2 Kings 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1I sys adiáke: kiéli Raj Devél skedelaspe te ĥazdel Ilijas pe bolybén riskiribnáskire balvaliasa, to jov dro dová momiénto džálas Jelisiejosa Galgalostyr.

2I phendiá Ilíia Jelisiejoske: “Jačpe adáj pal-dová so Raj Devél bičhavéla man dre Viefil'.” Ne Jelisiéjo phendiá: “Te javél džidó Raj Devél pe viéki, i te javél džidó tyró di, so me na mekava tut!” I giné jone dro Viefil'.

3I vyginé ke Jelisiéjo čhavé prorokéngire, i phendlé léske: “Tu džinésa, so adadyvés Raj Devél ĥazdéla tyré ras upré tyré šerestyr?” Jov otphendiá: “Me adiáke-pac' džinóm (džináv), javén štyl (molčynen!)”

4Tén'ci Ilíia phendiá léske: “Jelisiejo, jačpe adái, pal-dová so Raj Devél bičhavéla man dro Jerihóno.” I otphendiá Jelisiéjo: “Te javél džidó Raj Devél pe viéki, i te javél džidó tyró di: Me na mekava tut.” I javné jone dro Jerihóno.

5I čhavé prorokéngire, savé sys dre Jerihóno, podginé ke Jelisiéjo, i phendlé léske: “Ci džinésa tu, so Raj Devél adadyvés ĥazdéla tyré ras upré tyré šerestyr?” I jov otphendiá: “Me adiáke-pac' džinóm, javén štyl (molčynen):”

6I phendiá léske Ilíia: “Jačpe adái, pal-dová so Raj Devél bičhavéla man ke Iordáno.” I phendiá jov: “Te javél džidó Raj Devél pe viéki, i te javél džidó tyró di: me na mekava tut.” I giné dujdžiné.

7I pandždešá manušá prorokéngire čhavéndyr, giné i terdiné proti lénde, ne jone sys terdé dujdžiné dro Iordáno.

8I lyjá Ilíia plaščo péskiro, i skrencyndia, i pekadiá lésa pir paní, i rozgijápe jov odorík i adarík, i piriginé jone dujdžiné pir šukí phuv.

9Kiéli jone piriginé, Ilíia phendiá Jelisiejoske: “Mang, so te keráv túke, angledýr, syr me javáva lynó tútyr.” I phendiá Jelisiéjo: “Dúho (Fáno), savó isyn dre túte, mek te javél pe mánde dre duj móly.”

10I phendiá jov: “Pharipén tu mangesa. Kóli dykhésa, syr me javáva lynó tútyr, tedy javéla túke adiáke; a kóli na dykhésa, to na javéla.”

11Kiéli jone giné i dromésa rakirdé, vari-katýr lyjape maribnýtko vurdén, savó xačolas jagása i graja, savé xačonas jagása, i razlučyndle len dujén, i ĥazdyjápe Ilíia dre vihro (riskiribnaskiri balvál) pe bolybén.

12Jelisiéjo dykhciá i dyjá gódla: “Dádo miro, dádo miro, vurdén Izrailjoskiro i graja léskire!” I na dykhciá les butýr. I uhtyldia jov ídi péskire, i roskustia len pe duj pašá.

13I ĥazdyjá plaščo Ilijaskiro, savó pyjá telé léstyr, i gijá pale, i terdijá pe Iordanoskiro brégo.

14I lyjá plaščo Ilijaskiro, savó pyjá telé léstyr, i pekadiá lésa pir paní, i phendiá: “Kaj isyn Raj, Devél Ilijaskiro, – Jov Kokoró?” I pekadiá pir paní, i jov rozgijápe odorík i adarík, i pirigija Jelisiéjo.

15I dykhné les prorokéngire čhavé, savé sys dro Jerihóno, durál, i phendlé: “Pasijá dúho (fáno) Ilijaskiro pe Jelisiejoste.” I giné gil léske, i poklonindlepe léske ke phuv.

16I phendlé léske: “Ĥáda, isyn aménde, pishar'jénde tyrende, manušén pandždešá, manušá zoralé: mek by jone giné i porodyne tyré xulás; moginéla (mo) te javél, so lydžijá les Dúho (Fáno) Ráskire-Devléskiro i jačkirdiá les pe jekh bergendyr, ci pe jekh dólo.” Jov phendiá: “Na bičhaven.”

17Ne jone prijačenas ke jov ĥará (dlúges) adiáke, so dohane léske, i jov phendiá: “Bičhaven.” I bičhadé pandždešá manušén, i rodyne trin dyvesá, i na lathné les.

18I risiné ke jov, maškír davá, syr jov jaciápe dro Jerihóno, i jov phendiá léske: “Ci na rakirdjom me tuménge: ‘Na psirén?’”

19I phendlé manušá, savé dživdé ke fóro Jelisiejoske: “Ĥáda, davá fóro kerdó šukár, syr dykhéla xuláj miro; ne paní isyn nálačho i phuv na bijanéla.”

20I phendiá jov: “Den mánge nevó tahtáj (čaša) i čhuvén lond odorík.” I dyné léske.

21I vygijá jov ke paniéskiri ĥanyngori, i čhurdyjá odorík lond, i phendiá: “Adiáke rakiréla Raj Devél: ‘Me kerdjom davá paní zoralesa, na javéla léstyr butýr ni meribén, ni nabijanypen.’”

22I paní jaciá zoralo ke davá dyvés, pir lav Jelisiejoskiro, savó jov phendiá.

23I gijá jov odothýr dre Viefil'. Kiéli jov gijá dromésa, tykné bijaty vyginé foróstyr, i sandlepe léstyr, i rakirdé léske: “Džá, pliešytko, džá, pliešytko!”

24Jov obrisija i dykhciá len, i prokostia len lavésa Ráskire-Devleskiresa. I vyginé duj ričycy vešéstyr, i roskušne léndyr štardešá duje bijatén.

25Adathýr gijá jov pe bérga Karmilo, a odothýr risijá dre Samárija.

← Chapter 1 Jump to: Chapter 3 →