Ezekiel 18

Romani Baltic Latin (Biblija - Pe Baltitko Romani čib (Romanes) 2019)

← Chapter 17 Jump to: Chapter 19 →

1I sys ke me Ráskire-Devléskiro lav dasavo:

2“Sóske tumé rakiréna dasaví pritča (primiéro) pe Izrailjoskiri phuv: ‘Dadá xanas šutlo vinagrado (drakh), a pe čhavorengire dandá jaciá askoma?’

3‘Te dživáv Me!’ – rakiréla Raj Devél, Devél, – na javéna te rakirén butedýr dasaví pritča (primiéro) dro Izrailjo.

4Ake, kažnoné-manušéskiro di isyn Miro: syr dadéskiro di, adiáke i čhavéskiro di. O di, savó keréla grého, meréla.

5Kóli vari-kon isyn čačunó manúš, i jov keréla pir zakóno,

6kóli jov na xála pe bérgi svénto dyibén (žértva), pe Izrailjoskire-kheréskire kerdé devloré na obrisjola péskire jakhénca. Na magirelape javire romniása, na čilavéla péskire romniá, kóli joj isyn nažuži.

7Na pritasavia nikonés; a manušéske, savó sys léske bangó, otdelas léskiri symadý; na čorelas, délas péskiro maró čororé manušéske, učhakirelas nanges uribnasa;

8jov zrakhelas péskiro vast načačune kofostyr, na lelas barydyr bažyn péske, obrikirelas péskiro vast čoripnástyr, a jov kerélas čačunó séndo manušéske manušésa;

9kóli jov kerélas pir Miré uphenybená, zrakhéla Miré zakóny patiaibnytkes; to jov, čačipnáskiro isyn devlýtko, to džin, so kadasavó javéla te dživél’, – rakiréla Raj Devél, Devél.

10Ne kóli léste bijándyja (lotija) čhavó-rozmaribnari, savó pročhuvela rat, savó keréla vari-so saréstyr kodolestyr,

11so na kerélas sarésa léskiro dad, devlýtko manúš: xála pe bérgi dyibnytko xabén (žértva), ci magirelaspe javireskire romniása,

12kóli jov pritasavelas čorores i kodolé manušés, savó mangéla, kóli jov zalela zorjása, na otdéla symadý, kóli jov obrisjola péskire jakhénca pe kerdé devloré, keréla džungalypén (brytkima).

13Kóli jov léla xohanó kófo, ci léla péske baredýr bažyn, ci javéla jov te dživél? Nad, jov na javéla džidó! Kon kerélas saré dasavé džungalé réndy, kodová meréla, léskiro rat javéla pe léste.

14Akaná, ake, kóli vari-konéste bijandjola (lotjola) čhavó, savó dykhéla saré gréhi, so kerdiá léskiro dad, i obduminelas, ne na kerélas len:

15kon na xalas pe bérgi dyibnytko xabén, pe Izrailjoskire-kheréskire kerdé devloré na obrisjolas péskire jakhénca, na magirelaspe javireskire romniása, savó na pritasadia nikonés,

16i savó keréla mištés manušéske, savó na lyjá symadý, na otlyja zorjása, ne jov dyjá péskiro maró bokhaleske, učhakirdiá nanges uribnasa;

17kon zrakhciá péskiro vast, sob (kaj) te na kerél namištes čororeske, ne jov kerdiá pir Miré priphenybená, kerdiá saró pir Miré uphenybená – kadavá manúš pal péskire – dadéskiro čoripén na meréla; tumé džinéna, so jov javéla džidó!

18Ne a léskiro dad, pal-dová, so jov pritasavelas biilytkes, čorelas pšalestyr, i kerélas namištes maškír péskire manušénde, ake, jov meréla pal péskiro čoripén.”

19Tumé rakiréna: “Sóske žie čhavó na lydžála péskire – dadéskiri bang?” Pal-dová, so čhavó kerélas čačunés i pir zakóno; i jov gijá pir miré uphenybená i kerdiá, syr trej pir lénde? Tumé džinéna, so jov javéla džidó.’”

20O di, savó keréla gréhi, meréla. O čhavó na javéla te lydžál dadéskiri bang, i dad na lydžála čhaveskiri bang; devlytkoné-manušéskiro čačipnáskiro čačipén jačélape lésa, a zlydnima fujé-manušéskiro jačélape lésa.

21I fuj manúš, kóli risjola krig saré péskire grehéndyr, savé jov kerélas, i kóli jov javéla te dživél pir saré Miré uphenybená, i javéla te kerél pir zakóno i čačunés, džidó javéla, na meréla.

22Saró léskiro čoripén, savé jov kerélas, na javéla te ripirelape léske: pal péskiro čačipén, savó jov javéla te kerél, jov džidó javéla.

23Ci kamám Me grehitkoné – manušéskiro meribén?” – rakiréla Raj Devél, Devél. I ci na dová isyn, sob (kaj) jov te risjol krig péskire dromendyr i te javél džidó?

24I čačipnáskiro manúš, kóli jov risjola krig péskire čačipnastyr, i javéla te kerél saró davá čoripén, so keréla čoro manúš, ci javéla jov džidó? Saré lačhé léskire réndy, savé jov kerélas, na javéna te ripirenpe; pal péskiro čoripén, savó jov keréla i dro savó jov isyn bangó i pal grého, jov meréla.”

25Ne tumé phenéna: “Nane čačipén dro Ráskire-Devléskiro drom!” Šunén akaná, Izrailjoskiro kher! So dro miro drom nane čačipén? Dre tumaré dromá nane čačipén:

26kóli čačunó manúš risjola krig péskre čačipnastyr, keréla čoripén i pal dová meréla; jov meréla pal péskiro čoripén, savó kerdiá jov.

27I nevéstyr, kóli fuj manúš risjola krig péskire fuipnastyr, savó jov kerélas, i léla pir zakóno te kerél séndo i čačunés-risjola péskire diesa ke džiibén, jov na meréla.

28Pal-dová, so jov dykcia, i risijá krig saré péskire čoripnástyr, savó kerélas jov, javéla jov džidó, jov na meréla.”

29Ne Izrailjoskiro kher rakiréla: “Nane čačipén dro Ráskire-Devléskiro drom!” Ci dre Miré dromá nane čačipén, Izrailjoskiro kher? Ci na dre tumaré dromá nane čačipén?

30Paldavá Me javáva te sendiakirav tumen, Izrailjoskiro kher, kažnones (svakones) pir léskire dromá, – rakiréla Raj Devél, Devél; jačkiren péskire gréhi, risjon kokoré saré tumaré čoré rendéndyr, sob (kaj) te na perén tuménge tumaré čoripnástyr.

31Otčhurden péstyr saré tumaré čoré réndy, savé tumé kerdé, kerén péske nevó iló i nevó dúho (fáno); i sóske trej tuménge te merén, Izrailjoskiro kher?

32“Paldavá, so Me na kamám meribén manušéskiro, savó meréla, – rakiréla Raj Devél, Devél, – i paldavá risjon pale (javén ke Me) i dživén!”

← Chapter 17 Jump to: Chapter 19 →