2 Corinthians 7

Romani Baltic Latin (Biblija - Pe Baltitko Romani čib (Romanes) 2019)

← Chapter 6 Jump to: Chapter 8 →

1Paldavá, kóli aménge sys dyné dasavé lavá, miré dróga, žužakirasa pes saréstyr, so meliakirela amarí loč (plot') i dúho (fáno) i javása te dživás sarésa sventones dro dar angíl Devléste.

2Otkeren péskiro iló vaš aménge: ame nijekhés na xoliakirdiam, ame nikonéske na kerdiám čoripén, ame nikonestyr na lyjam kófo (procento) vaš péske.

3Me na rakiráva davá, sob (kaj) te sendinav tumen; pal-dová so tumé san dróga amaré ileske, syr me ĥaredyr phendjom, sob (kaj) te dživás i te meras khetané.

4Me zoralés patiáva tuménge; me zoralés šarava tumen; me čuinava lačhó podrikiribén; me drieván radynavpe, na dykhí pe saré amaré piridživipena.

5Pal-dová so, čačes, kiéli ame javdiám dre Makiedonija, amarí loč (masá) na otkhinyja, a amen tasavenas saré rigéndyr: čingardá javriestyr, dar dro iló andrál.

6Ne Devél, Savó podrikiréla manušén, savé isyn sýrby pritasade, podrikirdia amen i bičhadiá Titos aménge;

7ne na adákicy, so Tito javdiá, a butýr pir dová, so jov podrikirdia amen i rosphendiá aménge, so tumé drieván kaména te dykhén amen; syr tumé rondlé, syr tumé san terdé pal mánde, so daléstyr me butýr obradyndjompe.

8Pal-dová so me xoc' i jandjom smentnyma (piečal') tuménge miré lylesa, me ná dávape pale; kóli me i dávaspe pale, so miro lyl jandiá smentnyma, féni (tóka) pe nabaró časo.

9Ne kakaná me radynavape na pir dová, so tumé sánas dre smentnyma, a pir davá, so tumarí smentnyma začhudia tumen te paruven péskiro džiibén (te riskirén tumaró džiibén ke Devél), pal-dová so tumarí smentnyma sys pal Devléste, adiáke so na sys ni savó čoripén aménge.

10Pal-dová so sméntnyma (túga) pal Devléste lydžála manušés, sob (kaj) jov te zrakhelpe, a smentnyma, saví isyn pir godý dro davá svéto, lydžála ke meribén.

11Dykhén! Daja-pac' smentnyma pal Devléste, – so jandiá tuménge? Savó iléskiro xačkiribén te risjon grehostyr! Savó iléskiro dophenybén pal péste! Saví xolý! Saví dar! Saví láska iléstyr! Savó zevlynypén! Savó sendiakiriben! Tumé sykade, so tumé san nabange dro davá.

12Paldavá, kóli me čhindjom tuménge, davá na sys sýrby manušéstyr, savó kerdiá bibáht, ci odolé manušéstyr, savéske kerdé bibáht; ne vaš dová, sob (kaj) tumé te dykhén angíl Devléste, syr ame xačkirdé ilésa otlydžasape ke tumé.

13Pal davá aménge sys lačhó podrikiribén. Ne ame butýr radynasape Titoskire radymátyr, pal-dová so saré tumé podrikirde léskiro dúho (fáno).

14Pal-dová so kóli me šardjom tumen léske, me na sómas ladžakirdó, ne, syr ame phendiam tuménge saró čačipén, tedy adiáke-pac' i amaró šaribén angíl Titoste sys čačunó:

15i léskiro iló butýr pherdjola laskasa, kiéli jov priripirela, syr tumé kandyné léskiro lav, syr tumé darenas i izdranas, kiéli tumé prilyné les.

16Paldavá me radynavpe, so me zoralés patiáva dre tuménde pir saró.

← Chapter 6 Jump to: Chapter 8 →