Ezekiel 14

Romani Baltic Latin (Biblija - Pe Baltitko Romani čib (Romanes) 2019)

← Chapter 13 Jump to: Chapter 15 →

1I javné ke me vari-kicý manušá Izrailjoskire phurydyrendyr, i sys bešté angíl mánde.

2I sys ke me Ráskire-Devléskiro lav dasavo:

3“Manušéskiro čhava! Adalé manušá mekné péskre kerdé devloré (ídoly) dre péskre ile, čhudé péskire kerdé devloré angíl péste: syr že saštý (moginen) jone Mándyr te phučén?

4Paldavá rákir lénca i phen lénge: ‘Adiáke rakiréla Raj Devél, Devél: kóli vari-kon Izrailjoskire kheréstyr domekela péskre kerdé devloré (ídoly) dro peskro iló, i čhuvéla péskre kerdé devloré angíl léste te obštavelpe i jov javéla ke proróko, to cji, phenáva li Me, Raj Devél, Devél, léske, kóli isyn but léste leskre kerdé devloré?

5Mek te ĥaljon Izrailjoskiro kher dre péskiro iló, so pal saré jone péskre kerdé devloré kerdépe jone čúža vaš Mánge.’

6Paldavá phen Izrailjoskire kheréske: “Adiáke rakiréla Raj Devél, Devél: ‘Risjon ke Devél risjon krig tumaré kerdé devlorendyr, riskirén tumaré muiá saré tumaré džungalypnastyr (brytkimatyr)!

7Kóli vari – kon Izrailjoskire kheréstyr i čužoné manušéndyr i, savé dživéna dro Izrailjo, durjola kokoró Mándyr, i domekela péskre kerdé devloré dro péskiro iló, i čhuvéla péskre kerdé devloré angíl péskiro muj i javéla ke proróko te phučelpe léstyr pal Mánde, to Me, Raj Devél, Devél, otphenava léske?

8Me risjováva Miré mósa pe odolé manušéste, Me keráva adalé manušésa adiáke, sob (kaj) javír manušá te dykhén, i te rakirén, Me zalava les Miré manušéndyr, Izrailjostyr, i Me tedy tumé ĥaljona, so Me som Raj Devél, Devél.

9A kóli proróko domekela te xohavél pes, i phenéla lav adiáke, sýrby Me, Raj Devél, Devél, vysykliakirdjom les, to Me protyrdava pe léste Miro vast, xasiakiráva les Miré manušéndyr, Izrailjostyr.

10I jone léna pharó sendiakiriben pal péskre čoripena: savó bangó javéla dová, so phučela, kadasavó bangó javéla i proróko,

11sob (kaj) te na durjol butýr Izrailjoskiro kher Mándyr, i te na kerén pes magirdesa péskre čoripnástyr, ne, sob (kaj) te javén jone Miré manušá, i sob (kaj) Me te javav Léngiro Raj Devél, Devél.’”

12I sys ke me Ráskire-Devléskiro lav:

13“Manušéskiro čhava! Kóli vari-saví phuv te kerél gréhi angíl Mánde, i te javél usá napatiaibnytko ke Me, to Me protyrdyjomas pe léste Miro vast, Me zalyjom by léstyr saró maró, savó déla džiibén, Me bičhadjom pe léste bokh i lyjom te xasiakiráv pe léste manušén i kheritkoné murdalén.

14Kóli b te lathenpe pe doiá phuv dalé trin manušá: Nojo, Danila i Ióvo, to jone féni (tóka) péskre sventoné džiibnasa, to rakhenas by peskro di i butýr ničí”, – rakiréla Raj Devél, Devél.

15Ci, kóli b Me bičhadjom pe daja phuv zahale murdalén te prodžan pir láte, savé zalenas by látyr (phuvjátyr) čhavorén, i te kerélpe daja phuv murdaléndyr čhučí (pusto), i nijékh te na prodžal pir daja phuv pal zahale murdalénde.

16Kadalé trin manušá te javén maškír láte, – te dživáv Me, – rakiréla Raj Devél, Devél, to na zrakhenas jone ni péskre čhavén, ni péskre čhajén, a jone, trindžine jone, zrakhenaspe, ne phuv javélas čhučí.

17Ci, kóli Me te janav kurtála pe daja phuv i te phenáv: “Kurtála, prodža pir phuv!” I lyjom te xasiakiráv manušén i murdalén,

18to kadalé trin manušá maškír te javén te láte, – te dživáv Me – rakiréla Raj Devél, Devél na zrakhné by ni péskre čhavén, ni péskre čhajén, a jone féni trindžine zrakhnepe.

19Kóli Me te bičhavav pe doiá phuv meribnytka fránsy, i te vyčhuvav pe láte Miro xoliamipen te čhuvelpe dro rat, sob (kaj) te xasiakiráv pe phuv manušén i kheritkoné murdalén (skoto),

20to až Nojo, Danijéljo i Ióvo te javén pe láte, – te dživáv Me, – rakiréla Raj Devél, Devél, – to te na zrakhenas ni péskre čhavén, ni péskre čhajén; ne péskre sventoné džiibnasa jone féni zrakhenas by trindžine peskro di.’

21Adiáke rakiréla Raj Devél, Devél: kóli štar pharé bidy Miré: kurtála, bokh, zahale riskiribnáskire murdalá (zvieri), meribnytka fránsy te bičhavav Me pe Jerusalimo, sob (kaj) te xasiakiráv dre léste manušén i murdalén,

22I tén'či jačénape dre léste manušá, čhavé i čhaja, konés vylydžana odothýr. Ake, jone vydžána ke tumé, tumé dykhéna, so jone keréna i, savé isyn léngire réndy, i tumé bistrena pal doiá bibáht, saví Me jandjom pe Jerusalimo, pal saró, so Me jandjom pe léste.

23Jone keréna adiáke, so tumé bistrena pal bibáht, kóli dykhéna, so jone keréna i, savé isyn léngire réndy. I ĥaljona, so Me na ivjá (naprásnes) kerdjom saró dová, so Me kerdjom dro Jerusalimo”, – rakiréla Raj Devél, Devél.

← Chapter 13 Jump to: Chapter 15 →