavá me rakirdjom” i ame adiáke patiása, paldavá ame adiáke-pac' i rakirasa,

14i ame džinása, so Odová, Kon otdžidiakirdiá Ras-Devlés, Isusós Xristosós, adiáke-pac' otdžidiakirela i amen pir Isusóste Xristosóste i čhuvéla amen tuménca khetané angíl Péste.

15Pal-dová so saró davá isyn vaš tumaró lačhipén vaš dová, sob (kaj) Devléskiro bahtalypén, savó dodžála ke but-but manušýtka ile, te janel parikiriben vaš Devléskiri sláva.

16Paldavá ame nijékhvar na perasa dro iló. Ne xoc' amaré masá javriestyr xasiakirena zor, to amaré-Duhoskiri andratuný paš so dyvés zoraljola.

17Pal-dová so amaré krótka i lokhé piridživibena janéna but-but baredýr viéčno sláva,

18i ame duminasa na pal dová, so isyn bicialó, a pal dová, so nane bicialó; pal-dová so saró bicialó isyn pe naboro (krotko) časo, a nabicialo isyn viéčno.

← Chapter 3 Jump to: Chapter 5 →