2 Corinthians 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1Paldavá me rossendindjom péske te na džav ke tumé nevéstyr baré piridživipnasa.

2Kóli me janáva tuménge baró piridživipen, kon ža isyn odová, kon adiáke-pac' i obradynela man, kóli na odová-pac', konéske me janáva baró piridživipen?

3I me čhindjom davá-pac' tuménge darátyr (darjatyr), so kiéli me javáva, tedy, sob (kaj) mánge te na piridživav pal odolénde, konéske trej te radynel man, me zoralés patiáva dre tuménde, so mirí rádyma isyn rádyma vaš saré tuménge.

4Pal baró piridživipen i dukhano iló me čhindjom tuménge baré jasvénca na vaš dová, sob (kaj) tumé te piridživen, a sob (kaj) tumé te udžinén mirí bari pšalýtko patýv ke tumé.

5Ne kóli vari-kon jandiá piridživipen vari-konéske, jov jandiá piridživipen na vaš mánge, a na rakirí but, sarénge tuménge.

6Vaš kadasavé manušéske uhtýlla (dósi) vyrakiriben, so sys léske butendyr tuméndyr;

7sob (kaj) tumé pe proti fedýr te primangen léske i te podrikiren les, sob (kaj) jov te na javél stasadó piridživipnása.

8Paldavá me mangáva tumen te prilén les laskasa.

9Pal-dová so me čhindjom, sob (kaj) te propatiakirav tumen, ci kandéna tumé dro saró.

10A vari-konéske tumé primangena i me adiáke-pac' primangava; pal-dová so, kóli me primangdjom vari-so, me primangdjom davá pal tuménde pir Xristosóskiro pravo;

11sob (kaj) nálačho te na pirizorjakirel amen, pal-dová so ame džinása, so jov kaméla.

12Kiéli me javdjom dre Troada te rosphenav Xristososkiri bahtalý zan (zvies'), kiéli Devél psiradia vudár vaš mirí butý,

13mánge sys pharó dúho (fáno) pe iló, kiéli me na lathjom Titos, miré pšalés, paldavá me roziacjompe lénca i gijom duredýr ke Makiedonija.

14Ne parik Devléske, Savó ŭsády (sak) lydžála vučés amen dro jekhipén Xristosósa i piridela pir aménde džinybén pal Xristosóste, savó ame sungasa (sungavasa) syr gudló khandypen.

15Pal-dová so ame sam sýrby gudló thuv (dymo), so Xristóso janéla Devléske vaš odolénge, savé isyn zrakhné i vaš odolénge, savé xasjona;

16vaš jekhe manušénge davá isyn meribnaskiro khandypen, vaš javire manušénge davá isyn džiibnáskiri sung. Kon ža, tedy, isyn lačhó pe davá?

17Pal-dová so ame na janasa doš Devléskire lavéske, syr but manušá adiáke keréna, ne ame saré iléstyr, Kokoré Devléstyr rakirasa Xristosóskire zorjása angíl Devléskire jakhá.

← Chapter 1 Jump to: Chapter 3 →