2 Corinthians 9

Romani Baltic Latin (Biblija - Pe Baltitko Romani čib (Romanes) 2019)

← Chapter 8 Jump to: Chapter 10 →

1Me duminava, so na trej te čhinav pal dynaribén (služenijo) te den vast sventonenge;

2pal-dová so me džinóm tumaró xačkiribén te pomoginen (te den vast), sósa me šardjom tumen manušénge dre Makiedonija, pal dová, so Ahaija sys skedynó berš pale i tumaró iléskiro xačkiribén te den vast sýrby ĥazdyjá buté-manušéngiro iló.

3Ne me bičhadjom pšalén ke tumé, sob (kaj) amaró šaribén pal tuménde te na javél čhučó (pusto), sob (kaj), syr me phendjom, tumé te javén skedyné,

4a so, kiéli manušá Makiedonijatyr javéna mánca i dykhéna, so tumé na san skedyné, savó ž ladžaipén javéla aménge (na rakirí pal tuménde) pal amaró tvardo šaribén.

5Paldavá me pridumindjom te mangav pšalén, sob (kaj) jone te džán angledýr ke tumé i te dokončynen te skedén lové vaš bahtiakirdó dáro, pal so sys dynó lav, sob (kaj) jov te javél bahtiakirdó dáro iléstyr, a na sýrby tyrdena zorjása.

6Davá isyn čačipén, so, kon čhuvéla giv nábut, odová i kedela aplodo nábut, a kon čhuvéla giv but, odová i kedela aplodo but:

7mek kažno manúš te del adákicy, kicý isyn léske pir iló, a na pir zor; pal-dová so Devléske isyn drógo kodová manúš, kon déla radymása.

8Paldová so Devél moginéla te bahtiakirél tumen adákicy dro saró, sob (kaj) tuménde te uhtylel (te javél dósi) saró, so trej tuménge, i upredyr daléstyr, sob (kaj) tumé te javén skedyné pe kažno lačhó réndo:

9syr isyn čhindló: “Jov rozdyja saró, dyjá bogenge, Léskiro čačipén javéla pe saré beršá.”

10I Devél, Savó déla ziárki te čhuvén dre phuv i maró te xan, déla tuménge saró i barjakiréla saró i javéla barvaló aplodo tumaré čačipnastyr:

11Devél keréla tumen barvalé ilénca pe saré lačhé réndy, so but manušá javéna te parikirén Devléske pal tumaré dáry, savé jone doreséna (dolena) améndyr.

12Pal-dová so dasavo lačhó dynaribén na so féni pomoginela sventonenge dre léngiri trébima, ne iščo (inké) butedýr vykharela léndyr baró parikiriben Devléske;

13i jone slavinena Devlés, dykhí pe dasavo lačhó dynaribén, pal-dová so, syr tumé pridžinena, adiáke-pac' i tumé keréna saré iléstyr pir Xristososkiri bahtalý zan (zvies'); i pal tumaré ilýtka dáry lénge i javirénge,

14i jone dre péskire patierja (molitvy) Devléske tyrdenape ilésa ke tumé pal barvaló Devléskiro bahtalypén, savó Jov sykadiá pir tuménde.

15Parikirasa Devléske saré godiatyr i iléstyr pal Léskiro taláno, savó naštý te vyphenas.

← Chapter 8 Jump to: Chapter 10 →