2 Corinthians 6

Romani Baltic Latin (Biblija - Pe Baltitko Romani čib (Romanes) 2019)

← Chapter 5 Jump to: Chapter 7 →

1Syr ame kerása butý khetané Devlésa, ame mangása tumen te na bistren pal Devléskiro bahtalypén, so tumé prilyné les na ivjá (na naprásnes):

2i, ĥáda, Devél rakiréla: “Kiéli lačhó časo javdiá, me šundjom tumen: i kiéli javdiá dyvés te zrakhav tumen, Me dyjom vast (pomogindjom) túke.” Ĥáda, isyn lačhó mardó (štúnda); ĥáda, isyn dyvés te zrakhespe:

3ame na čhuvasa bar pe drom nijekhéske, sob (kaj) nikón te na bangiakirel amarí butý;

4ne dro saró ame sykavasa pes syr Devléskire butiarné: zoraló vyrikiriben dro piridživiben, dre trébima, dro pharipén;

5kiéli marena amen čupniasa, čhuvéna dro štaribén, ĥazdéna manušén pe aménde, kiéli kerása butý pharés, bi soibnaskiro, bokhalé;

6dro žužypen, dro džinybén, dro dlengo vyrikiriben, dro lačhipén pir Svénto Dúho (Fáno), pir čačuný pšalýtko patýv;

7pir čačipnáskiro lav, Devléskire zorjása, čačipnáskire mardytkonésa dro čačó i dro zérvo (liévo) vast;

8slavása i ladžakiribnasa, pir nálačho lav i šaribén; amen ginéna pal xohané manušénde, ne ame rakirasa čačipén;

9ame sam sýrby nadžindle i sam džindlé sarénge, sýrby manušá ke meribén, ne ĥáda, ame sam džidé; čhuvéna xas' (kára) pe aménde, na iščo (inké) na muliakirdé;

10ame sam sýrby smentna (skučna), ne ame ŭsády (sak) radynasape; ame sam sýrby bógi, ne ame kerása but manušén barvalenca; aménde nane ničý, ne adiáke-pac' aménde sýrby saró isyn.

11Amaré uštá rakiréna čačipén tuménge. Korinfiniále, amaró iló isyn otkerdo.

12Amaré rigátyr ame sam saré iléstyr ke tumé, a tumé sýrby zaphandle péskiro iló améndyr,

13ne otlydžanpe adiáke-pac' ke ame (me dáva rakiráva syr čhavénge): otphanden péskiro iló buĥles, syr i ame.

14Na kerén butý khetané napatiaibnaskirenca; pal-dová so savó isyn khetanypen maškír čačipén i grého? So isyn khetané maškír dud (svéto) i kalypén?

15I savó dorakiribén isyn maškír Xristosóste i Vieliaróste? Ci savó khetanypen isyn maškír patiaibnaskireste i napatiaibnaskireste?

16Savó khetanypen isyn maškír Devléskiri khangirí i idoléngire – mangipnýtko kher? Pal-dová so tumé san khangirí džidé Devléskiri, syr Devél Kokoró phendiá: “Me javáva te dživáv maškír lénde i Me javáva te psirav maškír lénde. I Me javáva léngiro Devél, i jone javéna Miré manušá.”

17“Paldavá mekén adalé manušén i javén dre rig, – rakiréla Raj Devél, – i te na javél tuménde ničý khetané nažužesa, i Me prilava tumen;

18i Me javáva vaš tuménge i tumé javéna miré čhavé i čhaja, – rakiréla Raj Devél Sarezorjákiro.”

← Chapter 5 Jump to: Chapter 7 →